Նոր դավաճանություն Մոսկվայից՝ Արցախի ուղղությամբ

Ռուսաստանի Պետդումայի խոսնակ Վյաչեսլավ Վոլոդինը Բաքվում նախօրեին ուշագրավ հայտարարությամբ է հանդես եկել՝ Ադրբեջանի դիրքորոշումը Լեռնային Ղարաբաղի հակամարտության կարգավորման հարցում որակելով՝ «միշտ կառուցողական և ճիշտ»: «Դուք գիտեք, որ Ռուսաստանը հանդես է գալիս հակամարտության խաղաղ կարգավորման օգտին, հետևաբար՝ անենք ամեն ինչ այդ ուղղությամբ և ելնենք նրանից, որ բոլոր նրանք, ովքեր հանդես են գալիս հարաբերությունների սրման օգտին, բոլոր նրանք, ովքեր ունկնդիր չեն լինում խաղաղ ապրելու՝ ժողովրդի բառերին և ցանկությանը, անշուշտ, գնում են լարվածության ճանապարհով: Մենք պետք է անենք ամեն ինչ՝ կանխելու համար այդ ճանապարհը», ասել է Վոլոդինը Բաքվում Ադրբեջանի խորհրդարանի խոսնակ Օքթայ Ասադովի հետ հանդիպման ընթացքում: «Այդ կապակցությամբ Ադրբեջանը մշտապես ճիշտ և կառուցողական դիրքորոշում է ունեցել: Մենք դրա հույսն ունենք նաև հետագայում», ասել է Պետդումայի խոսնակը: Բաքվում, արվել է հայտարարություն, որից ընդամենը մեկ շաբաթ առաջ Ադրբեջանի պաշտպանության նախարարը հանդես է եկել ռազմաշունչ հայտարարություններով, մասնավորապես, նշելով, թե իրենց նպատակն է՝ նախապատրաստել բանակը պատերազմի համար, և «այսօր ադրբեջանական բանակն արդեն պատրաստ է ազատագրել օկուպացված տարածքները»: Ի դեպ, հայտնի է, որ Վոլոդինը Ռուսաստանի նախագահ Պուտինի ամենաազդեցիկ թիմակիցներից է։ Նա երկօրյա այցով գտնվում էր Ադրբեջանում, հանդիպել է Ադրբեջանի նախագահ Իլհամ Ալիևի հետ։ Հայաստանի արտգործնախարարության մամուլի քարտուղար Տիգրան Բալայանը Պետդումայի նախագահի հիշյալ հայտարարության հետ կապված՝ «Ազատությանն» ասել է․ «Պետությունների դիրքորոշումներն այս կամ այն հարցի, հատկապես արտաքին քաղաքական խնդիրների վերաբերյալ, արտահայտվում են գործադիր իշխանության ներկայացուցիչների կողմից: Ռուսաստանի գործադիր իշխանության տեսակետը ԼՂ հարցի հետ կապված հայտնի է: Այն առնվազն շաբաթը մեկ անգամ հնչեցվում է ՌԴ արտգործնախարարության պաշտոնական ներկայացուցչի կողմից»: Հայաստանի ԱԳՆ-ն, տարիներ շարունակ լծված է ռուս պաշտոնյաների ու ռուս լրագրողների «կիքսերը» խմբագրելով... Բայց արդյոք դրանք շարունակական «կիքսե՞ր» են: Եթե ռուս պաշտոնյան Բաքվում «գլուխը կախ» լսում է, թե ինչպես է ադրբեջանցի գործընկերը քննադատում ԵԱՀԿ Մինսկի խմբին, որի համանախագահն է նաև Ռուսաստանը ու գումարած դրան նաև իր կողմից «կրակի վրա» բենզին է լցնում՝ Ադրբեջանի «կառուցողականության» մասին բարբաջում՝ արդյոք սա ընդամենը թեթև ու հերթական բացթողո՞ւմ է: Երբ ռուս պաշտոնյայի ներկայությամբ Ադրբեջանի խորհրդարանի ղեկավար Օքթայ Ասադովը ասում է, թե՝ «ցավոք սրտի ԵԱՀԿ Մինսկի խումբը հակամարտության կարգավորման հարցում որևէ առաջընթաց չի արձանագրել», և որ «Ադրբեջանի առաջնահերթ խնդիրը երկրի տարածքային ամբողջականության վերականգնումն է», ու ոչ մի խոսք չի հնչում խաղաղ բանակցությունների անհրաժեշտության մասին, Ադրբեջանի կողմից ռազմատենչ քաղաքականությանը վերջ տալու մասին, սա մտորելու առիթ է: Գուցե Բաքուն Մոսկվայի «դաբրո»-ով հերթական ռազմական գործողություննե՞ր էլ է նախապատրաստում... Թամար Բագրատունի