Օրենքը խախտողը պիտի պատժվի․ մի անգամ պետք է լինի դատավճիռ

«Առավոտ» թերթի առաջնորդողը գրում է․ «Հանցագործությունները անպատիժ չպիտի մնան ոչ այն պատճառով, որ մենք չենք սիրում այս կամ այն մարդուն ու ցանկանում ենք նրան ցավ պատճառել: Դա սխալ շարժառիթ է: Օրենքի խախտումները չպիտի անպատիժ մնան, որպեսզի հետագայում դրանք չկրկնվեն: Առավել ևս՝ այնպիսի ոճրագործությունների դեպքում, ինչպիսին «Մարտի 1»-ն է: Որ այդ սպանդի համար պետք է պատասխան տա նախևառաջ երկրորդ նախագահ Ռոբերտ Քոչարյանը՝ ես չեմ կասկածում: Բայց եթե անկեղծ լինենք, այն, ինչ հայտարարել է Հատուկ քննչական ծառայությունը, առայժմ բավարար չէ, և ավելին՝ պարունակում է ավելորդ քաղաքական տարրեր: Օրինակ՝ «Միքայել Հարությունյանը 2008 թվականի փետրվարի 23-ին ստորագրել է հույժ գաղտնի թիվ 0038 ակնհայտ ապօրինի հրամանը»՝ հրամանի նման բնութագիրը, հավանաբար, ճիշտ է, բայց իրավապահ մարմնի բառապաշարում չպիտի լինի` պետք է հստակ նշվեն օրենքների այն կետերը, որոնց այդ հրամանագիրը հակասում է: ՀՔԾ-ի հայտարարության մեջ ասվում է նաև, որ Մարտի 1-ի իրադարձությունների հետևանքով «էական վնաս է հասցվել Հայաստանի Հանրապետության միջազգային վարկին»: Դա էլ է բացարձակ ճշմարտություն, բայց հարց է առաջանում՝ ինչո՞ւ է երկրի միջազգային վարկը հուզում Հատուկ քննչական ծառայությանը, որն, ինձ թվում է, պետք է խոսի չոր իրավական լեզվով: Այդ ամենով հանդերձ՝ «Մարտի 1-ի» գործը պետք էր վերաբացել, և բոլոր մեղավորները պետք է պատժվեն նախևառաջ ապագան նկատի ունենալով. այս պահից սկսած ոչ մի նախագահ, ոչ մի վարչապետ, պաշտպանության ոչ մի նախարար ու ոչ մի ոստիկանապետ գայթակղություն չպիտի ունենա ոստիկանությունը և առավել ևս՝ բանակն օգտագործել քաղաքական խնդիրները լուծելու համար: «Հայաստան» համահայկական հիմնադրամի գործադիր տնօրենը, որը, ճիշտն ասած, առաջին հայացքից խաղամոլի և գանձագողի տպավորություն չէր թողնում, պետք է պատժվի ոչ միայն նրա համար, որ ոչ ոք այլևս չհամարձակվի անձնական նպատակներով օգտագործել (թեկուզև` ժամանակավորապես) ուրիշի փողերը, այլև այն պատճառով, որ արտերկրում մեր եղբայրները համոզվեն, որ այսուհետ իրենց նվիրաբերած գումարները կհայտնվեն հուսալի ձեռքերում: Եթե մեր օլիգարխներն ու նրանց «ախրաննիկները» շարունակեն մարդ ծեծել, իսկ հետո կաշառեն, վախեցնեն և շանտաժեն տուժածներին, ապա վաղը դա նորից տեղի կունենա, և ոչ մեկը այդ «լա-ա-ավ տղու» վարքից չի ցանկանա հրաժարվել: Մի անգամ պետք է լինի դատավճիռ, թեկուզև մեղմ, և դրանից հետո օլիգարխները կդադարեն մեզ` հասարակ մահկանացուներիս, վերևից նայել»: Ամբողջությամբ՝ թերթի այսօրվա համարում։