«Նվեր»՝ ընտրազանգվածին

Տեղեկությունը, որ «Մալաթիա» տոնավաճառը (պաշտոնապես՝ «Ռաֆայել-Տաթև» ընտանեկան տոնավաճառ) փետրվարի 1-ից փակվելու է կամ կարող է փակվել, ուշագրավ է միանգամից մի քանի առումով: Ինչպես կարելի է հասկանալ տոնավաճառի սեփականատեր և տնօրեն Սամվել Ավետիսյանի՝ լրատվամիջոցներին տված բացատրություններից, բանն այն է, որ հակահրդեհային անվտանգության կանոնները պահպանելու հարցում տոնավաճառը խնդիրներ ունի: Ու խոսքն այնպիսի խնդիրների մասին է, որոնք անլուծելի են կամ, ավելի շուտ, բավականին տևական ժամանակ են պահանջում:

Ամեն պարագայում, կարծես արդեն վերջնականապես որոշված է, որ «Մալաթիա» տոնավաճառը փետրվարի 1-ից էլ չի գործի: Իսկ դա նշանակում է, որ շուրջ 600 հոգի կդառնա գործազուրկ կամ ստիպված կլինե առևտուր անելու նոր վայրեր փնտրել, հասկանալի է, տաղավարի տարածքի համար շատ ավելի բարձր վարձավճարով:

Հետաքրքիր էր հետևել այս տեղեկության տարածմանը հաջորդած սոցցանցային արձագանքներին:

Մասնավորապես, ընդդիմության բողոքի ակցիաների ակտիվ մասնակիցներից շատերը հիշեցին, որ անցյալ տարվա երթերից մեկի ժամանակ «Մալաթիա» տոնավաճառի առուտուրականները իրենց բավականին ագրեսիվ էին պահել՝ շշեր նետելով ցուցարարների վրա, աղմկելով ու Նիկոլ Փաշինյանին իրենց սերը արտահայտելով: Ու չի նկատվել, որ նույն վայրում գտնվող ու առևտրով զբաղվող այլ անձինք փորձեին սաստել խուլիգաններին ու մոլեռանդ նիկոլականներին: Դրանից կարելի է բխեցնել, որ տվյալ «տոնավաճառում» «գործ անողների» մեծամասնությունը» Նիկոլ Փաշինյանի ու քպ-ի երդվյալ ընտրազանգվածն է ներկայացնում:

Եթե դա իրոք այդպես է, ապա որքան էլ ցավալի լինի, որ մարդիկ կարող են աշխատավայրից ու եկամտից զրկվել, որոշակի արդարություն կա այն բանում․ մեծ հաշվով՝ Նիկոլ Փաշինյանին ընտրող-պաշտողները ստանում են այն, հանուն իչի քվեարկել են, հանուն ինչի հարձակվում էին Նիկոլի հեռացումն ու դատապարտումը պահանջող հայ մարդկանց վրա:

Նրանք ստացել են իրենց փայ «ապագան»: Ու Բոլորն էլ շարունակելու են ստանալ:

Հետաքրքիր էր և այն պահը, երբ գործազուրկ դառնալուց «5 պակաս» առևտրականները դիվանագետների նախանձ շարժող նրբանկատությամբ էին խոսում իրենց ոչ պայծառ հետագայի մասին՝ ձգտելով հնարավորինս մեղմ արտահայտվել կոնկրետ օրվա իշխանության հասցեին: Զարմանալի է, որ իրենց ներկրած հիմնականում թուրքական շորեղենը պատառոտելով՝ վրա չտվեցծին «նախկինների» վրա:

Հա, ու ամենակարևորը՝ «մի քաղաքականացրեք»: Դա չասվեց, բայց ընդհանուր տպավորությունն այդպիսին էր:

Հետաքրքիր է. 600 հոգու գործազուրկ դառնալը հուզելո՞ւ է որևէ մեկին: Դա հետաքրքի՞ր է որևէ մեկին մի երկրում, մի հանրույթում, որին առանձնապես չի հետաքրքրում, որ 120 հազար հայ մարդ արդեն ամիսուկես է, ինչ թշնամու կողմից շրջափակված է՝ պարենային, դեղորայքային սուղ պայմանների մեջ:

Մյուս կողմից՝ 600 գործազուրկ այս կողմ, 600 գործազուրկ այն կողմ: Նիկոլ Փաշինյանի համար կարևոր է, որ իր քպ-ները բոլ-բոլ պարգևավճարներ ստանան, իրենց ազգականներին տեղավորեն աշխատանքի, օրինակ, ՍԴ դատավոր դառնա ու մարդուն իր պատավատի շոֆեռ նշանակի...

Սա Նիկոլ Փաշինյանի «նոր Հայաստանն» է, որ արդեն Հայաստան չէ:

Արմեն Հակոբյան

Աղբյուրը՝ yerevan.today