Հերթական պարգևավճարները՝ Ազգային ժողովում

Մինչ հանրությունը քննարկում ու քննադատում է իշխանությունների աստղաբաշխական պարգևավճարները, որոնք միլիոնների են հասնում, ԱԺ նախագահ Ալեն Սիմոնյանը հերթական կարգադրությունն է ստորագրել ԱԺ աշխատակազմին հերթական պարգևավճարները տալու վերաբերյալ։

«Ղեկավարվելով «Ազգային ժողովի կանոնակարգ» սահմանադրական օրենքի 5-րդ հոդվածի 2-րդ մասի 22-րդ կետով և «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքի 22-րդ հոդվածով՝ կարգադրում եմ.

Ազգային ժողովի աշխատակազմի պետական ծառայողներին խրախուսել միանվագ դրամական պարգևատրմամբ՝ համաձայն հավելվածի:

Ազգային ժողովի աշխատակազմի ղեկավար-գլխավոր քարտուղար Դավիթ Առաքելյանին՝ Հայաստանի Հանրապետության օրենսդրությամբ սահմանված կարգով ապահովել համապատասխան վճարումների կատարումը»,-նշված է ԱԺ նախագահի ստորագրած կարգադրությունում, որը հրապարակվել է խորհրդարանի պաշտոնական կայքում:

Այս կարգադրությունից զատ, ԱԺ նախագահը ևս մեկն է ստորագրել՝ պարգևատրման գումարները բաշխելու վերաբերյալ։

Հիշեցնենք, որ օրեր առաջ ԱԺ-ում ճեպազրույցների ժամանակ, խոսելով կառավարության անդամների ու ԱԺ պատգամավորների ամանորյա աստղաբաշխական՝ 3-7 միլիոն դրամ, իսկ Նիկոլ Փաշինյանին ու 2 փոխվարչապետերին, ընդհանուր առմամբ՝ 51 միլիոն դրամով պարգևատրելու մասին, Ալեն Սիմոնյանն ասել էր՝ լավ են արել, խաղաղություն բերողները լավ շորեր պիտի հագնեն, էլի են պարգևավճար տալու:

Ինչպես ասում են, ամիսը չբոլորեց. հերթական պարգևավճարները տրվեցին:

168.am