Ռուբեն Հայրապետյանի ճակատագիրը Նիկոլ Փաշինյանի ձեռքերում

Կրկին մեծ աղմուկ է բարձրացել ՀՖՖ նախագահ Ռուբեն Հայրապետյանի շուրջ: Հունիսի 30-ին նշանակված էր ՀՖՖ 16-րդ տարեկան ժողովը, որն անցկացվեց Սևանի «Հարսնաքար» հյուրանոցային համալիրում, որը պատկանում է Ռուբեն Հայրապտյանին: Եւ հանրության մի շերտ, որը վերջին տարիներին դժգոհ է Ռուբեն Հայրապետյանի նախագահությունից ու վստահ է, որ ազգային հավաքականի գրեթե չգոյությունը պայմանավորված է հենց Հայրապետյանի անձով ու նրա հաստատած բարքերով, որի մասին մամուլը տարիներ շարունակ բարձրաձայնել է, ակնկալում էր, որ թավշյա հեղափոխությունը կանցնի նաեւ ՀՖՖ-ով ու հրաժարական կներկայացնի նաեւ Հայրապետյանը, սակայն դա տեղի չունեցավ, դրա փոխարեն ՀՖՖ նախագահը իր կարճ ելույթում պնդել է, թե միայն իրեն է տեսնում այդ պաշտոնում: Հայրապետյանը նշել է նաեւ, որ ՀՖՖ նախագահ չի դառնա միայն այն դեպքում, եթե ֆուտբոլային հանրությունը չցանկանա դա: Ապա հավելել․ «Ի՞նչ ա նշանակում՝ ֆեդերացիայի նախագահ ես ընտրվում և ֆուտբոլային հանրության ցանկությունը չկա։ Ուղղակի ծիծաղելի է։ Կամ ձեզ թվում է՝ ես էդքան կառչա՞ծ եմ ֆեդերացիայի նախագահի պաշտոնից, ամեն գնով պիտի ասեմ՝ գիտե՞ք ինչ, ժողովուրդն ինձ չի ուզում, բայց ես պարտադիր պիտի մնամ։ Չարաչար սխալվում եք, հաստատ տենց չի»։Հիշեցմանը, որ երկրպագուները բազմաթիվ ակցիաներ են կազմակերպել իր հրաժարականի պահանջով, Հայրապետյանն արձագանքեց՝ շատ լավ գիտի ակցիաների կազմակերպիչներին ու վստահ է, որ նրանք մեծամասնություն չեն կազմում․ «Էդ երկրպագուները նորմալ, ազնիվ տղերք են։ Նրանց միջից մի երկու հոգու հրահրեցին, տենց սարքեցին։ Իհարկե, եթե երկրպագուները չուզեն, գնալու եմ»: Ռուբեն Հայրապետյանը ֆեդերացիան ղեկավարում է 2002 թվականից: Հիշեցնենք, որ օրեր առաջ վարչապետ Նիկոլ Փաշինյանն իր պաշտոնական ֆեյսբուքյան էջում կազմակերպված հարցուպատասխանի ժամանակ անդրադարձել էր Ֆուտբոլի ֆեդերացիայի նախագահի ընտրության հարցին, նշելով՝ հույս ունի, որ կկայանա այնպիսի ընտրություն, որը և՛ ֆուտբոլասերների, և՛ ֆեդերացիայի սրտով կլինի: Մեկնաբանելով վարչապետի հայտարարությունը ՀՖՖ նախագահը միայն ասել է, թե համակարծիք է վարչապետի հետ: Ենթադրվում էր, որ տարեկան ժողովի օր Ռուբեն Հայրապետյանը կնախաձեռնի նաեւ ՀՖՖ նախագահի արտահերթ ընտրություն եւ կշարունակի իր իշխանությունը, սակայն նա չգնաց այդ ռիսկին: Խնդիրն այն է, որ ֆեդերացիայում նախագահի ու գործադիր կոմիտեի ընտրություններ պետք է լինեն մինչեւ 2019 թ. փետրվար ամիսը: Գործող նախագահի ու գործադիր կոմիտեի պաշտոնավարման ժամկետը, որը 4 տարի է, լրանում է 2019-ի հունիսին, սակայն արտահերթ ընտրություններ պետք է լինեն, որովհետեւ մինչեւ 2019-ի փետրվար ՀՖՖ-ն պետք է իրավաբանական անձանց միությունից (ԻԱՄ) վերակազմավորվի հասարակական կազմակերպության (ՀԿ).«Ֆուտբոլային վայ մասնագետներն ասում էին, որ այսօր տեղի է ունենալու ՀՖՖ նախագահի ընտրություններ: Ես հայտարարում եմ, որ նման բան չկա: Ամեն ինչ տեղի է ունենալու ՀՖՖ-ի կանոնադրությանը համապատասխան: Ժողովը վարելու լիազորություններս հանձնում եմ Արմեն Մինասյանին: Ես հարգելի պատճառով պետք է գնամ» – ասել է նա ու հեռացել ժողովից, որից հետո յուրայիններն արել են իրենց սեւ գործը: «Շիրակ», «Միկա», «Ուլիս», «Արմավիր», «Ֆուրման Աբրահամյան», «Հայ-Արի», «Էսթեղլալ Կոտայք», «Զվարթնոց ՀԱՈւ» ֆուտբոլային ակումբները զրկվել են ՀՖՖ անդամությունից: Ժողովի մասնակից անդամները՝ թվով 24 անդամ, միաձայն կողմ են քվեարկել նշված ակումբների անդամությունից զրկելուն: Լրատվամիջոցները տեղեկություններ հրապարակեցին, որ 47 պատվիրակներից Սևան են ժամանել միայն 16-17-ը. Հայրապետյանը քվորումն ապահովել է արհեստականորեն` կողմնակի մարդկանց ներկայությամբ: Ավելին, ոչ լեգիտիմ ժողովը որոշում է ընդունել նաեւ, որ ՀՖՖ նախագահի ընտրությունը պետք է անցկացնել փետրվարին: Սա նշանակում է, որ Ռուբեն Հայրապետյանը չի պատրաստվում հանձնվել ու հիմիկվանից ՀՖՖ-ն վերաձեւում է իր վրայով՝ դուրս մղելով ոչ յուրայիններին, որպեսզի ամիսներ հետո սահուն ընտրություններ կազմակերպի եւ ինչպես վարչապետն է ասում, լինի ֆեդերացիայի սրտով: Հայրապետյանը չի շտապում նախագահի արտահերթ ընտրություն անցկացնել՝ գուցե հույս ունենալով, որ կկարողանա Նիկոլ Փաշինյանի հետ լեզու գտնել ու շարունակել իր իշխանությունը ֆուտբոլի ֆեդերացիայում: Կլինի արդյոք այդ ընտրությունը հանրության սրտով, դա թերեւս պայմանավորված է այն հանգամանքով, թե ինչպես Փաշինյանը կարձագանքի Սեւանում տեղի ունեցած ժողովին, որը ըստ լրատվամիջոցների՝ անց են կացել ակնհայտ խախտումներով: Անի Սահակյան