Չեմ տեսել, բայց գիտեմ, որ փշալարեր են քաշում, մոտենալ չի թույլատրվում. Կիրանցի վարչական ղեկավար
Կիրանցում սահմանազատումը դեռ տներին չի հասել, որ տների մոտ էլ փշալարեր դնեն, մինչև չավարտեն սահմանազատումը, մինչև մենք մեր հողերին չմոտենանք՝ ո՞նց կարող ենք տեսնել փշալարեր կա՞ն, թե՞ ոչ, չի թույլատրվում մոտենալ։ Այս մասին «Փաստինֆոյի» հետ զրույցում ասաց Կիրանցի վարչական ղեկավար Կամո Շահինյանը։
«Հստակ դեռ չեն էլ ասում՝ մեր մոտ սահմանազատվող հատվածը 12 կիլոմետր է, թե որքան է։ Այս պահին ոչ թե գյուղի մեջ սահմանազատման գործընթացը կատարվում, այլ դաշտերի ու վարելահողերի հատվածում է, որին մենք դեռ չենք կարողանում մոտենալ։ Չեմ տեսել, բայց գիտեմ, որ էնտեղ փշալարեր են քաշում, բավականին աշխատանք են կատարել արդեն, իսկ գյուղի մեջ դեռ չեն մտել։ Հիմա ակտիվ աշխատում են շրջանցիկ ճանապարհը կառուցելու ուղղությամբ, աշխատանքները դեռ կիսատ են, դա ավարտելուց հետո արդեն նոր գյուղում էլ փշալարերը կքաշեն»,- ասաց Կ.Շաինյանը։
Նրա փոխանցմամբ՝ մտահոգությունները մարդկանց չեն լքել, սակայն այս պահին նրանք զբաղված են գյուղատնտեսական աշխատանքներով։ «Մարդիկ շարժի մեջ են եղել, չեն էլ նկատել որ բերքը հասունանում է, մեկ էլ տեսել են, որ ծառերին բերք կա։ Հիմա ամեն մեկն իր գործին է, չնայած մարդկանց մտահոգությունները նույնն են։ Մենք էլ աշխատում ենք մարդկանց հետ, որ հասկանանք, թե ոնց ենք ապրելու»։
«Փաստինֆո»-ն նաեւ Ոսկեպարի վարչական ղեկավարի հետ փորձեց կապ հաստատել՝ հասկանալու համար, թե այնտեղ փշալարեր կան թե ոչ, սակայն Իշխան Աղբալյանը մեր զանգերին չպատասխանեց։ Զրուցեցինք Ոսկեպարի բնակիչ պահեստազորի գնդապես Միհրան Մախսուդյանի հետ։
Նա նշեց, որ թեև շատ հաճախ այս օրերին Երևանում է եղել, բայց Ոսկեպար ևս այցելել է։ «Ոսկեպարի մոտ փշալարեր չեմ տեսել, տեղանքն էլ անծանոթ էր։ Բնակիչներն էլ չգիտեն՝ ինչ հատված է, ու ինչ փշալարարեն են ներկայացրել»։
Հիշեցնենք, որ Սյունքի այցի ընթացքում Նիկոլ Փաշինյանը ցույց էր տվել մի լուսանկար և նշել որ այժմ Ոսկեպարում փշալարեր են քաշվում։
Բագրատ Սրբազանն այսօր հայտնեց, որ Ոսկեպարում այս պահի դրությամբ նման փշալար չկա։ «Խնդրել եմ՝ երկրորդ անգամ ստուգեն՝ հնարավորինս բոլոր ծայրերը։ Հունիսի 21–ին գնալու եմ Կիրանց, Ոսկեպար՝ իմ աչքով տեսնելու այդ ինչ փշալարեր, ցանցեր են, որոնք մեր անվտանգությունն են ապահովելու։ Այն, ինչ որ ինքը ցույց է տվել, չկա, միգուցե ինչ- որ հատվածում մի կտոր է, որ նկարեն ու ասեն՝ այլևս վերջ»,-ասել է Սրբազանը։
Հետևեք մեզ Viber-ում
