Կիրակի Սուրբ Գևորգ եկեղեցում Փաշինյանի ներկայությամբ ո՞վ կմատուցի պատարագը

Նիկոլ Փաշինյանն այսօր ֆեյսբուքյան տեսանյութով և գրառմամբ տեղեկացրեց, որ կիրակի օրը մասնակցելու է Սուրբ պատարագի, այս անգամ՝ Արմավիրի մարզում։ Պատարագը տեղի կունենա Մեծամոր խոշորացված համայնքի Այգեշատ գյուղի Սուրբ Գևորգ եկեղեցում։

Դեկտեմբերի 3-ին կառավարությունում լրագրողների հետ ճեպազրույցում Նիկոլ Փաշինյանը չէր հերքել, որ ԱԱԾ-ի կամ այլ անձանց կողմից հրահանգվում է, որպեսզի այն եկեղեցիներում, որտեղ ինքը մասնակցում է պատարագի՝ չհնչի Վեհափառ հայրապետի անունը։

Սուրբ Գևորգ եկեղեցու հոգևոր հովիվը Տեր Մաշտոց քահանա Ստեփանյանն է: Զանգահարեցինք տեր հորը՝ պարզելու համար՝ կիրակի օրը նախատեսված պատարագին արդյո՞ք զեղչելու է Վեհափառի անունը, նման հրահանգ իրեն արդեն տրվե՞լ է։ Սակայն մեր հեռախոսազանգերին նա չպատասխանեց։ Համագյուղացիներից մեկը մեզ հետ զրույցում ասաց, որ քահանան բավականին խելացի է, իր գործին նվիրված, իր կարծիքով՝ դժվար թե զեղչի Վեհափառի անունը։.

«Չեմ կարծում, որ տեր Մաշտոցը կհամաձայնի զեղչելու կաթողիկոսի անունը, դժվար թե նա գործի կանոնակարգից դուրս»։

168.am-ը զանգահարեց նաև Այգեշատ գյուղի վարչական ղեկավար Արտակ Եղիազարյանին՝ ճշտելու՝ կիրակի օրը մասնակցելո՞ւ է պատարագին։

«Ինքս գրեթե ամեն կիրակի եմ պատարագի մասնակցում մեզ մոտ»,- նշեց նա։

Ճշտող հարցին՝ եթե իմանա, որ Վեհափառ հայրապետի անունը զեղչվելու է պատարագի ընթացքում, կմասնակցի՞, քանի որ պատարագներին մասնակցելու համար Նիկոլ Փաշինյանը նման պահանջ է դնում, մեր զրուցակիցը պատասխանեց.

«Ինչպես բոլոր տեղերում, մեզ մոտ էլ սովորական պատարագ է լինում։ Եկեք «եթե»-ներով չխոսենք, չգիտեմ՝ ինչ է ասել Նիկոլ Փաշինյանը, զբաղվածությունս այդքան թույլ չի տալիս, որպեսզի հետևեմ։

Մշտապես մեր եկեղեցում պատարագները մատուցում է տեր Մաշտոց քահանա Ստեփանյանը»։

Այս պահին դեռևս պարզ չէ՝ Տեր Մաշտոց քահանան կիրակի օրը պատարագ կմատուցի՞, թե՞ Նիկոլ Փաշինյանը, ինչպես Գյումրիում եղավ, այլ քահանայի կտանի իր հետ։

168.am