Մեծ պատերազմի փոքր ռեպետիցիան

Երեկվանից մինչև հուլիսի 6-ը Ադրբեջանի Զինված ուժերը 20 հազար զինծառայողների ներգրավմամբ զորավարժություններ են անցկացնում: «Լայնամասշտաբ զորավարժություններ՝ բանակի տարբեր զորատեսակների, զորամիավորումների, հատուկ զորքերի ներգրավմամբ», հաղորդում են ադրբեջանական լրատվական գործակալությունները՝ վկայակոչելով Ադրբեջանի պաշտպանության նախարարության մամուլի ծառայությունը: Զորավարժություններին, որոնք անցկացվում են երկրի նախագահ Իլհամ Ալիևի հաստատած պլանով և կշարունակվեն մինչև հուլիսի 6-ը, մասնակցում է մինչև 20 հազար զինծառայող, ներգրավված է 120 տանկ և այլ զրահատեխնիկա, տարբեր տրամաչափերի ավելի քան 200 հրթիռահրետանային կայանք, համազարկային կրակի ռեակտիվ համակարգ և ականանետ, 30 միավոր ավիացիա: Զորավարժությունների սցենարով նախատեսված է, մասնավորապես՝ «օկուպացված տարածքների ազատագրման նպատակով լայնամասշտաբ հարձակողական գործողության անցկացում», ասվում է տարածած հաղորդագրությունում: Այսինքն, Բաքուն լայնամասշտաբ հարձակվողական գործողություններ է անցկացնում, զորավարժությունների ընթացքում կկիրառվի նաև մարտական կրակ: Սա ոչ այլ ինչ է, եթե ոչ մեծ պատերազմի փոքր նախապատրաստություն, այսպես ասած՝ լայնածավալ ռազմական գործողություններ սկսելու ռեպետիցիա: Ըստ ամենայնի Բաքուն ծրագրում է մի քանի ուղղություններով հարված հասցնել՝ հարմար պահի: Ե՞րբ կլինի այդ պահը... Սա հարց է, որի պատասխանն այս պահին գուցե Ալիևն ինքն էլ ճշգրիտ չգիտի: Այդ հարցի պատասխանը կախված է նրանից, թե Ալիևը երբ կստանա «դաբրո»: Հարցը, թե՝ ումի՞ց, ավելի քան հստակ է: Դատելով ռուսների մասնակցությամբ սառնասրտորեն ռազմավարական դաշնակից Հայաստանի հակառակորդի պրոպագանդային ողջ ուժով լծվելու քաղաքականությանը՝ պետք է արձանագրել, որ Մոսկվան էլ կամաց-կամաց նախապատրաստում է թե՛ Ռուսաստանին, թե՛ Հայաստանին ծանր շրջադարձի ղարաբաղյան ճակատում: Մետաքսյա Շալունց