ՀՀԿ-ի «բամփը» ՀՅԴ-ի գլխին

Feb 03, 2016 Comments Off on ՀՀԿ-ի «բամփը» ՀՅԴ-ի գլխին

Խորհրդարանական ընդդիմության պահվածքը արդեն խղճահարություն է առաջացնում: Մի ընդդիմադիր հռչակվածը հայտարարում է իշխանության հետ կոալիցիա կազմելու մասին, բայց կույս մնալու եւ հաճույք ստանալու սկզբունքով աքացի տալիս ապագայի գործընկերներին՝ արձանագրելով վերջինի հեղինակազրկված լինելու փաստը, մեկ ուրիշը խանդից հուժկու հայտարարություններ անում, որ իրենք ինքնանպատակ կոալիցիա կազմող չեն ու պաշտոնները նրանց չեն հետաքրքրում,ոչ թե, որ իրականում աղվեսի ու խաղողի պատմության մեջ են հայտնվել, իսկ ֆիասկո ապրող ՀԱԿ-ը փոխարենը փորձում է իրավիճակից օգտվել ու ցեխ շպրտել գործընկերոջ կողմը՝ միամիտ պատրանքով, թե իրեն կազատի իր վրայի ցեխից: ՀԱԿ խմբակցության պատգամավոր, ԵԽԽՎ պատվիրակության անդամ Լեւոն Զուրաբյանը այսօր չնայած ասուլիս էր հրավիրել հակահայ բանաձեւերի եւ իր աշխատանքների մասին խոսելու, սակայն իր ողջ պաթոսը նա սպառեց ՀՀԿ-ՀՅԴ առաջիկա կոալիցիա թեմայի շուրջ:

Զուրաբյանն ասաց, թե ՀՅԴ-ն այլեւս հասկացել է, որ վստահություն չունի հանրության մեջ, իհարկե, չէր խանգարի զուգահեռներ անցկացնել, թե ինչպիսի վստահություն ունի ՀԱԿ-ը, բայց Զուրաբյանը գլուխ չցավեցրեց, մեկ կուսակցության օրինակն էլ բավական է, քանի որ ընդդիմադիր խմբակները մեծ հաշվով չեն տարբերվում իրարից ոչ վարկանիշով, ոչ էլ գործունեությամբ.«Դեմոկրատական երկրներում կոալիցիա կազմելն ունի մեկ նշանակություն` այն է, որ եթե ուժը չունի 50 տոկոս ձայն կամ ավելի, ապա նա այլ ուժի հետ կազմում է քաղաքական կոալիցիա, որպեսզի կարողանա լինել մեծամասնություն: Հիմա որևէ մեկը կարո՞ղ է ասել, որ ՀՀԿ-ն պառլամենտում չունի մեծամասնություն, բնականաբար, չի կարող: Այստեղից սկսում եմ մտածել, որ հանրաքվեից հետո ստեղծված իրավիճակն ապացուցեց, որ այս իշխանությունները որևէ աջակցություն չունեն հասարակության կողմից: Բոլորը գիտեն, որ հանրաքվեն կեղծվել է»,- արձանագրեց նա, բայցեւայնպես չխոսեց, որ այդ կեղծմանը դե ֆակտո նաեւ ՀԱԿ-ն է մասնակցել: Հանրաքվեից հետո բացահայտվեց, որ բազմաթիվ ընտրատեղամասերում ՀԱԿ անդամները կամ գործարքի են գնացել, կամ էլ չեն դիմացել ճնումներին, խորհրդանական է, որ ընդամենը երեք տասնյակ բողոքարկման դիմում են ներկայացրել:

Դրա փոխարեն Զուրաբյանը պնդեց, որ փաստացի ՀՀԿ-ն ոչնչացված է և նրա ուժը միայն իշխանության ձեռքի տակ գտնվող ռեսուրսն է: «Ռուստամյանը հստակ ասաց, որ ՀՀԿ-ն հեղինակազրկված է, դուք պատկերացնո՞ւմ եք` դա ինչ է նշանակում, որ կոալիցիոն անդամն է նման բան ասում: Նշանակում է, որ նա էլ գիտի, որ ՀՀԿ-ն ոչնչացված է և գոյություն չունի, և միակ բանը, որ կա, իշխանության լծակներն են: Նա ասում էր, որ իրենց ռեյտինգի վրա բացասաբար կազդի ՀՀԿ-ի հետ կոալիցիան, ի՞նչ է` ՀՅԴ-ն քաղաքական ինքնասպան է, մահապարտ է, որ հանուն, այպես կոչված մեծ գործերի, իրեն պայթեցնի: Բնականաբար, ոչ, իրականում, նրանց հաշվարկները շատ պարզ են, նրանց հաշվարկը հիմնականում մի բանի համար է՝ նրանք վստահ են, որ Սերժ Սարգսյանը պահելու է իր իշխանությունը, մնալու է իշխանության գլխում՝ կատարելով բոլոր հնարավոր օրինախախտումները և հիմա ՀՅԴ-ն պարզապես փորձում է թռչել գնացքի վերջին վագոնի մեջ, որպեսզի ներխուժի ապագա խորհրդարան>>:

Զուրաբյանը նաեւ ռոմանտիկ հայտարարություններ արեց, ըստ նրա՝ ՀԱԿ-ն այսօր հեղինակության կորուստ չունի. Ինչ վերաբերում է ՀԱԿ-ի` ԱԺ խորհրդարանական ուժերի հետ դաշինքներ կազմելուն, Զուրաբյանն ասաց, որ չի բացառում համագործակցությունն ուժերի հետ, որևէ դաշինք չի ժխտում: Հարցին, թե ՕԵԿ-ի հետ կհամագործակցե՞ք, պատասխանեց. «ՕԵԿ-ի հետ տարբեր օրենսդրական նախաձեռնությունների շուրջ համագործակցում ենք, սակայն դաշինք բացառում եմ»:

Ժամանակին ՀԱԿ-ը արգելում էր իր ներկայությամբ հնչեցնել անգամ ՕԵԿ անվանումը՝ դա համարելով վիրավորանք ուղղված իրենց դեմ, հիմա ժամանակները փոխվել են, ՀԱԿ-ի պահանջները նույնպես, այսպիսով կարելի է արձանագրել, թե ինչպիսի վարկանիշ ունի ՀԱԿ-ը, որն արդեն խոսում է ՕԵԿ-ի հետ համագործակցության մասին:Ի դեպ, ոչ պակաս զավեշտալի դրության մեջ են հայտնվել իշխանության հովանին ունեցող դաշնակցականները:

ՀՅԴ-ական Արմեն Ռուստամյանը երեկ հեղինակազրկված էր որակել իշխանություններին, ինչից հետո հայտնվել էր ՀՀԿ-ականների պատասխանների տարափի տակ:

ՀՀԿ խմբակցության ղեկավարը հայտարարել էր, որ եթե Ռուստամյանը մի անգամ էլ կրկնի, ապա հետևություններ կանեն:Ռուստամյանը այսօր փորձեց հետ կանգնել երեկվա խոսքերից, լղոզել հստակ ասված հայտարարությունը՝ մեղքը գցելով լրագրողների վրա, թե իբր իր խոսքը կոնտեքստից կտրել են: Ավելին, նա ասաց, որ ժողովուրդը նույնկերպ է ընդունում նաեւ Դաշնակցությանը:

Ամենայն հավանակությամբ էլ ՀՀԿ-ն «կբամփի» ՀՅԴ-ի գլխին:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: