Արցախի անունից կարող է խոսել միայն Արցախի իշխանությունը. ՀՀ վարչապետ
Այսօր կայացած ասուլիսի ժամանակ ՀՀ նորընտիր վարչապետ Նիկոլ Փաշինյանը խոսել է նաև Հայաստանի ու Արցախի միավորման հեռանկարների մասին։ «Երբ Արցախը միջազգայնորեն ճանաչված կլինի, Հայաստանի ու Արցախի ժողովուրդները կարտահայտեն իրենց դիրքորոշումը»,–նշել է Փաշինյանը: Անդրադառնալով միջազգային ճանաչման հնարավորությանը` Փաշինյանը հայտարարեց, թե դրա լավագույն միջոցներից մեկն Արցախի խնդրի էության ներկայացումն է միջազգային հանրությանը: Ինչպես ասել է՝ Արցախի հետ հարաբերությունները կունենան նոր դրսեւորումներ եւ նոր շունչ կտրվի Արցախի միջազգային ճանաչմանը: Փաշինյանի խոսքով՝ Արցախի հարցով ինքը կարող է բանակցել որպես ՀՀ վարչապետ, իսկ Արցախի անունից կարող է խոսել միայն Արցախի իշխանությունը. «Հայաստանը եւս հակամարտության կողմ է եւ լիարժեք կխոսի իր անունից: Ես պատրաստ եմ ՀՀ անունից բանակցել Ադրբեջանի նախագահի հետ, բայց Արցախի անունից պետք է բանակցի Արցախի իշխանությունը՝ ի դեմս Արցախի նախագահի։ Հայկական կողմերը միշտ էլ խաղաղ հանգուցալուծման կողմնակից են եղել, իսկ Ադրբեջանը շարունակաբար օգտագործում է ռազմատենչ հռետորաբանություն»։
Հետևեք մեզ Viber-ում
