Քաոսային պատասխան Ալիևից

Ադրբեջանի նախագահ Իլհամ Ալիևն այսօր անդրադարձել է ղարաբաղյան կարգավորման գործընթացին: Փաստացի սա Մնացականյան-Մամեդյարով վերջին տեսակոնֆերանսից հետո պաշտոնական Բաքվի առաջին արձագանքն է:

Այսպես, Ալիևը ոչ ավել, ոչ պակաս հայտարարել է, որ Արցախի հակամարտության կարգավորման հարցով բանակցային գործընթաց փաստացի չկա, իսկ երկու երկրների ԱԳՆ ղեկավարների միջև տեղի ունեցող տեսակոնֆերանսները ոչ մի նշանակություն չունեն։

Ալիևը ադրբեջանական լրատվամիջոցներին տված հարցազրույցի ժամանակ նաև հավելել է, որ պաշտոնական Բաքուն չի նախատեսում փոխել իր դիրքորոշումը արցախյան հակամարտության հարցում. «Այսօր փաստացի բանակցային գործընթաց տեղի չի ունենում: Ադրբեջանի և Հայաստանի ԱԳ նախարարների տեսակոնֆերանսները ոչ մի նշանակություն չունեն: Սա միայն նշանակում է, որ գործունեություն է ծավալում ԵԱՀԿ Մինսկի խումբը: Լավ, մինչև երբ»:

Ալիևն այնուհետև ընդգծել է, որ Բաքուն ԵԱՀԿ Մինսկի խմբի համանախագահներից ակնկալում է հստակ հայտարարություններ: Ադրբեջանի նախագահը նաև ընդգծել է, որ ցանկանում է վարել առարկայական բանակցություններ: «Այո, այդ դեպքում մենք կմասնակցենք բանակցություններին: Հակառակ պարագայում բանակցությունների անհրաժեշտություն չկա: Մենք սպասում ենք դա ԵԱՀԿ Մինսկի խմբից և ամուր կանգնած ենք մեր դիրքի վրա, արդարությունը մեր կողմն է»,-հավելել է Ալիևը:

Մինչ Հայաստանի Արտգործնախարարն Արցախ էր գնացել ու խոսում էր բանակցություններում Արցախի մասնակցության վերականգման, կարևորում էր Արցախի ժողովրդի իրավունքների ու ձայնի պաշտպանությունը, ահա Ալիևը որոշեց այսպես ասած՝ հիշեցնել Բաքվի սպասելիքների ու ակնկալիքների մասին:

Հիմա ստացվում է, որ պաշտոնական Բաքուն համարում է, որ բանակցություններ չկան, այն ինչ ընթանում է՝ դա Ադրբեջանի ակնկալածը չէ:

Ստեղծվել է անհասկանալի իրավիճակ՝ Ալիևը պահանջում է «առարկայական բանակցություններ», այսինքն, նրա դժգոհությունից կարելի է հասկանալ, որ այն ինչի շուրջ խոսում են Հայաստանն ու Ադրբեջանը՝ դա Բաքվի սրտով չէ:

Ստացվում է, որ Ադրբեջանի իշխանություններին չեն գոհացնում բանակցություններում քննարկվող թեմաները, սկզբունքները:

Հայկական կողմն էլ մյուս կողմից ասում է՝ և՛ կրակել, և՛ բանակցել չի ստացվի, ու առաջ է քաշում Արցախի մասնակցության հարցը բանակցություններում:

Ակնհայտ է, որ կողմերի դիրքորոշումները ոչ միայն հեռու են, այլև Ալիևը փորձում է ցույց տալ, որ բանակցային գործընթացը քաոսային իրավիճակում է. բանակցություններ չկան, քանի որ «առարկայական բանակցություններ» չեն ընթանում:

Մետաքսյա Շալունց