Փաշինյանը գլխի ընկավ ու նահանջեց
Ընտրական օրենսդրության բարեփոխման հանձանաժողովը գումարեց իր անդրանիկ նիստը, որին մասնակցում էին հանձնաժողովը ղեկավարող, ՀՀ առաջին փոխվարչապետ Արարատ Միրզոյանը, արդարադատության նախարար Արտակ Զեյնալյանը, ԿԸՀ նախագահ Տիգրան Մուկուչյանը և հանձնաժողովի քարտուղար Դանիել Իոաննիսյանը։ Նիստից հետո հանձնաժողովի նախագահ Արարատ Միրզոյանը լրագրողներին ասաց, որ քննարկել են նախընտրական քարոզչությանը վերաբերող կարգավորումները։ Նա նաև տեղեկացրեց, որ երբ այս հանձնաժողովը կունենա հստակ արձանագրումներ և ամրագրված հայեցակարգ, իրենք կհանդիպեն ու կքննարկեն նաև խորհրդարանական ուժերի հետ այս հայեցակարգը, ինչպես նաև կունենան հանրային և արտախորհդրարանական ուժերի հետ քննարկում։ Սակայն Միրզոյանը ուշագրավ արձանագրում արեց. «Կար երկու տարբերակ՝ դնել առավելագույնս կարճ ժամկետներ, այդ կարճ ժամկետներում ինչ հնարավոր է փոխել, եւ գնալ կարճ ժամանակում ընտրություններ անելու, եւ կար մի տարբերակ՝ անել ինչ-որ բան՝ հիմնավոր։ Մենք գնում ենք 2-րդ տարբերակով։ Ժամկետային սահմանափակումներ մեր առջեւ չենք դրել՝ հաշվի առնելով ընդհանուր ժամկետային սահմանափակումը, որը դրված է Կառավարության ծրագրում»։ Այսինքն, սա նշանակում է, որ կառավարությունը նահանջում է արտահերթ ընտրությունները հնարավորինս մոտ ժամկետներում անցկացնելու մոլուցքից, որը հետապնդում էր կառավարության անդամներին: Մամուլի տեղեկություններով Փաշինյանը պլանավորել էր ընտրություններն անցկացնել սեպտեմբեր-հոկտեմբեր ամիսներին: Նրանք չէին պատրաստվում անսալ Վենետիկի հանձնաժողովի պահանջներին եւ ԸՕ-ն փոխելուց հետո մեկ տարի ժամանակ տալ քաղաքական ուժերին նախապատրաստվելու ընտրություններին: Վարչապետին առընթեր ընտրական բարեփոխումների հանձնաժողովի քարտուղար Դանիել Իոաննիսյանն ի պատասխան ՀՀԿ-ականների հիշեցումներին նույնիսկ հայտարարեց, թե Վենետիկի հանձնաժողովի եզրակացությունը պարտադիր չէ, հանձնաժողովի առաջարկներն ունեն խորհրդատվական բնույթ, եւ Հայաստանի խորհրդարանն օրենքներ ընդունելիս պարտավոր չէ դրանք հաշվի առնել: Ուրբաթ ՀՀ պատվիրակությունը մասնակցել է Վենետիկի հանձնաժողովի նիստին եւ կան տեղեկություններ, որ Դանիել Իոաննիսյանը իր փաստարկներով մեղմ ասած անհարմար վիճակում է հայտնվել, քանզի հանձնաժողովի ղեկավարը բավական կատեգորիկ է հիշեցրել իրենց պահանջի մասին, ինչն ընդունել է ոչ միայն Արփինե Հավհաննիսյանը, այլեւ նախարար Արտակ Զեյնալյանը: Չկատարել հանձնաժողովի պահանջը, կնշանակի , որ Հայաստանը չի դավանում եվրոպական ժողովրդավարական արժեքներին, իրավունքի գերակայությանը, ինչը կնշանակի, որ Հայաստանում իշխանության է եկել քարանձավային ժամանակաշրջանի հասարակարգ ու առաջնորդվում է սեփական օրենքներով ու համոզմունքներով: Դանիել Իոաննիսյանի հայտարարությունը այս տրամաբանության ներքո էր, ըստ էության իշխանությունը գլխի է ընկել ու նահանջել՝ կանխատեսելով հնարավոր վտանգները, որը կարող է Հայաստանը զրկել արեւմուտքի աջակցությունից: Անի Սահակյան
Հետևեք մեզ Viber-ում
