Հայերը եւ հույները պետք է միավորվեն

Jan 20, 2016 Comments Off on Հայերը եւ հույները պետք է միավորվեն

Աշխատանքային այցով Հունաստանի Հանրապետությունում գտնվող ՀՀ ԱԺ փոխնախագահ, Հայաստան-Հունաստան պատգամավորական բարեկամության խմբի ղեկավար Էդուարդ Շարմազանովը հունվարի 20-ին հանդիպել է Հունաստանի խորհրդարանի նախագահ Նիկոլաոս Վուտսիսի հետ: ԱԺ փոխնախագահը շնորհավորել է Նիկոլաոս Վուտսիսին՝ Հունաստանի խորհրդարանի նախագահ ընտրվելու կապակցությամբ: Էդուարդ Շարմազ անովը կարեւորել է հայ-հունական բազմադարյա ջերմ եւ բարեկամական հարաբերությունները: Նա հույս է հայտնել, որ միջխորհրդարանական երկկողմ հարաբերությունները հետայսու եւս կշարունակեն զարգանալ: Ինչպես տեղեկացրին ՀՀ ԱԺ փոխնախագահ Էդուարդ Շարմազանովի աշխատակազմից, երկուստեք կարեւորվել են փոխայցելությունները եւ գործնական սերտ շփումները:

«Նախորդ դարասկզբին հայերը եւ հույները, որպես քրիստոնյաներ, ցեղասպանության ենթարկվեցին Օսմանյան Թուրքիայում: Մենք բարձր ենք գնահատում Հունաստանի խորհրդարանի կողմից Հայոց ցեղասպանությունը ճանաչելու փաստը, իսկ հետագայում՝ ռասիզմի եւ այլատյացության դեմ օրինագծի ընդունումը, որով քրեականացվեց նաեւ Հայոց ցեղասպանության ժխտումը: Հարկ է նշել, որ դեռեւս Օսմանյան Թուրքիայում Հայկական հարցը հայերի հետ առաջինն արծարծել են Օսմանյան խորհրդարանի հույն անդամները: Հայերը եւ հույները պետք է միավորեն իրենց ջանքերը թուրքական ժխտողականության դեմ պայքարում»,- նշել է Էդուարդ Շարմազանովը:

Նիկոլաոս Վուտսիսը գոհունակություն է հայտնել, որ անցյալ տարվա մարտի 24-ին Հայաստանի խորհրդարանը միաձայն ընդունել է Օսմանյան Թուրքիայում հույների եւ ասորիների ցեղասպանությունը դատապարտող հայտարարությունը:

Անդրադառնալով ԼՂ հակամարտության կարգավորմանը՝ ԱԺ փոխնախագահն ընդգծել է, որ Հայաստանը ԼՂ հիմնահարցի կարգավորումը տեսնում է բացառապես խաղաղ միջոցներով՝ ԵԱՀԿ Մինսկի խմբի ձեւաչափով: Էդուարդ Շարմազանովն անընդունելի է համարել բանակցային ձեւաչափի փոփոխության փորձերը:

Հունաստանի խորհրդարանի նախագահն իր հերթին նշել է, որ Հունաստանը սատարում է ԵԱՀԿ Մինսկի խմբի համանախագահների ջանքերը:

Լուրեր
Մեկնաբանությունները փակ են: