Հայտնի խնամիները կամ իշխանական խաչասերումներ /տեսաշար/

Հուլ 07, 2013 Չի մեկնաբանվել

Հատկապես վերջին տարիներին իշխանական շրջանակներում, ինչպես հայտնի է, մոդայիկ են դարձան «էլիտար ամուսնությունները», այսպիսով իշխող ռեժիմի ներկայացուցիչները թերեւս տեսակի պահպանման խնդիր են փորձում լուծել, միավորում հարստությունը: Ավելին գործող ռեժիմի ներկայացուցիչները կարծես յուրօրինակ մարաթոն են սկսել, թե ով կկարողանա իր երեխային ավելի բարձրաստիճան պաշտոնյայի երեխայի հետ ամուսնացնել: Եւ այսպես, ձեր ուշադրությանն ենք ներկայացնում իշխանական հայտնի խաչասերումները, կամ ինչպես ասում են, ով ում է խնամի:
Սերժ Սարգսյանի ավագ դուստրն ամուսնացել է «Սուրբ Գրիգոր Լուսավորիչ» բժշկական կենտրոնի տնօրեն, Երեւանի ավագանու անդամ Արա Մինասյանի որդի Միքայել Մինասյանի հետ:Իսկ կրտսերը Սահմանադրական դատարանի նախագահ Գագիկ Հարությունյանի աներորդու հետ: Ռոբերտ Քոչարյանի դուստրը ամուսնացած է «Բարս» անշարժ գույքի գործակալության սեփականատեր Մարինա Չատինյանի որդու հետ: Քոչարյանի մեծ որդու աներն է ԱԺ ՀՀԿ-ական պատգամավոր Վոլոդյա Բադալյանը: Իսկ փոքրը Լեւոնը, բոլորը գիտեն, որ երգչուհի Սյուզան Մարգարյանի եւ դերասան Հրաչյա Հարությունյանի փեսան է: Իրար խնամի են Երեւանի նախկին քաղաքապետ Աշոտ Միրզոյանն ու Ռոբերտ Քոչարյանի խնամի Վոլոդյա Բադալյանը: ԱԺ նախագահ Հովիկ Աբրահամյանի որդին ամուսնացած է ԲՀԿ ղեկավար, խոշոր գործարար Գագիկ Ծառուկյանի  դստեր հետ: Վերջինի մյուս աղջկան էլ կնության է առել Կապի եւ տրանսպորտի նախկին նախարար Անդրանիկ Մարգարյանի որդին: Ծառուկյանի դստրերից մեկն էլ ԱԺ ԲՀԿ-ական պատգամավոր, գործարար Մուրադ Գուլոյանի հարսն է, Աբովյանի քաղաքապետ Կարո Գուլոյանի կինը: Խնամիներ են նաեւ նախկին ՕԵԿ-ական Էդուարդ Մադաթյանը, նույն ինքը Խուճուճ Էդոն եւ ԱԺ ՀՀԿ-ական պատգամավոր Մհեր Սեդրակյանը: Իրար հետ են ամուսնացած նաեւ Ազգային ժողովի նախկին ՕԵԿ-ական, ապա ՀՀԿ խմբակցության, իսկ հիմա ԲՀԿ-ական պատգամավոր Գրիգորի Մարգարյանի, Բելաջիոյի Գրիշի դուստրը եւ ՀՀԿ խմբակցության պատգամավոր, գործարար Սամվել Ալեքսանյանի (Լֆիկ Սամո) եղբորորդին: Խնամիներ են ՀՀ գլխավոր դատախազ Աղվան Հովսեփյանը եւ ԱԺ ՀՀԿ-ական պատգամավոր, գործարար Գարեգին Նուշիկյանը: Վերջինն աղջիկ է տվել Գառնիկիչի որդուն: Բոլորովին վերջերս ամուսնացան Գագիկ Բեգլարյանի դուստրը և դատավոր Գագիկ Խանդանյանի որդին: Տաշիր գրուպի Կարեն Կարապետյանն էլ Հրանուշ Հակոբյանի քույր Խաչանուշի խնամին է: Ամուսնացած են Կարապետյանի որդին եւ Մամոգրաֆիայի կենտրոնի տնօրեն Խաչանուշ Հակոբյանի դուստրը: Հայտնի խնամիներից են նաեւ ԱԺ ՀՀԿ-ական Նահապետ Գեւորգյանը եւ դատախազ Վարդգես Գեւորգյանը: Երեւանի նախկին քաղաքապետ, այժմ անշարժ գույքի կադաստրի պետական կոմիտեի նախագահ Երվանդ Զախարյանի դուստրն ամուսնացավ կալանավայրերի վարչության այլեւս նախկին պետ Սամվել Հովհաննիսյանի որդու հետ: ՀՀ Վերահսկիչ պալատի նախագահ Իշխան Զաքարյանի դուստրը նախկին դատավոր Սլավիկ Թորոսյանի որդու հետ: Իրար խնամի են ՀՀ ոստիկանության Երեւանի քաղաքային վարչության պետի նախկին տեղակալ Հայկ Միլիտոնյանն ու Էրեբունու նախկին ոստիկանապետ Ավետիք Մկրտչյանը: ՀՀ ոստիկանության Երեւանի քաղաքային վարչության նախկին պետ Ներսիկ Նազարյանի որդին ամուսնացավ մոսկվաբնակ հայ գործարարի դստեր հետ, ում կարողությունը 50-60 միլիոն դոլար է գնահատվում: Հանրային խորհրդի նախագահ, ԱԺՄ առաջնորդ Վազգեն Մանուկյանի դուստրն էլ «Երկիր մեդիա» հեռուստաընկերության առաջին տնօրեն, հայտնի դաշնակցական Ռուբինա Ղազարյանի որդու Սահրատ Պետրոսյանի կինն է: Ինչպես տեսնում եք, առաջին հայացքից այնքան էլ հասկանալի չէ, թե իրականում քաղաքականության մեջ ով ում բարեկամն է: Հայտնի է, որ մի շարք պաշտոնյաներ, օլիգարխներ ու հասարակական – քաղաքական գործիչների զավակներն իրար հետ ընտանիք են կազմել ու երբեմն նաև հայրերի լեզուները կարճացնելու պատճառ դարձել:

Հ.Գ.-Ցանկն այսքանով, անշուշտ, չի սահմանափակվում:

Հ.Գ.-Ի դեպ, Էլիտար այս հարսանիքների ժամանակ կարեւոր բաղադրիչներից է նաեւ հարսանիքի քավորը, որն էլ ոչ պակաս էլիտար ծագում պետք է ունենա: Իսկ այս մասին հաջորդիվ:

Պատրաստեց Անի Սահակյանը

Գլխավոր Թողարկում, Լուրեր
Անդրադարձներ չկան to “Հայտնի խնամիները կամ իշխանական խաչասերումներ /տեսաշար/”

Մեկնաբանել