Հայկ Խանումյանը և Ժաննա Գալստյանը կհանդիպեն. ԱՀ ԱԺ էթիկայի հանձնաժողովի նախագահ

Այն, ինչ տեղի է ունեցել ընթացիկ տարվա հունիսի 28-ին խորհրդարանում լիագումար նիստի ժամանակ ոչ միայն տհաճ էր, այլև անընդունելի: Այս մասին այսօր՝ հունիսի 30-ին, խորհրդարանում տեղի ունեցած էթիկայի ժամանակավոր հանձնաժողովի նիստից հետո լրագրողների հետ հանդիպմանն ասել է հանձնաժողովի նախագահ Արթուր Թովմասյանը: «Արցախպրես»-ի հաղորդմամբ՝ ներկայացնելով տարվող աշխատանքները՝ Ա. Թովմասյանն ասել է, միջադեպի առնչությամբ նյութերի հավաքագրման գործընթացն ավարտվել է քիչ առաջ: «Էթիկայի ժամանակավոր հանձնաժողովն ունի իր լիազորությունների շրջանակը, և մենք պետք է կայացնենք որոշում մեր երկու գործընկերների նկատմամբ, որը, իհարկե, դժվար է»,- նշել է Ա. Թովմասյանը՝ հավելելով, որ ինքը հանձնաժողովի անդամներին առաջարկել է հավաքագրված նյութերը հնարավորություն տալ ծանոթանալու անկախ փորձագետի և հաշվի առնելու նրանց մասնագիտական կարծիքը: Ա. Թովմասյանը նշել է նաև, որ հանդիպում է նախատեսվում հանձնաժողովի և Հայկ Խանումյանի ու Ժաննա Գալստյանի հետ: Անդրադառնալով սոցիալական ցանցերում միջադեպի հետ կապված ամենաշատը քննարկվող պատգամավոր Գալստյանի կողմից արտահայտած «գյալմա» (եկվոր) բառին՝ ԱԺ էթիկայի ժամանակավոր հանձնաժողովի նախագահը նշել է, որ դեռևս 1988 թվականի շարժման ակունքներում միասնական հայրենիք ունենալու գաղափարն էր և անկախ հանգամանքներից մենք ունենք մեկ հայրենիք, որը ոչ ոք կասկածի տակ դնել չի կարող: