Թե Բաքուն, թե Անկարան «փափուկ շանտաժի» տրամաբանությամբ «կլանում» են Հայաստանի կառավարությանը. Հակոբ Բադալյան

Քաղաքական վերլուծաբան Հակոբ Բադալյանը տելեգրամի իր ալիքում գրում է․

««Իսկ որոշման հիմնավորումները շատ պարզ են՝ կնիքները համապատասխանեցվել են սահմանահատումներին ներկայացվող ժամանակակից պահանջներին…», կնիքի արդեն հայտնի պատմության վերաբերյալ գրում է սոցապ նորանշանակ նախարար Թորոսյանը:

Շատ հետաքրքիր է, այդ ի՞նչ ժամանակակից պահանջներ են, որ ներկայացվում են: Իսկ նախարարը կարո՞ղ է ներկայացնել այդ «ներկայացվող ժամանակակից պահանջները»: Որտե՞ղ են դրանք, ո՞վ է ներկայացնում որևէ պահանջ պետությունների ինքնիշխան իրավունքի՝ սահմանահատման կնիքի առնչությամբ:

Ում և ինչո՞վ էր «խանգարում» Արարատ լեռան պատկերը:

Այն կարող էր «խանգարել» միայն Թուրքիային ու Ադրբեջանին, այն էլ ոչ թե իսկապես խանգարելու իմաստով, այլ ընդամենը լիներ միջոց, առիթ՝ Հայաստանին պահանջ ներկայացնելու: Այդ կերպ իհարկե թե Բաքուն, թե Անկարան «փափուկ շանտաժի» տրամաբանությամբ «կլանում» են Հայաստանի կառավարությանը:

Եթե որևէ մեկը մտածում է, թե, օրինակ հանելով Արարատի պատկերը, կամ այլևայլ գործողություններ անելով հնարավոր է զրկել Թուրքիային ու Ադրբեջանին առիթից, մեղմ ասած չարաչար սխալվում է, իսկ պարզ ասած՝ գտնվում է «քաղաքական անմեղսունակության» վիճակում:

Այդպես օրինակ, Արցախի կորստի հարցում սեփական պատասխանատվությունը քողարկելու համար, կառավարող քաղաքական ուժը «բացատրում» էր, որ այդպիսով չունենալով Ադրբեջանի հանդեպ ոչ մի «պարտք ու պահանջ», Հայաստանը Ադրբեջանին է զրկում Հայաստանի հանդեպ այդպիսին ունենալու հիմքից, առիթից:

Անցնող ժամանակաշրջանը վկայեց, որ այդ «բացատրությունները» այլ բան չէին, քան քաղաքական «անմեղսունակություն» կամ պարզապես պրոպագանդիստական մանիպուլյացիա, որովհետև Ադրբեջանը շարունակեց ու շարունակում է Հայաստանի հանդեպ պահանջները:

Որովհետև, Ադրբեջանը զբաղվում է քաղաքականությամբ, այն էլ մեծ քաղաքականությամբ, որքան էլ ցավալի է դա խոստովանել: Հայաստանն այդ իմաստով զբաղվում է պարզապես սեփական հանրության հանդեպ մեծ երեսպաշտությամբ»: