Հիշի՛ր, պահեցողությունը ոչ թե Աստծուն քո քաղցը ցույց տալու համար է, այլ քո հոգու քաղցը Աստծով հագեցնելու. Տեր Աբրահամ
Դաշտավանի Սբ. Աստվածածին եկեղեցու հոգևոր հովիվ Տեր Աբրահամ քահանա Մարտիրոսյանը նշում է՝ Պողոս առաքյալի այս պատգամը հիշեցնում է մեզ, որ քրիստոնյայի կյանքը ոչ թե հանդիսատեսի անտարբերություն է, այլ մշտական արթնություն և հոգևոր զինավարժություն։
««Ուստի առէ՛ք Աստծոյ սպառազինութիւնը, որպէսզի կարողանաք չար օրում դէմ կանգնել չարին...» (Եփեսացիս 6:13)։
Պողոս առաքյալի այս պատգամը հիշեցնում է մեզ, որ քրիստոնյայի կյանքը ոչ թե հանդիսատեսի անտարբերություն է, այլ մշտական արթնություն և հոգևոր զինավարժություն։ Մեծ Պահքի այս շրջանում մենք կոչված ենք լինելու ոչ թե պարզապես հետևորդներ, այլ քրիստոնեական առաքինությունների աննկուն զինվորներ»,- գրում է Տեր Հայրը։
Տեր Աբրահամի խոսքով՝ Աստծո սպառազինությունը նյութական չէ, այն կռվում է այնտեղ, որտեղ սկիզբ է առնում ամեն մի անկում՝ մեր մտքում և սրտում։
««Չար օրը» կարող է այցելել մեզ ցանկացած պահի, երբ տկարանում է կամքը, երբ հուսահատությունը, բարկությունը կամ նախանձը փորձում են տիրել մեր հոգու ամրոցին։ Ուստի, եկեք այս Պահքին զինվենք աստվածային շնորհներով.
Թող ճշմարտությունը լինի մեր գոտին, որպեսզի կեղծիքն ու երկդիմությունը տեղ չունենան մեր կյանքում։
Թող արդարությունը լինի մեր զրահը՝ պաշտպանելով սիրտը դատապարտության թույնից։
Թող հավատը լինի մեր վահանը, որով կհանգցնենք կասկածի ու վախի բոլոր մխացող նետերը։
Պահքը սոսկ սննդից հրաժարվելը չէ, այլ հնարավորություն՝ թոթափելու մեղքի ծանրությունը և ամուր կանգնելու փորձությունների դիմաց։ Հիշի՛ր, պահեցողությունը ոչ թե Աստծուն քո քաղցը ցույց տալու համար է, այլ քո հոգու քաղցը Աստծով հագեցնելու։
Եկեք այս քառասնօրյա ճանապարհն անցնենք արիությամբ, աղոթքով և սիրով, որպեսզի Հարության լուսավոր տոնին հասնենք ոչ թե հոգնած ու պարտված, այլ Աստծո լույսով զրահավորված և հաղթանակած»,- հավելել է Տեր Աբրահամը։
Հետևեք մեզ Viber-ում
