Լավ` սրանք դավաճան են, անհայրենիք, աթոռի մեռած, ամոթ-աբուռ, սկզբունքներ ու սրբություններ չունեցող, իրենց համար է լրիվ մեկ` Հայաստան պետություն կլինի, թե ոչ

Լավ` սրանք դավաճան են, անհայրենիք, աթոռի մեռած, ամոթ-աբուռ, սկզբունքներ ու սրբություններ չունեցող, իրենց համար է լրիվ մեկ` Հայաստան պետություն կլինի, թե ոչ: Ավելի շուտ մտածում են` եթե մենք իշխանություն չենք ունենալու, ավելի լավ է առհասարակ չլինի: Բա մե՞նք: Ի՞նչ ենք անում մենք, եւ ի՞նչ արդարացում ունի այս հանրային տոտալ մասնակցություն- մեղսակցությունը պետության վերացման կործանարար ընթացքին: Արդյո՞ք հոդված ու ստատուս գրելը, աղետաբերների խմբակին քննադատելը, անհասցե բողոքելն ու վրդովվելը բավարար է: Կասեք` ի՞նչ անենք, չգիտենք մեր անելիքը: Կասեմ` դա արդարացում չէ, մանավանդ անելիք` հաստատ կա: Առաջին հերթին այս ամենի համար պատասխանատվություն եւ անելիք ունեն նախկին նախագահները, նախկին եւ ներկա քաղաքական ու հանրային գործիչները, նախկին ու ներկա պաշտոնյաները: Ընդդիմությունը, որը զբաղված է իրար բզկտելով: Առաջին անելիքն, իհարկե, պետք է լինի հստակ, առանց սեթեւեթելու կարծիք- դիրքորոշում շարադրելը: Երկրորդը` հանրային քննարկումներ նախաձեռնելը: Ո՞վ է խանգարում մեր տիտղոսակիր եւ ոչ այնքան, ընդդիմությանը նման քննարկումներ նախաձեռնել, հայտարարություններ անել, վերլուծել ու հակադրվել իշխանություններին: Դրա համա՞ր էլ են շատ փող, մեծ ռեսուրսներ, մեծ քանակությամբ հետեւորդներ պետք: Անպայման անելիք ունի մտավորական կոչվող խավը` դասախոսներ, գիտնականներ, գրողներ, նկարիչներ, երաժիշտներ, բժիշկներ, ուսուցիչներ, զինվորականներ, սպորտսմեններ: Դու չես կարող վիրահատություն անել, գրականություն դասավանդել, ժամանակակից տեխնոլոգիաների մասին դասախոսություն կարդալ, հետո հանգիստ գնալ տուն ու հետեւել, թե ինչպես են քո երկրի ճակատագիրը որոշող բախտորոշ որոշումներ կայացնում մի քանի կիսագրագետ անմեղսունակներ, որոնք ո՛չ իրենց անելիքը գիտեն, ո՛չ իրենց պատասխանատվության չափը, ո՛չ Աստծո դատաստանից են վախենում, ո՛չ ժողովրդի զայրույթից: Եվ ի վիճակի չեն Հայաստանի թշնամիներին մի պարզ «ոչ» ասել, ինչ-որ բաներում հակադրվել: Նաեւ ուժ չեն գտնում իրենց մեջ՝ իշխանությունից հրաժարվելու, որովհետեւ մտածում են` մի քիչ էլ ու «կպլստան»` էլի կմնան իշխանության, հընթացս` զարմանալով, թե ո՞նց այսքան բանից հետո ժողովուրդն իրենց չի վռնդում:

Այս մասին գրում է «Հրապարակ» օրաթերթի գլխավոր խմբագիր Արմինե Օհանյանը։