Սիրիայի և Խորհրդային Միության հերոսն ապրում է իբրև փախստական

Ստամբուլի Ֆաթիհ թաղամասում, երկու սենյականոց բնակարանում, իր բազմանդամ ընտանիքի հետ ապրող Մուհամեդ Ֆարիսին այդ թաղամասում ոչ բոլորն էլ ճանաչում: «Արևելքը» գրում է, որ ամեն օր նա դուրս է գալիս տնից՝ գնումներ կատարելու իր վեց հոգուց բաղկացած ընտանիքի համար, և փողոցում նրան տեսնողները չգիտեն, որ 65-ամյա այդ տղամարդը հերոսի կոչում ունի, և որ նրա անունով Սիրիայում փողոցներ և օդանավակայաններ են կոչել: Նա Սիրիայի առաջին տիեզերագնաց Մուհամեդ Ֆարիսն է, որ Ստամբուլի այդ թաղամասում ապրում է իբրև փախստական: Սիրիայի պատերազմի առաջին տարիներին, լքելով սիրիական բանակի շարքերն ու իր աջակցությունը հայտնելով ընդդիմադիրներին, Ֆարիսը հեռացել է Սիրիայից:  Թուրքական մամուլին տված հարցազրույցում Ֆարիսն ասել է, որ ոտքով է հատել սահմանը: «Ընտրութեան հարց էր, փոխանակ այնտեղ ապրեի իբրև «հերոս» և տեսնեի իմ ժողովրդի տառապանքը՝ նախընտրեցի  ապրել աքսորի դժվար պայմաններում, բայց՝ պատվով»,-ասել է Սիրիայի հերոսի կոչումին արժանացած Մուհամեդ Ֆարիսը: Նա 1987-ին իբրև տիեզերագնաց ուղարկվել  է տիեզերք, որտեղ մնացել է 7 օր, 23 ժամ, 8 րոպե: Վերադառնալով՝ ստացել է ոչ միայն Սիրիայի, այլև՝  «Խորհրդային Միության հերոսի» կոչում, պարգևատրվել  է «Լենինի մեդալով»: Մուհամեդ Ֆարեսը միաժամանակ «Ինտերկոսմոս» ծրագրի անդամ է, ինչպես նաև՝ մի շարք միջազգային մրցանակների դափնեկիր: Սիրիայում բնակվելու տարիներին դասավանդել է համալսարանում, այնուհետև թողել է դասախոսական աշխատանքը և աշխատել սիրիական բանակում, իբրև բարձրաստիճան զինվորական: Մամուլը նշում է, որ Ֆարիսը լավ հարաբերությունների մեջ է եղել Հաֆեզ Ասադի և նրա որդու՝ Սիրիայի ներկա նախագահի հետ, սակայն պատերազմի սկզբից դեմ է եղել նախագահի քաղաքականությանը:   Հերոսի կոչում ստացած տիեզերագնացը Թուրքիայում երբեմն հրավիրվում է դասախոսությունների, որի ընթացքում պատմում է իր փորձի մասին, միաժամանակ, անդրադառնալով պատերազմական իրավիճակին, հայտնում է իր տեսակետները՝ Սիրիայի պատերազմի մասին: Մամուլին նա ասել է, որ աշխարհն ամենալավը երևում է տիեզերքից, որտեղից ո՛չ սահմաններ, ո՛չ պետություններ և ո՛չ էլ տարբերություններ են նշմարվում: Ստամբուլում  նրա հետ է բնակվում նաև կրտսեր որդին, որին Ֆարիսը Միր է անվանակոչել, ի պատիվ խորհրդային ուղեծրային կայանի, որի միջոցով իրականացվել է դեպի տիեզերք նրա թռիչքը: Օրերս հերոս-տիեզերագնացի մասին վավերագրական ֆիլմ է պատրաստել նաև theguardian-ը: Ֆիլմում Ֆարիսն ասում է, որ շուտով ավարտվելու է պատերազմը, ինքը վերադառնալու է  Սիրիա, համբուրելու է հողն ու օգնելու է իր ժողովրդին՝ կառուցելու երկիրը: