Արտակարգ և զավեշտալի դեպք Կոտայքի մարզում

Aug 25, 2016 Comments Off on Արտակարգ և զավեշտալի դեպք Կոտայքի մարզում

Այսօր՝ օգոստոսի 25-ին, արտակարգ ու զավեշտալի դեպք է տեղի ունեցել Կոտայքի մարզում։ Ժամը 09։30-ի սահմաններում ՀՀ Արտակարգ իրավիճակների նախարարության փրկարար ծառայության օպերատիվ կառավարման կենտրոն ահազանգ է ստացվել, որ Արզական գյուղի «Արցախ» հանգստյան տան 5-րդ հարկի պատշգամբ ձի է մտել և նրան դուրս բերելու համար անհրաժեշտ է փրկարարների օգնությունը։ Ինչպես դեպքի վայրից հայտնում է ֆոտոլրագրող Գագիկ Շամշյանը, նշված վայր են ժամանել Չարենցավանի հրշեջ-փրկարարական ջոկատը՝ ջոկատի հրամանատար Հայկ Ասատրյանի և հերթափոխի պետ Ժիրայր Խոջոյանի գլխավորությամբ՝ 1 մարտական հաշվարկով։ Փրկարարները գյուղացիների օգնությամբ հատուկ ճոպանների միջոցով գրեթե 1 ժամ չարչարվելով՝ կարողացան ձիուն անվտանգ 5-րդ հարկից իջեցնել բակ։ Ֆոտոլրագրողի տեղեկություններով՝ 3 տարեկան ձին պատկանում է Արզականի բնակիչ Արմեն Եղիազարյանին։ Իսկ նշված հանգստյան տունը կիսակառույց ու ամբողջովին վթարային է։ Գյուղացիներն էլ ասում էին, որ մի քանի հարկեր ծառայում են որպես խոշոր եղջերավոր անասունների համար «հանգստավայր»։

Գլխավոր Թողարկում, Դեպքեր և իրադարձություններ
Մեկնաբանությունները փակ են: