Հայկ Մարությանի համար ավելի հեշտ կլինի, քան Տարոն Մարգարյանի, Գագիկ Բեգլարյանի ու Կարեն Կարապետյանի

Oct 14, 2018 Comments Off on Հայկ Մարությանի համար ավելի հեշտ կլինի, քան Տարոն Մարգարյանի, Գագիկ Բեգլարյանի ու Կարեն Կարապետյանի

Երևանի ավագանու հոկտեմբերի 10-ի առաջին նիստի ընթացքում «Իմ քայլը» դաշինքի ընտրական ցուցակի առաջին համար Հայկ Մարությանը ստանձնեց Երևանի քաղաքապետի պաշտոնը:

Այնուհետեւ Երևանի նորընտիր քաղաքապետը, որն ակնհայտորեն հուզված էր պահի հանդիսավորությունից, շնորհավորել է ներկաներին Երևանի ավագանու առաջին նիստի կապակցությամբ: «Սա շատ հուզիչ պահ է, երջանիկ եմ, որ ավագանու անդամները ներկայացնում են Երևանի բնակիչներին»,- ասել է նա՝ հիշեցնելով, որ տեղ է ունեցել ավագանու ազատ, արդար և թափանցիկ ընտրություն: «Մենք բոլորս միասին ունենք պատմական հնարավորություն ի կատար ածել այն բոլոր երազանքները, որ տարիներ շարունակ ունեինք, ի կատար ածել այն երազանքները, որ ունեն մեր երևանցիները: Եվ ես վստահ եմ, որ ավագանու այս կազմով մենք կանենք այնպես, որ մեր երևանցիներն ամեն օր, ամեն ժամ ու ամեն վայրկյան ժպտան: Ես կարևորում եմ այս պահը: Երևանի ավագանու կազմը ես ըստ խմբակցությունների չեմ տարբերակում, որովհետև մենք բոլորս պետք է աշխատենք միասին, պետք է ամեն վայրկյան մտածենք մեր քաղաքի, մեր երևանցիների մասին»,- ասել է նա:

Դիմելով Երևանի ավագանու անդամներին՝ Հայկ Մարությանը հորդորել է միշտ ուշադիր լինել Երևանի բնակիչների բոլոր խնդիրներին: «Բնակիչների ահազանգերին անհապաղ արձագանքել ու բոլոր հարցերը դնել ավագանու նիստի քննարկմանն ու դրանց անհապաղ լուծումներ տալ»,- հորդորել է նա: Ըստ ամենայնի նորընտիր քաղաքապետը լավ չի պատկերացնում Երևանի խնդիրների ծանրությունը և լավատեսորեն կարծում է, թե դրանց հնարավոր է օպերատիվ լուծում տալ՝ հենց նիստերի դահլիճում: Բայց դե, ինչպես ասում են, կհմտանա, այդպես չի մնա: Մարությանն ասել է, որ վարչական շրջանների բոլոր ղեկավարներին պատրաստվում է փոխել: Արդեն հրաժարականներ են ներկայացրել Արաբկիր և Նոր Նորք վարչական շրջանների ղեկավարները, հավանաբար առաջիկայում նրանց քայլին կհետևեն նաև մյուսները:

Երևանի քաղաքապետն իրավասու է նշանակել նաև տեղակալներին, խորհրդականների և օգնականների, Երևանի գլխավոր ճարտարապետին: Ի դեպ, ճարտարապետը դեռ ավագանու ընտրություններից առաջ հրաժարական էր տվել: Ինչ վերաբերում է քաղաքապետարանի և 12 վարչական շրջանների աշխատակազմերին, նրանք համայնքային ծառայողներ են և ըստ այդ համարվում են օրենքով պաշտպանված աշխատողներ: Բայց սա՝ միայն ֆորմալ առումով: Ավագանին իրավասու է կառուցվածքային փոփոխություններ կատարել աշխատակազմում և նախկին կադրերից հրաժարվել՝ հայտարարելով նոր մրցույթներ: Հայկ Մարությանը հավատացրել է, որ կադրային ջարդ չի լինելու, բոլոր այն պրոֆեսիոնալները, որոնք պատրաստ են աշխատել նոր Հայաստանի կանոններով, կարող են շարունակել աշխատել։

«Լինելու է անհատական մոտեցում, և իմ որոշումը կայացնելու եմ այն փաստերի վրա, թե արդյոք այդ մարդիկ պատրաստ են աշխատել նոր Հայաստանում»,– ասել է Հայկ Մարությանը։ Նա չի պատասխանել հարցին, թե արդյոք աշխատանքից կազատվի Երևանի ամենաերկարակյաց փոխքաղաքապետ Կամո Արեյանը: Նոր ավագանին ընտրել է հանձնաժողովի անդամների, որոշել է քաղաքապետի երդմնկալության օրը: Բայց ընդհանուր առմամբ, իբրև քաղաքական մարմին, Երևանի նոր ավագանին շատ միատարր է: Երևանի ավագանու ինստիտուտը գործում է 2009 թվականից: Այս ընթացքում երևանցիները չորս ավագանի են ընտրել` երեք հերթական ընտրություններով, իսկ վերջինը՝ արտահերթով: Որևէ անգամ Երևանի ավագանին այսքան իշխանամետ կառուցվածք չի ունեցել: Ավագանու կազմում միշտ էլ ընդդիմությունն ավելի մեծ ներկայացվածություն է ունեցել, քան ունի այսօր: Այս տեսանկյունից քաղաքապետ Հայկ Մարությանն ավելի հեշտ է աշխատելու, որովհետև ի տարբերություն նախորդ քաղաքապետեր Տարոն Մարգարյանի, Կարեն Կարապետյանի ու Գագիկ Բեգլարյանի /նրանցից առաջ ընտրովի քաղաքապետեր Երևանը չի ունեցել/ նրան ընդդիմացող ավագանու անդամների թիվը շատ քիչ է՝ 80 տոկոսը յուրայիններ են:

 

Հայկ  Դավթյան

 

Գլխավոր Թողարկում, Լուրեր, Վերլուծություն
Մեկնաբանությունները փակ են: