«Ամենից շատ կկարոտեմ այստեղ տիրող մթնոլորտը». Նիկոլ Փաշինյանի որդին մեկնում է բանակ
Շենգավիթի զինկոմիսարիատում լրագրողների հետ զրույցում ՀՀ վարչապետ Նիկոլ Փաշինյանի որդին՝ Աշոտ Փաշինյանն ասաց,որ այստեղից միանգամից գնալու է Ղարաբաղ։ «Կարծում եմ՝ Ղարաբաղում վիճակահանության կմասնակցեմ»: Աշոտ Փաշինյանը որոշել է ինքնակամ դիմում գրել ու ծառայությունն անցնել Արցախի Հանրապետությունում։ Լրագրողները հետաքրքրվեցին՝ ստացե՞լ է դիմումի պատասխանը։ Նա ասաց, որ դիմումի պատասխանը չի ստացել, բայց գիտի, որ չեն մերժել։ Վարչապետի որդին նշեց, որ ծառայության ընթացքում կկարոտի այստեղ տիրող մթնոլորտը։ Հարցին՝ քաղաքացիական անհնազանդությամբ էր միշտ աչքի ընկնում, հնարավո՞ր է բանակում ինչ-որ բան չհավանի և այնտեղ էլ անհնազանդություն ցուցաբերի, նա այսպես պատասխանեց. «Չեմ կարծում, ինձ թվում է՝ բանակն այն տեղը չէ, որտեղ կարելի է նման գործողություններ անել»։ Նա նշեց, որ տրամադրությունը բարձր է և շտապեց նստել զինվորական ավտոբուս, որը նորակոչիկներին եկեղեցի էր տանում։ Մայրը՝ Աննա Հակոբյանը նշեց, որ այսօր առավոտյան որդուն 3 խորհուրդ է տվել ու ասել, որ ամենակարեւորը միջանձնային հարաբերություններում հանգիստ լինելն է: Նա նշեց, որ որդին սննդի հարցում այնքան էլ քմահաճ չէ, եւ չի կարծում, որ բանակային սննդի հետ կապված որեւէ խնդիր կունենա: Նա իր որդուն ու մյուսներին բարի ծառայություն ու բարի վերադարձ մաղթեց:
Հետևեք մեզ Viber-ում
