10 լավ քայլ էլ արած լինի, ձախողեց կարևորում՝ քաղաքացուն երկրի տերը դարձնելու հարցում. Հայրիկյան

Aug 16, 2018 Comments Off on 10 լավ քայլ էլ արած լինի, ձախողեց կարևորում՝ քաղաքացուն երկրի տերը դարձնելու հարցում. Հայրիկյան

«Ազգային ինքնորոշման միավորում» կուսակցության նախագահ Պարուր Հայրիկյանը Tert.am-ի հետ զրույցում, անդրադառնալով Նիկոլ Փաշինյանի վարչապետության 100 օրվան, նշում է, որ նա 10 քայլ լավ էլ արած լինի, ձախողել է ամենակարևորում՝ այս 100 օրվա ընթացքում քաղաքացին երկրի տերը չի դարձել և մյուս կողմից, իր ձևակերպմամբ, ուժի է մնացել Սերժ Սարգսյանի «հիմնական օրենքը»: «Դա նույնն է, որ պայքարես խուլիգանների դեմ, բայց խուլիգանների հիմնական օրենքը պահպանես: Էլ ի՞նչ պայքար, ի՞նչ հեղափոխություն: Այնպես որ, այս 100 օրն ինձ ցույց տվեց, որ իրենք ո՛ չ աշխատել գիտեն, ո՛չ էլ ազնիվ էին իրենց բարձր նպատակում»,-ասաց Պարույր Հայրիկյանը: «Լավ, մենք հո իդիոտ չե՞նք, որ ընդունենք, թե մարդուն՝ Շանթին, բանտից ազատելու համար 100 օր է պետք»,-ասում է Պարույր Հայրիկյանը՝ նշելով, որ այս 100 օրվա ընթացքում երկիրը չազատվեց քաղբանտարկյալներից:


– Պարո´ն Հայրիկյան, վաղը կայանալիք հանրահավաքում Նիկոլ Փաշինյանը կամփոփի իր 100 օրը: Այս ընթացքում բազում ցանկեր հրապարակվեցին. կոռուպցիայի դեմ պայքարի շրջանակում տասնյակ քրեական գործեր, բացահայտումներ, վերականգնված ու բյուջե ուղղված բյուջետային ու ապօրինի հարստացման միջոցներ, քրեաօլիգարխիկ համակարգի դեմ հայտարարված «սրբազան պատերազմ» և այլն: Ինչպե՞ս կգնահատեիք այս ժամանակաշրջանը:

-Եթե հիշում եք՝ շարժման նախնական փուլում մի այսպիսի արտահայտություն արեցի՝ «Նիկոլ Փաշինյանը կարող է սխալվել տասնյակ հարցերում, բայց ամենակարևոր հարցերում ճիշտ է»: Եվ ես նկատի ունեի այն, որ ինքն ասում է, որ քաղաքացին պետք է դառնա երկրի տերը, և պետք է քաղաքական գործունեության մեջ սուտը բացառվի: Նիկոլ Փաշինյանը կամփոփի իր 100 օրը, իր իրավունքն է: Բայց ես այսօր արդեն յուրովի ամփոփել եմ: Հիմա հակառակն է. ինքը տասնյակ լավ բաներ էլ կարող է անել, բայց ամենակարևոր բանը չի անում: Եվ դա Սահմանադրության, երկրում սահմանադրական կարգի հաստատման, քաղաքացիներին երկրի տերը դարձնելու ուղղությամբ քայլն է, որը 100 օրվա ընթացքում չարվեց: Ամենակարևորը. Սերժ Սարգսյանի «հիմնական օրենքը», իր ասած՝ հանցավոր ռեժիմի օրոք ընդունված, մնաց ուժի մեջ: Եվ նույնիսկ նվազագույն քննադատության չարժանացավ: Հետևաբար, տասը լավ էլ արած լինի, ամենակարևորում ինքը այն աստիճանի թերացավ, որ ես ամենը համարում եմ ձախողված:

-Ավելի կոնկրետ կարո՞ղ եք նշել:

-Ամենակոնկրետն եմ նշում. քաղաքացիներին երկրի տերը դարձնելու ուղղությամբ որևէ քայլ չձեռնարկվեց 100 օրում, իսկ 100 օրը հեղափոխության պայմաններում շատ մեծ ժամանակ է:

