Միտինգներ են անում, քոչարի են պարում՝ դրանք ժամանակ շահելու համար է․ Ամուլսարի խնդիրն ավելի խորքային է․ Հրանտ Բագրատյան

ՀՀ նախկին վարչապետ Հրանտ Բագրատյանը վստահեցնում է՝ իր պաշտոնավարման ընթացքում երբեք հանքերի գործարկման հետ կապված ակցիաներ չեն եղել։ Մասնավորապես, խոսելով Ամուլսարի հանքարդյունաբերության մասին` Հրանտ Բագրատյանը NEWSPRESS.am-ի հետ զրույցում նկատում է, որ այնտեղ «Լիդիան Արմենիա»-ի կողմից բարձրաձայնված 400 մլն ներդրումը կատարվել է հետագայում այն կրկնապատկելու ակնկալիքով։ Հրանտ Բագրատյանը վստահ էլ չէ, որ հենց 400 մլն է ներդրվել։ «Հնարավոր է` ավելի քիչ է դրել, ասում է` 400, և հետո, շատ հնարավոր է նաև, որ նա, օրինակ, աշխատավարձն էլ է ներդրում համարում, քանի որ ներդրրումը կարող է լինել նաև այդ տեսքով»,- ասում է Բագրատյանը։ Սա մի կողմից, մյուս կողմից էլ կա նաև էկոլոգիական խնդիր․ կան վնասներ և դրանք չեն չեզոքացվում։ «Սովորաբար, հանքը շահագործելիս՝ հասարակության ստացած օգուտը պետք է լինի բավարար՝ բնությունը վերականգնելու համար»,- ասում է նախկին վարչապետն ու հավելում, որ չկա օրենսդրություն, թե որքան պետք է օգուտ ստանա պետությունը և որքան կարող է ներդրվել բնությունը վերականգնելու համար։ Նրա որակմամբ՝ երկու տարի միայն անիմաստ խոսում են՝ համապատասխան օրենք ընդունելու և խնդիրն այս դաշտում կարգավորելու փոխարեն։ «Պետք է կանգնել ժողովրդի առաջ և ասել, որ աղտոտում չի լինի, ձորի էկոլոգիան չի կորի և տեղանքը կվերականգնվի: Եթե այս ամենը չկա, և «Լիդիան»-ը ոչ մի փաստարկ չի բերում, թե, օրինակ, ի՞նչ արժե 1 հա մաքուր անտառը, ապա ինչի՞ մասին է խոսքը»,- ասում է Հրանտ Բագրատյանը։ Նա նկատում է, որ Ամուլսարի հետևում կանգնած է եղել գործող նախագահ Արմեն Սարգսյանը, ով ինքն է հայտարարել, որ վաճառել է այդ ամենը։ «Չեմ հասկանում, թե պետական հանքը ո՞նց կարող էր վաճառել: Միտինգներ են անում, գնում է ակտիվիստների հետ քոչարի է պարում, ժպտում դեմքներին․․․ դրանք սուտ են, հասարակության ուշադրությունը շեղելու համար են։ Խնդիրը շատ խորն է․ էկոլոգիան, բնությունը, ջուրը թունավորվում են»,- ասում է Հրանտ Բագրատյանն ու վստահեցնում, որ խնդիրն արագորեն պետք է լուծվի և ոչ թե պետք է դադարներ տալ, ու նորից ընդհատվի խնդրի հանգուցալուծումը։ Նա նկատում է, որ խնդրի լուծումը դժվար է․ վարչապետ Փաշինյանը գործ ունի մի կողմից ժողովրդի դժգոհության, վտանգվող էկոլոգիայի, մյուս կողմից էլ՝ արտաքին ուժերի հետ, բայց ամեն դեպքում հույս է հայտնում, որ Փաշինյանին կհաջողվի գլուխ հանել այս ամենից։