Հայաստանը ժողովրդավարության անկում է գրանցել․ զեկույց

Հայաստանն ազգային ժողովրդավարական կառավարման վարկանիշում անկում է գրանցել՝ 2.50-ից հասնելով 2.25-ի: Տարեկան զեկույցը հրապարակել է Freedom House միջազգային հեղինակավոր իրավապաշտպան կազմակերպությունը՝ «Nations in Transit 2024» խորագրով։

Համաձայն զեկույցի՝ «Վարկանշի անկումը պայմանավորված է գործադիրի կողմից իշխանության կոնսոլիդացման, կենտրոնական իշխանությունների կողմից ընդդիմադիր քաղաքապետերին պաշտոնանկ անելու և իշխող կուսակցության ֆինանսների թափանցիկության բացակայության իրողություններով»։

Արդյունքում, Հայաստանի ժողովրդավարության միավորը 3,11-ից իջել է 3,07-ի:

«2023 թվականին Հայաստանում ամենակարևոր քաղաքական գործընթացներն ու խնդիրները վերաբերում էին ինչպես անվտանգության խնդիրներին, մասնավորապես՝ Ադրբեջանի հետ հարաբերություններին, այնպես էլ չճանաչված, բայց դե ֆակտո անկախ Լեռնային Ղարաբաղի Հանրապետության (Արցախ) 10-ամսյա շրջափակմանը, սեպտեմբերին Ադրբեջանի ագրեսիայի հետևանքով հետագա էթնիկ զտումների հետ»,- նշված է զեկույցում։

Համաձայն Freedom House-ի․ «Հայերի ամենակարևոր մտահոգությունները ոչ միայն եղել են ազգային անվտանգության այս խնդիրները, այլև ձևավորել են ներքաղաքական լանդշաֆտը, որտեղ ընդդիմությունը և բնակչության մեծ հատվածը քննադատում են կառավարությանը Լեռնային Ղարաբաղի հարցում քաղաքականության ձախողումների համար»։

Կազմակերպությունը նշում է, որ անվտանգության իրավիճակի վատթարացումը միայն խորացրել է Հայաստանի խորհրդարանում քաղաքական բևեռացումը Նիկոլ Փաշինյանի ղեկավարած «Քաղաքացիական պայմանագիր» կուսակցության և ընդդիմության միջև՝ «խաթարելով կառուցողական երկխոսությունը կրիտիկական հարցերի շուրջ»:

Զեկույցն ամբողջությամբ՝այստեղ։