-Իսկ ինչպե՞ս պետք է արտահայտվեր քաղաքացու՝ երկրի տերը դառնալու գործընթացը:

-Եթե չգիտի՝ ինչպես անի, պիտի հարցնի նրան, ով գիտի: Բացարձակ ժողովրդավարության իմ մոդելով քաղաքացիները բոլոր այն ոլորտներում, որտեղ իրենք կարող են դերակատարություն ունենալ, դառնում են այդ ոլորտների դերակատարը: Ընտրվելո՞ւ է Ազգային ժողով, այն հետագայում քվեարկություն անելո՞ւ է: Բացարձակ ժողովրդավարության խորհրդարանական համակարգի հայեցակարգը ես գրքույկի ձևով փոխանցել եմ իրենց: Ոչ մի անդրադարձ: Ընդամենը փոխվարչապետի կողմից խոստում, որ «ես բոլոր շահագրգիռ կողմերին կներկայացնեմ»: Քաղաքացին պետք է ընտրի վարչապետին, քաղաքացին ուղղակի պետք է ընտրի քաղաքապետին և ընտրի համեմատաբար կարճ ժամանակով՝ 2 տարով, որպեսզի հետկանչի անհրաժեշտություն չլինի: Սահմանադրության այլընտրանքային մոդելն է, որը մենք տվել էինք, Սերժ Սարգսյանն անտեսել էր, հիմա նույնն անում է Նիկոլ Փաշինյանը:

-Ինչպե՞ս աներ, մի կողմից քրեական գործեր, փողերի վերադարձ, քրեական գործեր, կաբինետի ձևավորում, կադրերի նշանակում և այլն, նաև Սահմանադրության այլընտրանքային մոդելո՞վ զբաղվեր:

-Մենք չենք խոսում մի անհատի մասին, մենք խոսում ենք պետության մասին: Պետական համակարգը միաժամանակ ի վիճակի է զբաղվել բոլոր հարցերով: Եթե քրեաօլիգարխիկ համակարգի դեմ պետք է աշխատել, աշխատանք, որ կարող է տարիներ տևել, դրա համար կա իրավապահ համակարգ. ոստիկանություն, իրավապահներ, դատախազություն: Սա կոնկրետ Նիկոլ Փաշինյանի հետ կապ չունի. ռազմավարությունը որոշում են, հանձնարարվում է և աշխատում են: Եթե արդարադատության խնդիր կա՝ կան համապատասխան կառույցներ: Ես իրեն տվել էի պատրաստի հայեցակարգ, պատրաստին պետք է քննարկվեր: Եվ որ ասում եք՝ «Ձեր տարբերակը», ոչ թե իմ տարբերակն է, այլ միակ այլընտրանքային տարբերակն է, որն այն ժամանակ կար, որից Սերժ Սարգսյանը հանձնարարել էր փախչել, նույնիսկ չքննարկել: Դեռևս ցույցերի ժամանակ մենք նախագիծ ներկայացրինք, որը քննարկվեց մինչև Նիկոլ Փաշինյանի վարչապետ դառնալը, այն է՝ չեղարկել Սահմանադրությունը, պատասխանատվությունն էլ իմ վրա վերցրի, ձևն էլ ասացի՝ ինչպես եմ անելու, որովհետև շատ մեծ հանրահավաքում դա հնարավոր է ստուգել. ովքեր են կողմ՝ քվեարկել այդ Սահմանադրությանը, չեղարկել այն համակարգի Սահմանադրությունը, որի դեմ, իբրև թե պայքարում էինք: Եթե, ինչպես իրենք են ասում, այդ հանցագործ տարրերի հիմնական օրենքը դու պահում ես ուժի մեջ, դա նույնն է, որ պայքարես խուլիգանների դեմ, բայց խուլիգանների հիմնական օրենքը պահպանես: Էլ ի՞նչ պայքար, ինչ հեղափոխություն: Այնպես որ, այս 100 օրն ինձ ցույց տվեց, որ իրենք ո՛ չ աշխատել գիտեն, ո՛չ էլ ազնիվ էին իրենց բարձր նպատակում: Բարձր նպատակն էլ ՝ քաղաքացուն երկրի տերը դարձնելն էր:

