Գյումրիում Նիկոլ Փաշինյանը պատրաստվում է ընտրակեղծիքների՞․ ահազանգ Գյումրիի ոստիկանության «Կումայրի» բաժնի գործունեության պահով

Գյումրիում մարտի 30–ին սպասվող ավագանու արտահերթ ընտրություններին ընդառաջ արդեն իսկ խախտվել են ՀՀ սահմանադրությունն ու քրեական օրենսգիրքը։ Փաշինյանը պարտավոր էր նոր ընտրություններ նշանակել, սակայն ժամանակը ձգեց, որպեսզի պատրաստվի։

«Մայր Հայաստան» շարժումն այս հարցով հանցագործության մասին հաղորդում է ներկայացրել քննչական և հակակոռուպցիոն կոմիտեներին՝ Նիկոլ Փաշինյանի ու կառավարության մոտ արձանագրելով առերևույթ սահմանադրական կարգի տապալում, իշխանության զավթում, հանցավոր անգործություն, լիազորությունների չկատարում։ Քննչականից ու հակակոռուպցիոնից պատասխանել են, որ հանցակազմ չեն տեսնում։ Այլ բան չէր էլ սպասվում, բայց նրանց պատասխանը հետագայում կօգտագործվի պատասխանողների դեմ։ Այս պահին այդ պատասխանը բողոքարկման փուլում է։

Ինչ վերաբերում է ընտրություններին պատրաստվելուն, ապա մեզ հասած տեղեկություններով՝ Նիկոլ Փաշինյանն ու նախկին ՀՀԿ–ական պատգամավոր Արման Սահակյանն իրենց հովանավորյալ Սարիկ Մինասյանի համար Գյումրիի «Կումայրի» բաժնում Ջավախքից մարդկանց են բերում ու գրանցում, որպեսզի մասնակցել տան ավագանու ընտրություններին (պարզ է, որ նոր գրանցվածները քվեարկությունն անելու են հօգուտ «Քաղաքացիական պայմանագրի»)։ Թե որքանով են այդ լուրերը համապատասխանում իրականությանը, պարզ կդառնա շատ շուտով։ Թող հայտարարությամբ հանդես գա Գյումրիի ոստիկանությունը՝ հրապարակելով վերջին 6 ամսվա կտրվածքով Գյումրիում գրանցվածների թվերը՝ ամիս առ ամիս։ Թող հրապարակի նաև գրանցվածների դինամիկան և աշխարհագրությունը (որտեղի՞ց են եկել ու գրանցվել Գյումրիում)։ Այս հարցով պետք է ահազանգեն բոլոր իրավապաշտպան կազմակերպությունները, եթե, իհարկե, ծախված չեն։

Գյումրիում ընտրակեղծիք թույլ չտալը գյումրեցիների, ընդդիմության ու ընդհանրապես՝ բոլորիս շահերից է բխում։ Նիկոլը Գյումրիում զավթել է իշխանությունն ապօրինաբար, բայց գիտի, որ ընտրվելու շանս չունի։ Դրա համար էլ հույսն այլ բաների վրա է դրել՝ դրածոներ, ֆեյք ընդդիմություն, վարչական լծակներ և այլ գործիքներ։ Գյումրեցիները հրաշալի հնարավորություն ունեն Նիկոլին, ինչքան ուզելու՝ այնքան խփելու, այսինքն՝ վռնդելու։

Պետրոս Ալեքսանյան

7or.am