Ժպտացող Փաշինյանի ահազանգն Արցախում պատերազմի բռնկման մասին

Հայաստանի մարտահրավերներից է Ադրբեջանի ոչ կառուցողական քաղաքականությունը, այսօր Նիկոլ Փաշինյանն այս մասին հայտարարել է Բրյուսելում՝ ՆԱՏՕ-ի կենտրոնակայանի մոտ կայացած ճեպազրույցի ընթացքում: «Ցավոք սրտի, Հայաստանում ժողովրդավարության առաջխաղացման և Հայաստանում ժողովրդավարական հեղափոխությունից հետո Ադրբեջանը ավելի ագրեսիվ դարձավ, և այս ագրեսիան միայն Հայաստանի դեմ չի ուղղված, դա նաև ագրեսիայի է մեր տարածաշրջանում ժողովրդավարության դեմ», - ասաց Փաշինյանը: Նա նաև նշեց, որ ակնկալում է կառուցողական քննարկումներ և զրույցներ՝ անվտանգության օրակարգի շուրջ։ Լատվիայի նախագահ Ռայմոնդս Վեյոնիսի հետ հանդիպման ժամանակ էլ Նիկոլ Փաշինյանը մասնավորապես ասաց․ - «Ցավոք սրտի, վարչապետի պաշտոնը ստանձնելու առաջին իսկ օրերից ես տեսնում էի լարվածության աճ Լեռնային Ղարաբաղի հետ սահմանին, ինչպես նաև հայ-ադրբեջանական սահմանի երկայնքով»։ «Ես կցանկանայի շեշտել, որ ադրբեջանական ցանկացած հարձակում Հայաստանի դեմ ոչ միայն հարձակում է Հայաստանի դեմ, այլ նաև հարձակում է ժողովրդավարության դեմ։ Ես կարծում եմ, որ Ադրբեջանի նախագահը որոշակի մտահոգություններ ունի, որ ժողովրդավարական գործընթացները կարող են Հայաստանից տարածվել դեպի Ադրբեջան, և որքան հասկանում եմ՝ նրանք փորձում են աճեցնել լարվածությունը, որպեսզի կանխեն ժողովրդավարական ալիքի տեղաշարժը Հայաստանից Ադրբեջան», - շեշտեց Հայաստանի վարչապետը: «Եվ ես հույս ունեմ, որ միջազգային հանրությունը շատ ուժեղ ազդակ կհղի Բաքվին, որ մեր տարածաշրջանում իրավիճակը սրելու ցանկացած փորձ, պատերազմ սկսելու ցանկացած փորձ ուժեղ հակազդեցության կարժանանա միջազգային հանրության կողմից», - հայտարարեց Նիկոլ Փաշինյանը: Փաստացի, Փաշինյանի առաջին ուղերձը Բրյուսելում կոնկրետ է եղել՝ արեւմուտքի կողմից որոշակի պատասխանատվության կոչի առումով: Նա հստակ հասկացրել է, որ Ադրբեջանի կողմից վերջին ամիսների ագրեսիայի վրա Արեւմուտքը, կոպիտ ասած՝ «աչք է փակում»: Ի դեպ, ինչպես հայտնի է, որ երեկ Բրյուսելում հանդիպել են Հայաստանի եւ Ադրբեջանի ԱԳ նախարարները: Սա Զոհրաբ Մնացականյանի և Էլմար Մամեդյարովի միջև առաջին հանդիպումն էր` Հայաստանում ժողովրդավարական շարժման արդյունքում տեղի ունեցած իշխանափոխությունից և նոր կառավարության ձևավորումից հետո: Հայաստանի արտգործնախարարության լրատվության և հանրային դիվանագիտության վարչության հաղորդագրության համաձայն՝ հանդիպմանը ներկա էին ԵԱՀԿ Մինսկի խմբի համանախագահներ Իգոր Պոպովը, Ստեֆան Վիսկոնտին, Էնդրյու Շոֆերը և ԵԱՀԿ գործող նախագահի անձնական ներկայացուցիչ Անջեյ Կասպշիկը: Զոհրաբ Մնացականյանը շնորհակալություն է հայտնել ԵԱՀԿ Մինսկի խմբի համանախագահներին հանդիպումը կազմակերպելու համար և ընդգծել նրանց հովանու ներքո խաղաղության գործընթացի կարևորությունն ու բանակցային դինամիկայի պահպանման անհրաժեշտությունը: Հանդիպումը կրում էր ճանաչողական բնույթ և միտված էր միմյանց տեսակետների հետ ծանոթացմանը, ասված է հաղորդագրությունում: Մնացականյանն ընդգծել է, որ բանակցային գործընթացն այլընտրանք չունի, և այս համատեքստում կարևորել խաղաղությանը նպաստող մթնոլորտի ձևավորմանը, փոխվստահության ամրապնդմանը, լարվածության նվազեցմանն ուղղված քայլերը, զինադադարի անշեղ պահպանումն ու ագրեսիվ հռետորաբանությունից հրաժարվելը։ Նա շեշտել է, որ հակամարտության բոլոր կողմերի իրատեսական ու կառուցողական ներգրավվածությունն առաջնային նշանակություն ունի տևական խաղաղության հասնելու ջանքերի արդյունավետության համար: Հայտնի է, որ համանախագահները Հայաստանի ու Ադրբեջանի արտաքին գործերի նախարարներին ներկայացրել են իրենց առաջիկա ծրագրերը: Թե որոնք կլինեն ԵԱՀԿ Մինսկի խմբի համանախագահների հետագա քայլերը՝ ցույց կտա ժամանակը։ Պարզ է, որ նրանք կձգտեն սեղմ ժամկետներում Փաշինյան-Ալիև հանդիպում կազմակերպել: Բայց այստեղ հարց է, թե արդյոք Ադրբեջանը Հայաստանի նոր իշխանությունների հետ բարձր մակարդակով հանդիպման համաձայնություն կտա այս փուլում: Եթե նման պայմանավորվածություն ձեռք բերվի, ապա որոշակի հույս կա, որ բանակցային գործընթացի շարունակականությունն ապահովելով հնարավոր կլինի խուսափել պատերազմից: Իսկ եթե ոչ, ապա պատերազմն անխուսափելի է: ԱՄՆ-ի, Ֆրանսիայի ղեկավարների հետ ժպտացող Փաշինյանի բրյուսելյան ուղերձն իրականում Արցախում մեծ պատերազմը կանխելու կոչ էր եւ դրա բռնկման պատճառների մասին հստակ բացահայտում: Թամար Բագրատունի