20 ու ձիգ տարիները քիչ չեն մտածելու համար, ուղղվելու, փոխելու վարքագիծը. ցմահ դատապարտյալների բաց նամակը վարչապետին

Մեծարգո պարոն վարչապետ, հարգարժան պարոն Զեյնալյան, նախկին իշխանությունների օրոք շատ էր բարձրաձայնվում արդարության, արդարադատության ,《հանուն Հայաստանի հանրապետության》արձակված դատավճիռների արդարացիության և անկողմնակալության մասին, սակայն միայն Թավշյա հեղափոխությունից հետո մարդիկ սկսեցին խոսել "վերևից" ՝ Բաղրամյան 26 -ից դատարաններին իջեցված հրահանգների մասին: Անգամ Սահմանադրական դատարանի նախկին դատավոր Կիմ Բալայանը հայտարարեց ,որ նույնիսկ Ս.Դ-ն անզոր էր որևէ բան փոխելու: Եվ ըստ այդ հրահանգների՝ առկախված մնաց մոտ 30 ցմահ դատապարտյալների պայմանական վաղաժամկետ ազատելու հարցը: 20 և ավելի տարիներ անազատության մեջ գտնվող ցմահներին դատարանները մերժում էին պայմանական վաղաժամկետ ազատել, իսկ ավելի համարձակ դատավորները որոշումը հրապարակելուց հետո խոստովանում էին, որ ռեժիմից պետք է նեղանանք: Հիմա ենք հասկանում իրականությունը։ Անսխալ մարդ, ըստ մեզ, չկա. բոլորն էլ սխալվելու իրավունք ունեն։ Մենք էլ ենք սխալվել և հայտնվել անզատության մեջ, բայց 20 ու ձիգ տարիները քիչ չեն մտածելու համար, ուղղվելու, փոխելու վարքագիծը։ Կարծում ենք մի հանգամանքել պիտի հաշվի առնել, որ մենք հանցանք կատարել ենք բավականին երիտասարդ տարիքում, իսկ հիմա արդեն հասուն մարդիկ ենք՝ կյանքի տարբեր փորձություներով անցած: Ճաղավանդակներից ներս ` փոխվել է մեր հոգեվիճակը, մտածելակերպը։ Ինչու՞ հնարավորություն չտալ մեզ ` ինտեգրվելու հասարակությանը, լինել մեր ընտանիքներում, պիտանի լինել հայրենիքին։ Հարգելի պարոնայք Փաշինյան և Զեյնալյան, պայմանական վաղաժամկետ ազատման սպասող ցմահ դատապարտյալներիս հույսը Դուք եք։ Հայաստանում նոր քաղաքական իրավիճակ է , արդարադատություն ապահովող ատյաններն այսուհետ անկախ են և աշխատում են օրենքի տառին համապատասխան: Եվ ուրեմն խնդրում ենք՝ քայլ արեք ՝ մշակելու օրենսդրական մի նախագիծ, որով նոր հիմունքներով մեր գործերը կներկայացվեն նոր դատաքննության: Անհրաժեշտ է պայմաններ ստեղծել, որպեսզի սեղմ ժամկետներում դատարանները նորից քննեն մեր վաղաժամկետ ազատման դիմումներն արդեն օբյեկտիվ, անաչառ, առանց նախկին վերևից իջեցված հրահանգների։ Խնդրում ենք՝ մի կոտրեք արդարադատության հանդեպ ունեցած մեր հավատը, քայլ արեք ապացուցելու, որ Հայաստանում գործում է Սահմանադրությունը, որ երկրում իսկապես այլ տրամադրություն է և նոր իրավիճակ` իր բոլոր կողմերով։ Հույս ունենք, որ մեր առաջարկ-խնդրանքը չի մնա Ձեր օրակարգային սեղանին և սեղմ ժամկետում իր լուծումը կստանա։ Խորին Հարգանքներով !!!