«Գուստավ»-ի մենեջերը, որը գաղտնի տեսանկարահանումներ է արել կանանց սանհանգույցում, հետախուզվում է

«Գուստավ» ռեստորանի մենեջերը, որը գաղտնի տեսանկարահանումներ է իրականացրել կանանց սանհանգույցում, հետախուզվում է։ Այս մասին 24News-ին հայտնել են Քննչական Կոմիտեից։

ՔԿ-ից փոխանցում են, որ նշված անձը Հայաստանի Հանրապետությունում չէ։ Հենց դրանով պայմանավորված՝ նրա նկատմամբ ընտրվել է կալանք և հետախուզում հայտարարելու որոշում։ ՔԿ մամուլի խոսնակ Կիմա Ավդալյանի փոխանցմամբ, հետախուզում հայտարարելու մասին որոշումն արդեն ուղարկվել է ոստիկանություն։

Հիշեցնենք՝ հոկտեմբերի 7-ին հայտնի դարձավ, որ «Գուստավ» ռեստորանի 47-ամյա լիբանանահայ մենեջեր Քրիստոֆեր Վարդանյանն իր անձնական հեռախոսը տեղադրել է կանանց զուգարանում և գաղտնի տեսանկարահանումներ իրականացրել։ Դեպքի մասին տեղեկությունները հայտնվել են անգամ Google-ում՝ ռեստորանի էջի կարծիքների բաժնում։ Դեպքի վերաբերյալ նամակ է ստացել նաև Sputnik Արմենիայի խմբագրությունը։ Ըստ հրապարակման՝ մի կին հայտնել է, որ ռեստորանի մենեջերը, ենթադրաբար, հեռախոսը տեղադրել է կանանց զուգարանի լվացարանի տակ և գաղտնի նկարահանել այցելուներին։ Կինը, հայտնաբերելով հեռախոսը, դիմել է մենեջերին, որն էլ հաստատել է, որ հեռախոսն իրեն է պատկանում։

Ռեստորանը հրապարակային արձագանքում նշել էր, որ տվյալ անձն իր մենեջերն էր, սակայն ազատվել է աշխատանքից։