«Միասին» շարժումն առաջարկել է խորհրդարանական ընդդիմությանն առաջադրել Էդգար Ղազարյանի թեկնածությունը

«Միասին» շարժման խորհրդի վերջին նիստում քննարկվել է ՀՀ ՄԻՊ թեկնածուի պաշտոնում առաջադրել շարժման անդամ Էդգար Ղազարյանի թեկնածությունը, որի համար երեկ նամակով դիմել են ՀՀ ԱԺ «Հայաստան» և «Պատիվ ունեմ» խմբակցություններին։ Տեղեկությունը «Փաստինֆո»-ի հետ զրույցում հաստատեց Էդգար Ղազարյանը։

«Քննարկման մասնակիցների համար անհասկանալի է, թե ինչով է պայմանավորված նման անտարբեր վերաբերմունքը ՀՀ կարևորագույն ինստիտուտներից մեկի՝ ՄԻՊ-ի նկատմամբ, այն էլ այս ժամանակաշրջանում, երբ Արցախում ապրող մեր 120.000 հայրենակիցները, որոնք նաև ՀՀ քաղաքացու անձնագիր են կրում, ցեղասպանության վտանգի առաջ են, ըստ ՀՀ վարչապետի, նրանց իրավունքների զանգվածային ոտնահարում է տեղի ունենում և ՀՀ-ում»,- ասաց նա։

Ղազարյանի խոսքով՝ ամենայն հավանականությամբ երկուշաբթի ԱԺ ընդդիմադիր խմբակցությունները կքննարկեն և կհայտնեն իրենց դիրքորոշումը։ Նրա կարծիքով՝ մերժելու դեպքում տրամաբանական կլինի, եթե ԱԺ խմբակցությունները մեկ այլ թեկնածու ունենան։

Ի դեպ, ամենևին էլ պարտադիր չէ, որ երկու խմբակցությունները միաժամանակ առաջադրեն թեկնածությունը, կարող են նաև առանձին առաջադրել։
Նշենք, որ ավելի քան 1 ամիս է ՀՀ ՄԻՊ պաշտոնը թափուր է։ Քրիստինե Գրիգորյանի հրաժարականից հետո Աժ 3 խմբակցություններից որևէ մեկը, օրենքով սահմանված ժամկետներում, որևէ մեկի թեկնածությունն այդ պաշտոնում չի առաջադրել։