«Գրանդ Հոլդինգ»-ում տղամարդուն աշխատանքից ազատել են՝ չվճարելով 1.5 մլն դրամ աշխատավարձը և սպառնացել՝ նրանով կզբաղվի Կարեն Գրիգորյանը

«Գրանդ Հոլդինգի» նախկին աշխատակիցն ահազանգում է. 1,5 մլն իրեն չեն վճարել և հեռացրել են աշխատանքից: «Փաստինֆո»-ի տեղեկություններով, տղամարդն աշխատել է «Գրանդ Հոլդինգ»-ի Արմավիրի մարզի արտադրամասում, իրեն բարձր աշխատավարձ են խոստացել, ամիսներ շարունակ աշխատել է, սակայն երբ բարձրաձայնել է, որ արտաժամյա աշխատանքի դիմաց իրեն չեն վարձատրում, որն, ի դեպ, կազմել է 1,5 մլն դրամ, դա որպես թշնամանք է ընկալվել և նրան հեռացրել են աշխատանքից: Միևնույն ժամանակ, ըստ նույն տեղեկությունների, տղամարդուն սպառնացել են, թե բողոքելու դեպքում իրենով կզբաղվի Էջմիածնի արդեն իսկ նախկին քաղաքապետ Կարեն Գրիգորյանը, ով հանդիսանում է ԱԺ պատգամավոր Մանվել Գրիգորյանի որդին: Ի դեպ նշենք, որ Կարեն Գրիգորյանին մեղադրանք է առաջադրվել հոր՝ Մանվել Գրիգորյանի և մի շարք այլ անձանց հետ նախնական համաձայնությամբ, խմբով, յուրացման եղանակով առանձնապես խոշոր չափերով գույքի հափշտակության համար: