Արտակարգ իրավիճակ՝ «Կինոյի տան»-ը

Երբ Երևանում՝ Խանջյան փողոցում, շահագործման հանձնվեց ժողովրդին հայտնի «Կինոյի տան» 23-հարկանի շենքը, որը Վարդանանց 18/2 հասցեն է, շատ երևանցիներ բարի նախանձով էին նայում ու ցանկություն էին հայտնում, որպեսզի այդ շենքում իրենք տուն ունենան։
Ինչպես տեղից հայտնում է ֆոտոլրագրող Գագիկ Շամշյանը, տևական ժամանակ է թե՛ շենքի բնակիչները, թե՛ Կինոգործիչների միությունը, թե՛ շենքում գործող ՍՊԸ-ների ու ընկերությունների աշխատակիցները չգիտեն՝ որ կառույցին դիմեն, որպեսզի շենքը փրկեն փլուզումից։

Այսօր՝ հունվարի 21-ին, ֆոտոլրագրողի հետ զրույցում բնակիչներն իրենց մտահոգությունն էին հայտնում՝ ասելով.

«Շաբաթներ շարունակ էս շենքը, որը հայտնի է Հայաստանի կինոգործիչների միություն՝ «Կինոյի տուն» անունով, նկուղային 2 հարկերում գործող ավտոկայանատեղիներում իսկական բարձիթողի վիճակ է ու պատճառը խմելու ջրի խողովակի վնասվել է։ Ում ասես չենք դիմել, նույնիսկ վարչապետի աշխատակազմ, թեպետ սա այն խնդիրը չէ, որ սրանով զբաղվի վարչապետը։ Բայց դե ստիպված տեսնելով, որ ո՛չ Երևանի քաղաքապետարանը, ո՛չ Կենտրոնի վարչական շրջանի ղեկավարի աշխատակազմը, ո՛չ «Վեոլիա ջուրը» չեն կարողանում հասկանալ մեզ ու շենքը փրկել փլուզումից, դրա համար դիմել ենք նաև կառավարություն, բայց հուսախաբ եղանք, քանի որ էնտեղից էլ մի ռեալ պատասխան չստացանք, և այդ ամենի արդյունքում խմելու ջրի խողովակի վնասված հատվածից ջուրը շարունակում է դուրս տալ՝ օր օրի ավելի թուլացնելով շենքի հիմքերը։

Հիմա խնդրում ենք պատասխանատուներին, որ քաղաքի սրտում կառուցված ու բավականին մարդաշատ վայրում գտնվող այս շենքը փրկեն ամեն պահի փլվելու վտանգից։

Ով է տեսել՝ 21-րդ դարում օրեր շարունակ չիմանաս, թե ով պետք է խնդիրը վերացնի։ Վճարումները կանոնավոր կատարում ենք, բայց փոխարենը ստանում ենք քար անտարբերություն»։

Ֆոտոլրագրողը հայտնում է, որ «Վեոլիա ջուրը» պատրաստակամություն է հայտնել վթարը վերացնելու, սակայն դրա համար անհրաժեշտ է Երևանի քաղաքապետարանի թույլտվությունը, որպեսզի «Վեոլիա ջուրը» կատարի ճանապարհի քանդման աշխատանքներ, իսկ քաղաքապետարանից պատասխանել են, թե հիմա չենք կարող թույլտվություն տալ, քանի որ ասֆալտի գործարանը այս եղանակին չի աշխատում, հետո չենք կարողանալու ասֆալտ բերել ու փոսը փակել. լրիվ դարակազմիկ պատասխան, մի ամբողջ հսկայական շենքի հիմքերը ջրի դուրս գալու պատճառով վնասվում են, իսկ քաղաքապետարանը նման պատասխան է տվել։ Ու հետաքրքիր է՝ ինչքան պետք է բնակիչները սպասեն, որ ասֆալտի գործարանը սկսի աշխատել։

Ֆոտոլրագրողը հայտնում է՝ ավտոկայանատեղիում, որտեղ լցվում է խմելու ջուրը, պատերը բորբոսնել են ու նկուղային 2 հարկերի առաստաղներից ևս կաթում է ջուր։