Ով է սպասում Փաշինյանին Բրյուսելում ու ինչ փաթեթով
Հուլիսի 11-12-ը նախատեսված է Նիկոլ Փաշինյանի այցը Բրյուսել, որի շրջանակներում նա կհանդիպի Եվրոպական միության ղեկավարության հետ: Այս այցը կարևոր է այն առումով, որ Եվրոպական խորհրդարանի լիագումար նիստում քվեարկության է դրվելու ՀՀ-ԵՄ Համապարփակ և ընդլայնված գործընկերության համաձայնագրի սատարման բանաձևի և ՀՀ-ԵՄ հարաբերությունների վերաբերյալ հարակից բանաձևի նախագծերը։ Հայաստանում Եվրամիության պատվիրակության ղեկավար, դեսպան Պյոտր Սվիտալսկին վստահ է՝ երբ վարչապետ Փաշինյանն այցելի Բրյուսել, ԵՄ ղեկավարները նրան շատ ջերմ կընդունեն, այս մասին դեսպանն ասել է «Ազատությանը» տված հարցազրույցում: Առայժմ չի հրապարակայնացվում, թե կոնկրետ ում հետ կհանդիպի Փաշինյանը՝ Բրյուսելում. «Բայց շփումները ընթացքի մեջ են։ Վստահ եմ, որ երբ վարչապետն այցելի Բրյուսել, Եվրամիության ղեկավարները նրան շատ ջերմ կընդունեն: Սակայն ամեն ինչ պետք է քննարկվի և համաձայնեցվի դիվանագիտական խողովակների միջոցով։ Մի քանի առիթներով ԵՄ-ն մեծ աջակցություն է հայտնել նոր կառավարության մտադրությունների հանդեպ, մասնավորապես՝ կոռուպցիայի դեմ պայքարի, դատական համակարգի անկախության ամրապնդման, տնտեսության մեջ հավասար պայմանների ստեղծման, մարդու իրավունքների ամրապնդման և ազատ ու արդար ընտրությունների նախապատրաստման վերաբերյալ։ Մենք պատրաստ ենք աջակցել այն տեսքով, ինչ Հայաստանի կառավարությունը պատշաճ կհամարի», ասել է ԵՄ դեսպանը։ ԵՄ-ից արդեն մի քանի անգամ ակնարկել են, որ կարևորում է ընտրական գործընթացը. «Մենք այլ միջազգային դոնորների հետ քննարկում ենք, թե ինչպես կարող ենք օգտակար լինել այս գործընթացում։ Հուսով ենք, որ խորհրդարանում տարբեր քաղաքական խմբակցությունների միջև քննարկումների արդյունքում կձևավորվի Ընտրական օրենսգրքի բարեփոխման վերաբերյալ կոնսենսուս», ասել է Սվիտալսկին՝ հավելելով. «Միջազգային հանրությունը շատ կառուցողական տրամադրության մեջ է։ Հավատացած եմ, որ այս կառավարությունը ժողովրդի մեծ աջակցությունն է վայելում և արժանի է մեր աջակցությանը՝ բոլոր այն մտադրությունների ու ծրագրերի հարցում, որոնց ջատագովն այստեղ՝ Հայաստանում վերջին տարիներին եղել է Եվրամիությունը»։ Թե ինչ կոնկրետ արդյունքներ կարձանագրվեն Փաշինյանի բրյուսելյան այցի ընթացքում` կարելի կլինի դատել արդեն Բրյուսելում նրա հանդիպումներից ու այդ հանդիպումներում արված հայտարարությունների ենթատեքստերից: Ընդհանուր առմամբ, նկատելի է, որ ԵՄ-ն տրամադրված է աջակցել Փաշինյանի կառավարությանը, որն, ի դեպ, մի տեսակ, ավելի է կարևորում այս փուլում Մոսկվայի հետ հարաբերությունների հստակեցումը: Բայց նաև պետք է փաստել, որ ԵՄ-ին պետք են լինելու իրական բարեփոխումներ՝ գործնականում: Կախված այն բանից, թե ինչ պայմանավորվածություններ ձեռք կբերվեն Բրյուսելում՝ դրանք կարևոր են լինելու Փաշինյանի կառավարության ապագայի համար: Ինչպե՞ս կդրսևորի իրեն Փաշինյանը Բրյուսելում, ի՞նչ կկարևորեն նրա հետ հանդիպումներում, ի՞նչ կխոստանա Փաշինյանը Բրյուսելին և որ ավելի կարևոր է՝ ինչի՞ դիմաց... Այս հարցերի պատասխանները կնշմարվեն արդեն հաջորդ շաբաթ: Թամար Բագրատունի
Հետևեք մեզ Viber-ում
