Արմեն Սարգսյանի «շախն ու մատը»՝ Նիկոլ Փաշինյանին

Ինչպես հայտնի է, Հայաստանի նախագահ Արմեն Սարգսյանը Միացյալ Նահանգներում է եռօրյա այցով: Հունիսի 26-ին նա մասնակցել է Կոնգրեսում անցկացված ընդունելությանը, որը նվիրված էր Հայաստանի Առաջին Հանրապետության 100-ամյակին: Երեկ տեղի է ունեցել խիստ կարևոր իրադարձություն. Վաշինգտոնում կայացել է Հայաստանի նախագահ Արմեն Սարգսյանի հանդիպումը ԱՄՆ պետքարտուղար Մայք Փոմփեոյի հետ: Ջերմ ու անմիջական մթնոլորտում կայացած զրույցի ընթացքում նախագահ Սարգսյանն ասել է, որ Հայաստանը կարևորում է հայ-ամերիկյան գործընկերության հետևողական զարգացումը և պետքարտուղարին ներկայացրել է «նոր Հայաստանի» պատրաստակամությունը` շարունակելու ամրապնդել հարաբերությունները Միացյալ Նահանգների հետ, ասվում է ՀՀ նախագահի աշխատակազմի հասարակայնության և տեղեկատվության միջոցների հետ կապերի վարչության տարածած հաղորդագրությունում: «Հանդիպման ընթացքում նախատեսվում է քննարկել Միացյալ Նահանգների հետ առևտրի և ներդրումների ավելացումը, ինչպես նաև Սմիթսոնիան փառատոնը: Նախագահը նաև կիսելու է պետքարտուղարի հետ Հայաստանի նոր շրջանի իր տեսլականը», - «Ամերիկայի Ձայն»-ի հետ զրույցում նշել է Հայաստանում ԱՄՆ-ի դեսպան Ռիչարդ Միլզը: «Ամերիկայի Ձայն»-ի այն հարցին, թե ինչո՞ւ է Միացյալ Նահանգների բարձրաստիճան պաշտոնյան «թավշյա հեղափոխությունից» հետո իր առաջին հանդիպումն անց կացնում նախագահ Սարգսյանի հետ, մինչդեռ, Երևանի արտաքին քաղաքականությունն ըստ Սահմանադրության իրականացնում է վարչապետ Փաշինյանի կառավարությունը, դեսպան Միլզը պատասխանել է. «Կարծում եմ, երկրի ղեկավարի համար տեղին է հնարավորություն ունենալ հանդիպել պետքարտուղարի հետ: Տեղյակ եմ, որ պետքարտուղարը շատ էր ցանկանում լսել, թե ի՞նչ է տեղի ունեցել Հայաստանում և խոսել այն մասին, թե ինչպես Միացյալ Նահանգները կարող է աջակցել Հայաստանին: Մասնավորապես, կարծում եմ, խոսքը գնացել է առևտրի և ներդրումների մասին, ինչով, որքան հասկանում եմ, նախագահին իր սահմանադրական դերում խնդրել էին զբաղվել՝ արտաքին ներդրումներ հայթայթելով և աշխատելով Սփյուռքի հետ»: Դեսպանի խոսքով, Միացյալ Նահանգները պատրաստ է աջակցել Հայաստանի նոր կառավարությանը նոր ներդրումներ գտնելու գործում: Հիմնական աշխատանքն այս ոլորտում Ռիչարդ Միլզի խոսքով կառավարությունն արդեն անում է պայքարելով երկրում կոռուպցիայի դեմ և ստեղծելով արդար դաշտ բոլոր գործարարների համար: «Անցած երեք տարիների ընթացքում ԱՄՆ-ի ու նաև Հայաստանի գործարարներից ես բազմիցս լսել եմ, որ երկրում գործարարության զարգացման հիմնական խոչընդոտը Հայաստանում արդար խաղի կանոնների բացակայությունն է, և որ համակարգը որոշ մարդկանց առավելություններ էր տալիս»: Հայաստանի նոր կառավարության կողմից կոռուպցիայի դեմ կոշտ պայքարն, ըստ դեսպանի, ուժեղ և դրական ազդանշան է գործարարների համար, սակայն, տևական փոփոխությունների համար անհրաժեշտ է ապահովել օրենքների և դրանք պահպանող կառույցների հզորությունը: Այս առումով Ռիչարդ Միլզը կարևորում է նաև Հայաստանում ազատ և թափանցիկ խորհրդարանական ընտրությունների անցկացումը: Անդրադառնալով գարնանը Հայաստանում տեղի ունեցած «թավշյա հեղափոխությանը»՝ ԱՄՆ-ի դեսպանն ընդգծել է՝ ամենակարևորը, որ դա հայ ժողովրդի ինքնուրույն որոշումն էր. «Դա հայեր էին, ովքեր դուրս եկան փողոց՝ պահանջելով ավելի թափանցիկ և արդարացի հասարակություն: Այդ խաղաղ պահանջը շատ տպավորիչ էր: Պետք է նշեմ, որ սա լիարժեք հայ ժողովրդի քայլն էր: Կարծում եմ, այն հնարավոր եղավ նաև, որովհետև ԱՄՆ-ի և Հայաստանի վերջին 20 տարիների համագործակցության արդյունքում զարգացան և հզորացան հենց այն ձայները, որոնք աջակցում էին թափանցիկությունն ու հաշվետվությունը»: Այսպես, երեկ տեղի է ունեցել մի իրադարձություն, որը Հայաստանում նախագահի ու վարչապետի միջև ազդեցության ու կշռի տարբերության առկայության մասին է վկայում: Արմեն Սարգսյանին ԱՄՆ պետքարտուղար է ընդունել, նշենք, որ սա կարելի է ՀՀ նոր իշխանության համար բացառիկ փաստ համարել, որովհետև անգամ Ռուսաստանի ղեկավարությունը այս ամիսների ընթացքում մեծ դժվարությամբ է կարողանում շփումների մեջ մտնել ամերիկյան վարչակազմի ներկայացուցիչների հետ: Բացի այդ, եթե Նիկոլ Փաշինյանն, այսպես ասած՝ ռուսական ծիրում է, արդեն երկու անգամ հասցրել է հանդիպել Պուտինին ու նա և իր թիմը ողջ ուժով լծված են Մոսկվային դուր գալու ժեստեր անելու գործին՝ Արմեն Սարգսյանը, կարծես, հավասարը-հավասարի հետ ԱՄՆ բարձրաստիճան պաշտոնյայի ուշադրությանն արժանանում: Պետք է գիտակցել, որ այս հանդիպումը վստահաբար երկուստեք հետաքրքրության շրջանակում է եղել, այլապես չէր կայանա, ու հետևաբար, պետք է արձանագրել, որ Հայաստանի նախագահն, այս քայլով, ոչ միայն հավասարակշռել է Նիկոլ Փաշինյանի՝ Պուտինյան Ռուսաստանի դուր գալու քաղաքականությանը, այլև, մյուս կողմից, ընդգծել է իր հեղինակության ու ազդեցության գերակշռումը՝ Փաշինյանի նկատմամբ: Թամար Բագրատունի