Քաղաքային ընտրությունների անկանխատեսելի ելքը

Sep 19, 2018 Comments Off on Քաղաքային ընտրությունների անկանխատեսելի ելքը

Երևանի ավագանու նախընտրական քարոզչության հիմնական շեշտադրումներից մեկը սևերի ու սպիտակների ջրբաժանն է, որի մեկնարկը տվեց Իմ քայլը դաշինքի թեկնածու Հայկ Մարությանը: Այս սկզբունքին տուրք տվեց նաև վարչապետ Նիկոլ Փաշինյանը՝ հայտարարելով, թե այս ընտրությունները սևերի ու սպիտակների ընտրություն են, այս ընտրությունը հեղափոխության և հակահեղափոխության ընտրություն է: Ըստ այդմ ՝միակ սպիտակ թեկնածուն Հայկ Մարությանն է, մնացած բոլորը սևերն են: Փաշինյանն ու նրա կուսակցության քաղաքապետի թեկնածուն, բոլորին սև հռչակելով, թերևս նպատակ ունեն ստանալ ձայների համոզիչ մեծամասնություն, որպեսզի կարողանան միայնակ ձևավորել Երևանի քաղաքային իշխանությունը: Այսքանով հանդերձ, եթե անյուամենայնիվ ավագանու ընտրությունների արդյունքում որևէ ուժ 50 տոկոս գումարած մեկ ձայն չստանա, առաջանալու է կոալիցիա կազմելու անհրաժեշտություն: Այս դեպքում առաջին երկու տեղերը գրաված քաղաքական ուժերը ստիպված են լինելու ձևավորել Երևանի կառավարման կոալիցա՝ որակի համամասնությամբ միմյանց մեջ կիսելով Երևանի քաղաքապետի, առաջին փոխքաղաքապետի ու վարչական շրջանների ղեկավարների պաշտոնները:

Եթե ընտրություններն իսկապես ազատ և արդար անցնեն, պետք է ենթադրել, որ որևէ թեկնածու մեծամասնություն չի ստանա: Նախ՝ ամենաբարձր վարկանիշ  ունեցեղ քաղաքական ուժի՝ Քաղաքացիական պայմանագիր կուսակցության առաջադրած թեկնածուն՝ Հայկ Մարությանը, Երևանի ավագանու ընտրություններում ունի ընդամենը մեկ հզոր ռեսուրս, որը նրան կարող է ձայներ բերել. դա Նիկոլ Փաշինյանի աջակցությունն է: Այլ հաղթաթուղթ Հայկ Մարությանը պարզապես չունի: Քանի որ Երևանի քաղաքապետի պաշտոնը, ուզենանք թե չուզենանք, զուտ քաղաքական պաշտոն լինելով հանդերձ, ավելի շատ կառավարչական և տնտեսական նշանակություն ունի, սոսկ Փաշինյանի աջակցությունը հաղթանակի երաշխիք չի կարող լինել: Երևանցին հասկանում է, որ քաղաքն ունի խնդիրներ, և դրանք լուծում են պահանջում: Իսկ Մարությանը դեռ որևէ քայլով չի ապացուցել, որ ինքը հենց այն թեկնածուն է, որ կարող է լուծում գտնել Երևանի բազմաթիվ խնդիրներին: Ավագանու ընտրություններում մեծամասնություն չունենալու դեպքում  քաղաքական կոալիցիան կարող է կազմվել այն առանցքի շուրջ, որի ձևավորված է այսօրվա խորհրդարանական  Ելք դաշինքը: Սեպտեմբերի 23-ից հետո Արտակ Զեյնալյանի գլխավորած Լույս դաշինքն ու Հայկ Մ արությանի գլխավորած Իմ քայլը դաշինքը կարող են միավորվել, որովհետև այսպես թե այնպես այս երկու ուժը ունեն համագործակցության որոշակի փորձ, համատեղ անցած ճանապարհ: Այստեղ արժե նաև ընդգծել, որ Արտակ Զեյնալյանը ավելի ուժեղ թեկնածու է՝ բոլոր իմաստներով: Ինչ վերաբերում է սևերի ու սպիտակների պայքարին. քաղաքականությունը հնարավորի արվեստ է, և միշտ էլ կարելի է համապատասխան հիմնավորումներ գտնել՝ ասելու համար, որ սև կամ սպիտակ լինելը գործընկեր լինելուն չի խանգարում:

Նկատենք, որ Երևանի մասին օրենքի համաձայն՝ ավագանիում պետք է առնվազն երեք ուժ ներկայացված լինի: Այս ընտրությունները, սակայն, կարող են ռեկորդ սահմանել նաև քաղաքական ուժերի ներկայացվածության առումով: Գուցե ավագանիում հայտնվեն չորս և անգամ 5 քաղաքական ուժեր: Օրինակ՝ Զարուհի Փոստանջյանի թիմը նախորդ ավագանիում բավականին արդյունավետ էր աշխատում և շանսեր ունի կրկին հայտնվել քաղաքային կառավարման համակարգում: ԲՀԿ-ն ունի ավանդական ընտրազանգված, որի շնորհիվ կարող է վստահաբար հայտնվել ավագանիում: Գուցե կլինեն նաև այլ ուժեր, ովքեր կարող են հաղթահարել նվազագույն շեմը: Այս տարբերակը, ի դեպ, շահեկան կլինի  ավագանիում հզոր ընդդիմադիր բևեռ ձևավորելու առումով:

 

Կարինե  Սարիբեկյան   

Գլխավոր Թողարկում, Լուրեր, Վերլուծություն
Մեկնաբանությունները փակ են: