«Որևէ մեկը մտածում է, որ Տարոն Մարգարյանի կամ մյուսների գործը մնալու է առանց քննությա՞ն». Նիկոլ Փաշինյան

«Երեկվա տեսանյութի հետ կապված հարցերի պատասխանը պետք է տան քննչական մարմինները»,- ֆեյսբուքյան ուղիղ եթերում հայտարարել է ՀՀ վարչապետ Նիկոլ Փաշինյանը: Հիշեցնելով, որ «Երևան» հիմնադրամի հետ կապված հարուցված է քրեական գործ, որն ընթացքի մեջ է, Նիկոլ Փաշինյանն ասել է . «Այդ տեսանյութի նյութերը ևս ուղարկված են ԱԱԾ։ Որևէ կասկած չունեմ, որ բոլոր հարցերը կքննվեն և գնահատական կստանան։ Այսօր էլի քաղաքացիական անհնազանդության ակցիա էր տեղի ունենում։ Ես տարակուսանք եմ ունենում, որովհետև տպավորություն է, որ ակցիայի կազմակերպիչները մտածում են, որ կառավարությունն այդ հարցով չի զբաղվել։ Այսինքն այդտեղ ես անտրամաբանական բան եմ տեսնում։ Կարծում եմ, որ բոլորը տեսնում են, որ կառավարությունը հետևողականորեն զբաղվում է բոլոր այդ գործերով, և զբաղվելը չի լինելու կանխավարկածային, այլ՝ փաստերի վրա հիմնված: Մենք եկել ենք իշխանության, որ նորից գնանք փողոցներում կանգնե՞նք։ Պետք է կարողանանք տարանջատել, թե ով է արդարացի պահանջներ իրականացնում, ով է սաբոտաժի դիմում։ Ես էլի կոչ եմ անում դադարեցնել անհնազանդության գործողությունները։ Այսինքն որևէ մեկը մտածում է, որ Տարոն Մարգարյանի կամ մյուսների գործը մնալու է առանց քննությա՞ն։ Այդպես չի լինելու։ Մեր գործողությունները լինելու են փաստերի հիման վրա, թույլ տվեք, որ այդ գործընթացն առաջ գնա»։