Բանդան ակտիվացել է

Jan 21, 2019 Comments Off on Բանդան ակտիվացել է

Նիկոլ Փաշինյանի հեղափոխության արդյունքում կարող ենք արձանագրել, որ Հայաստանում քրեաօլիգարխիկ մի բանդային եկել է փոխարինելու մյուսը: Ահավասիկ, դա երեւաց Մանվել Գրիգորյանի խափանման միջոցի փոփոխության դեմ կազմակերպված բողոքի ակցիաների ժամանակ, որի նախաձեռնողներն ու ակտիվիստները ուղղակի կամ անուղղակի կերպով առնչվում են Էջնմիածնի հայտնի հեղինակություն Դոն Պիպոյին՝ Արթուր Ասատրյանին, որը Մանվել Գրիգորյանի վաղեմի ախոյանն է եւ վերջինի պատճառով տարիներ առաջ ստիպված է եղել արտագաղթել Հայաստանից:

Պիպոյի ոտքը հայրենիք նորից բացվեց, երբ վարչապետ դարձավ իր ընկեր Կարեն Կարապետյանը, սակայն նույնիսկ այն ժամանակ մեր հեղինակությունը չստացավ այնքան ազատություն, որը բախվեր իր ախոյանի ազատությանը, ինչը տեղի ունեցավ Նիկոլ Փաշինյանի իշխանության գալուն պես: Էջմիածնում Դոն Պիպոն հրապարակային եւ ծածուկ այնպիսի արշավ նախաձեռնեց Մանվել Գրիգորյանի դեմ, բնականաբար, Փաշինյանի թողտվությամբ, որն ի վերջո հանգեցրեց վերջինիս կալանավորմանը: Սակայն որպեսզի չստացվի այնպես, որ նոր՝ հեղափոխական իշխանությունը աջակցում է քրեածին տարրերին, մի որոշ շրջան անազատության մեջ հայտնվեց նաեւ Դոնը: Հիմա տեղեկություններ կան, որ Մանվել Գրիգորյանի խափանման միջոցի փոփոխության դեմ կազմակերպվող բողոքի ակցիաները նույնպես նրա ակտիվ միջամտությամբ են իրականացվել: Այդ մասին են վկայում նաեւ նրա մտերիմների մասնակցության փաստը: Նշենք, որ հավաքներից մեկի ժամանակ երրորդմասցի ներկայացած տղամարդը Նիկոլ Փաշինյանի թիմից է, նա ընտրությունների ժամանակ նաեւ վստահված անձ է եղել: Ընդհանրապես օրեցօր պարզ է դառնում, որ մասնակիցների մեծ մասը կամ ինչ-որ առումով կապված է իշխանության, կամ էլ Դոն Պիպոյի հետ:

Image result for բողոքի ակցիաներ էջմիածնում

Իհարկե, մի քանի օր է` Փաշինյանի հայտնի լայվից հետո փողոցներ այլեւս չեն փակվում, քանի որ այդպես է հրամայել Նիկոլ Փաշինյանը, սակայն այս տարրերը դեռեւս չեն գնացել տներով: Բանն այն է, որ Մանվել Գրիգորյանի դեմ բողոքի այս ակցիաներով Փաշինյանի իրական նպատակը Ռոբերտ Քոչարյանի վերաբերյալ հող նախապատրաստելն է եւ հետագայում արդարանալը, որ Մանվել Գրիգորյանի դեպքում էլ կար հանրային դիմադրություն: Եւ իշխանության՝ այս զանգվածներին աջակցությունը ապացուցվում է նաեւ հենց այն օրինակով, որ ցուցարարները հայտնի հորդորից հետո դադարեցրել են փողոցներ փակելն ու պահանջներ ներկայացնելը:

Հիշեցնենք, որ Նիկոլ Փաշինյանը մի քանի օր առաջ ֆեյսբուքյան էջում «լայվ» էր մտել, անդրադարձել, մասնավորապես, Մանվել Գրիգորյանի հետ կապված Էջմիածնի փողոց փակելու թեմային: Փաշինյանը կոչ է արել փողոց չփակել՝ դա հիմնավորելով այն բանով, որ փակողները նման լիազորություն չունեն: Այն, որ փողոց փակելով չի կարելի կամայական որոշումներ պարտադրել ու խախտել այլոց իրավունքը, անվիճելի է, բայց ամբողջ խնդիրն այն է, որ Փաշինյանը այս ոլորտն էլ է փորձում մենաշնորհել եւ թույլատրել՝ ով կարող է փակել, ով ոչ: Իսկ առավել վտանգավորն այն է, որ իբր թե ըմբոստ հանրությունն էլ խելոք լսում է սիրելի վարչապետին ու հաջորդ վայրկյանից դադարեցնում փողոց փակելը: Իրականում պարզ է, որ դա ուղղորդվող մարդիկ են, որոնք, ինչպես ասացինք, ասպարեզ են բերվել հայտնի կենտրոնից եւ հատուկ առաքելությամբ, որը նաեւ իշխանության շահն է սպասարկում: Այդ պատճառով էլ կատարում են իրենց տիրոջ կամքը: Իսկ արդյունքում Հայաստանում ձեւավորվում է մի մթնոլորտ, որտեղ մի քրեօլիգարխիկ բանդային գալիս է փոխարինելու մյուսը, Մանվել Գրիգորյանը Փաշինյանի սրտով չէր, իսկ ահա, Դոն Պիպոն, որը ողջ կյանքում պատրաստ է ծառայել բոլոր տերերին, կդառնա իր իշխանության գործիքը:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: