Ադրբեջանցիները անձամբ ինձ պատկանող հողատարածքում տնկել են Ադրբեջանի դրոշը. Տեղ գյուղի բնակիչ

Ադրբեջանցիներն անձամբ ինձ պատկանող հողատարածքում տնկել են Ադրբեջանի դրոշը։ Այս մասին «Հրապարակի» հետ զրույցում ասել է Տեղ գյուղի բնակիչ, Տեղ համայնքի «Ապրելու երկիր» կուսակցության ավագանու անդամ Մասիս Զեյնալյանը։

Կայքի հետ զրույցում նա նշել է, որ ադրբեջանցիների կողմից այս առաջխաղացման հետեւանքով գյուղի բնակչության մի մեծ զանգված կորցրել է իրենց պատկանող հողերը, որտեղ հիմնականում հացահատիկ էին ցանում։

«Այդ հենակետում առաջ ռուս սահմանապահներն էին կանգնած,սակայն հետ են քաշվել ու հիմա այս պահին բանակցություններ են գնում ադրբեջանցիների հետ»,-տեղեկացրել է Զեյնալյանը։

Նա նշել է,որ կրակոցներ չեն հնչել ու հեռվից երեւում են ադրբեջանցիների մեքենաներն ու բարձրացրած դրոշը։ 

Աղբյուրը, ով խնդրել է չհանրայնացնել իր անունը, տեղեկացրել է, որ եվրոպացի դիտորդներն էլ են առավոտյան եկել Տեղ համայնք` իրավիճակին մոտիկից ծանոթանալու համար, սակայն վերջիններս թույլ չեն տվել առաջ գնալ։

Կայքի տեղեկություններով, այս պահին Տեղ համայնքում են գտնվում նաեւ Սյունիքի մարզպետ Ռոբերտ Ղուկասյանը, Գորիսի համայնքապետ Առուշ Առուշանյանը, ովքեր փորձում են տեղում ծանոթանալ իրավիճակին։

«Դեռեւս մեկ ամիս առաջ լսել էինք, որ հանձնելու են այս հատվածն էլ, որովհետեւ ով որ հանձնել է, խոստացել էր,որ մինչեւ ապրիլի մեկը հանձնելու է»,-տեղեկացրել է սյունեցի աղբյուրը։

Հիշեցնենք,որ այս հատվածը Գորիս -Ստեփանակերտ ճանապարհն ու ու հիմա այդ հատվածով երթեւեկությունն իրականացվելու է Կոռնիձորի գրունտային ճանապարհով, որը սակայն դեռ պատրաստ չէ`չնայած շինարարությունը նոր չէ,որ սկսվել էր։

«Հրապարակ օրաթերթ»