Но это еще цветочки

Jan 19, 2019 Comments Off on  Но это еще цветочки

Նախօրեին լրագրողների հետ հանդիպման ժամանակ ՊԵԿ նախագահ Դավիթ Անանյանը, ներկայացնելով  2018 թվականի արդյունքները, հայտարարել է, որ 123 աշխատակից կրճատվել է: Ընտրությունը, ինչպես ինքը` Անանյանն է նշել, կատարվել է լավերի և լավագույնների մեջ, բայց քանի որ դրված է եղել օպտիմալացման ևկառուցվածքային փոփոխությունների պահանջ, իրենք գնացել են այդ քայլին: «Դեռևս հոկտեմբերի 20-22-ին հարկային հսկողություն իրականացնող շուրջ 7 վարչության աշխատակիցներ, որոնց ընդհանուր թվաքանակը 580 է, ստացել էին կառուցվածքային փոփոխությունների կատարման և դրանցով պայմանավորված հնարավոր կրճատումների վերաբերյալ ծանուցում։ Ծանուցման ժամկետն ավարտվում էր դեկտեմբերի 22-ին։ 580 աշխատակիցներից 128-ը կրճատվել են»,- նշել է Դավիթ Անանյանը և ավելացրել, թե ցավոք, շատ դեպքերում ընտրությունը կատարել են լավի և լավագույնի միջև, և սա դեռ սկիզբն է:

Սա թերևս նշանակում է, որ կրճատումները շարունակվելու են և էլի կլինեն մարդիկ, ովքեր կարժանանան արդեն կրճատված 128 աշխատակիցների ճակատագրին: Թե ինչ սկզբունքով, ովքեր կամ ինչ չափանիշով են ազատել լավերին լավագույններից` Դավիթ Անանյանը չի մանրամասնել: Այնուամենայնիվ, եթե որպես կառույցի ղեկավար՝ նա ընդունում է, որ կրճատվողներն իրենց գործում պրոֆեսիոնալ են եղել, ուրեմն այստեղ վստահաբար խնդիր կա: Ընդհանրապես արհեստավարժ կադրերի առկայությունը հետհեղափոխական Հայաստանի լրջագույն խնդիրներից է: Ազգային ժողովի ներկա կազմը իր անցած ճանապարհով, որոշ  պատգամավորների` ամբիոնից հնչեցրած թոթովախոս ելույթները, հստակ ցույց տվեցին, թե որքան կարևոր են փորձառությունն ու արհեստավարժությունը պետության համար:

Եթե ՊԵԿ-ում միանգամից այդքան մարդու կրճատումը հիմնավորում են համակարգի ուռճացմամբ, ապա պետք է նախ հասկանալ` նախկինում ինչ հիմնավորմամբ են ստեղծվել նման հզոր կառուցվածքային ստորաբաժանումները: Ամենակարևորը, պետք է հետևել և տեսնել` արդյոք կրճատումների գործընթացն ավարտին հասցնելուց որոշ ժամանակ անց նույն Դավիթ Անանյանը չի՞ սկսելու հակառակ գործընթացը և չի՞ փորձելու նորից ավելացնել հաստիքները: Նման նախադեպեր նախկին իշխանությունների ժամանակ բազմիցս եղել են: Կրճատումներն անցանկալի և ոչ յուրային կադրերից ազատվելու լավագույն միջոցն են. կրճատում են, որոշ ժամանակ անց համակարգ բերում յուրայիններին:

Ամեն դեպքում, Պետեկամուտների կոմիտեն 2018-ին գերակատարել է պլանը՝ հավաքելով ավելի քան 1 տրիլիոն 306 միլիարդ դրամ, ինչը 2018 թվականի «Պետական բյուջեի մասին» օրենքով նախատեսվածից 3,5 տոկոսով ավելի է։

Բացի այդ, ՊԵԿ նախագահ Դավիթ Անանյանի ներկայացմամբ, անցած տարի ՊԵԿ-ը գերակատարել է պլանը. 2018-ին հավաքված գումարը 2017-ին հավաքվածից ավելի է 14,5 տոկոսով: Այսինքն` ՊԵԿ աշխատակիցները, որպես այդպիսին, կատարել են իրենց առջև դրված խնդիրները և պետական գանձարանի հավաքագրման ծրագիրն ապահովել են 100 տոկոսով, մի բան էլ ավել: Ստացվում է, որ մարդկանց կրճատել են արդյունավետ աշխատելու համար:

 

Հայկ Դավթյան

 

Գլխավոր Թողարկում, Լուրեր, Վերլուծություն
Մեկնաբանությունները փակ են: