Պարոն Փաշինյան, բա ասում եք՝ նոր Հայաստանում ենք ապրում, բայց իրականում բլեֆ է, և նախկիններից բեթար վիճակում ենք ապրում․ահազանգ

Պարոն Փաշինյան, 12․06․2020թ․-ին Ստեփանավանից Տաշիր քաղաք եմ մեկնում անձնական հարցով, որտեղ ճանապարհին ինձ քաղաքացիական համազգեստով մի երիտասարդ տղա է կանգնեցնում և սկսում է ինձ հարցեր ուղղել, թե ես ով եմ, ինչ եմ, ինչ գործ ունեմ Տաշիր քաղաքում։ Պատասխանում եմ, որ իմ անձնական հարցով եմ ժամանել, և սկսում է այլ հարցեր տալ, հետո ես կոշտ եմ արձագանքում, որից հետո մեքենան նկարում է այդ անձը և հեռախոսազանգ է կատարում ինչ-որ տեղ, մոտ մի քանի րոպե վիճաբանում ենք, և այդ անձը ներկայանում է ոստիկանության աշխատակից, այն էլ՝ բանավոր, որից հետո ես փորձում եմ շարժվել, իսկ նշված անձն իր մեքենայով հետապնդում է, ու քիչ անց դիմացից շրջափակում են, և ատրճանակով զինված և այլ մի 4-5 անձինք բղավելով, գոռգոռալով պահանջում են՝ մեքենայից իջնեմ, թե չէ կկրակեն, ինչից հետո առանց որևէ պատճառ ասելու փռում են ասֆալտին, բառիս բուն իմաստով, սկսում հայհոյել։ Ես պատասխանում եմ հայհոյանքով, և սկսում են հարվածել մարմնիս տարբեր մասերին ու բռնություն գործադրելով ստիպողաբար նստեցնում ինչ-որ BMW մակնիշի ավտոմեքենա, որտեղ, աջ և ձախ կողմից ձեռքերս ոլորած, սկսում են հարվածել 2-3 անձ, թե ինչու եմ ես իրենց հայհոյանքին պատասխանել հայհոյանքով, և մինչև ոստիկանության Տաշիրի բաժին հարվածում են, հետո 3 ժամ մեկուսացնում են։

3 ժամվա ընդացքում 2 անգամ շտապօգնություն է կանչվում ոստիկանության Տաշիրի բաժին, և արձանագրվել են թե՛ վնասվածքներս, թե՛ առողջական վիճակիս մասին․ ճնշումս գրանցվել է 180-140, շտապօգնության բրիգադն առաջին օգնություն ցույց տալուց հետո հեռացել է, և 2-րդ անգամ է կանչ գրանցվել 11։30-ի սահմաններում։ Դրանից հետո՝ 11։50-ին, ուղեկցում են քննիչ Արմինե Մղոյանի մոտ, որտեղ հարցաքննվել եմ ինչ-որ բնակարանային գողության կասկածանքով և հարցաքննվել որպես վկա, ու գիշերը՝ ժամը 2-ի սահմաններում, ինձ տուն են բերել ոստիկանության աշխատակիցները։

13․06․2020թ․-ին Ստեփանավան քաղաքի հիվանդանոցում արձանագրվել է թվով 3 վնասվածք մեջքիս, ոտքիս, ձեռքիս վրա, իսկ 14․06․2020թ․-ին ոստիկանության Տաշիրի բաժինի պետի տեղակալը և այլ աշխատակիցներ և Ստեփանավանի բաժնի պետի տեղակալ Ա․ Չթաչյանն ու մի խումբ ոստիկաններ շրջափակել են տունս, որպեսզի ապօրինի բերման ենթարկեն իբրև քննիչի մոտ քննչական գործողության շրջանակներում, այն էլ՝ 14․06․2020թ՝ ժամը 20։50-ին, որից հետո տեղեկացվել են մի շարք ԶԼՄ-ներ, ՄԻՊ-ի աշխատակազմը, Հելսինկյան քաղաքացիական ասամբլեայի գրասենյակը, և 2-3 ժամ անց հեռացել են։

Այսօր՝ այս պահին, տանս մոտ կրկին մի քանի մեքենաներ կան տարբեր վայրերում կանգնած, որոնք Տաշիրի և Ստեփանավանի ոստիկանության աշխատակիցների են։

Պարոն Փաշինյան, բա ասում եք՝ նոր Հայաստանում ենք ապրում, իրավական պետություն է, բարձր են գնահատվում մարդու իրավունքները և այլն։ Փաստորեն, ստացվում է, որ իրականում բլեֆ է, և նախկիններից բեթար վիճակում ենք ապրում։

Խնդրում եմ որպես ՀՀ հպարտ քաղաքացի, որպես 3 միլիոն վարչապետներից մեկը՝ ընթացք տաք այս հարցին, այս բեսպրեդելին։ Տեղեկացնեմ, որ օրեր առաջ ՀՀ վճռաբեկ դատարանը իմ և իմ ընկերոջ վերաբերյալ նախադեպի առնչությամբ որոշում է կայացրել խոշտանգման գործով, որը տեղի է ունեցել 2017թ․-ի Ստեփանավանի ոստիկանության բաժնում։

Այսօր՝ 15․06․2020թ․-ին, մայրս մեկնել է ոստիկանության Ստեփանավանի բաժին՝ իմանալու, թե ինչու են ինձ կանչել, ծեծի ենթարկել, իսկ բաժնի պետ Գուրջանյանը սպառնացել է, որ մի քանի օրից մորս կկալանավորի։ Նշեմ, որ բաժնի պետը և տեղակալ Ա․ Չթաչյանը հայտնի են որպես բեսպրեդել, բռնություն իրականացնող, կոռումպացված պաշտոնատար անձինք։