-Իսկ այն, որ այս քաղաքացին վերջապես հագուրդ տվեց իր տասնամյակներ շարունակ անիրական թվացող երազին՝ տեսնել ինչ-որ մարդկանց՝ անպատժելիներին, երկիրը կեղեքողներին ճաղերի հետևում, տեսնել երկրում արդարություն: Դա քաղաքացուն ինչ-որ չափով երկրի տերը չի՞ դարձնում:

-Քաղաքացին ներկայացման մասնակից չէ, քաղաքացին պիտի տեսնի կայուն գործող արդարադատական համակարգ, որում ինքը նաև դերակատարություն ունենա: Քաղաքացին այս պահի դրությամբ դեռ որևէ դատված մարդու չի տեսել: Քաղաքացին այս պահի դրությամբ չի տեսել, որ երկիրն ազատվել է քաղկալանավորներից: Լավ, մենք հո իդիոտ չե՞նք, որ ընդունենք մարդուն բանտից ազատելու համար 100 օր է պետք: Շանթը բանտում է, չէ՞: Ուրեմն՝ 0 Նիկոլի ողջ շարժմանը: Հայաստանն ունի քաղկալանավորներ, ուրեմն՝ վերջ: Դա հեղափոխություն չէ, դա հերթական տականքությունն է: Եթե կա քաղկալանավոր, ուրեմն սա պետություն չէ, սա բռնապետություն է:

-Արտաքին քաղաքական ոլորտում ի՞նչ արվեց, չարվեց:

-Արտաքին քաղաքական ոլորտում «շատ, արտակարգ» փոփոխություններ արեց: Մնաց հավատարիմ Սերժ Սարգսյանի որդեգրած կուրսին: Կյանքում լսե՞լ եք էդ տեսակ հեղափոխության մասին: Քաղաքականությունն ունի 2 ոլորտ՝ արտաքին և ներքին: Այսինքն՝ էն մի կեսում 100 տոկոսով հավատարիմ եմ Սերժի Սարգսյանին, էս մյուս կեսում՝ Սերժ Սարգսյանին հավատարիմ չեմ, բայց ընդամենը բռնում, բաց եմ թողնում, բռնում, բաց թողնում: Քաղկալանավորներն էլ մնում են: Ում էլ բաց եմ թողել, բաց եմ թողել որպես պատանդ, ցանկացած պահի կարող եմ կալանավորել:

-Այնուամենայնիվ, Սերժ Սարգսյանի օրոք լինո՞ւմ էր այնպես, որ երկրում իրականացվող ներքին քաղաքականությունը տարածվեր արտաքինի վրա, բաներ ասվեին, որ դուր չգային թե՛ Բրյուսելին և թե´ Մոսկվային: Ինչո՞ւմ է Սարգսյանի հետ նույնությունը:

– Դուք խոսում եք մարտավարական, հոգեբանական խնդիրներից, ես խոսում եմ ռազմավարությունից: ԵԱՏՄ-ից դուրս գալու համար պայքարող քաղաքական գործիչը դարձավ ԵԱՏՄ-ի հավատարիմ սպասավորը: Ստե՞ց, ստո՞ւմ էր այն ժամանակ: Ես հո լակոտ չէի, որ գնայի, իրեն աջակցեի և բոլորին ասեի աջակցեք Նիկոլ Փաշինյանին: Ես եմ առաջին կոչն արել, որովհետև ես լսում էի քաղաքացիներին երկրի տերը դարձնելու խոստում և ունենալով մոդել՝ ասում է՝ ահա, վերջապես, մենք կդարձնենք մեր երկիրն իդեալական, և ես ասում էի, որ ԵԱՏՄ-ից պետք է դուրս գալ: Եվ ԵԱՏՄ-ից դուրս գալ՝ չի նշանակում պատերազմ հայտարարել: Այնքան պետություններ են դուրս գալիս: Անգլիան դուրս չեկա՞վ ԵՄ-ից: Իմ ասածը նշանակում է որդեգրել ուղղություն, որը կարող է փոխվել արդեն ընթացքում: Հայաստան-ԵԱՏՄ փոփոխության, ազգային անվտանգության տեսանկյունից նաև հազար ու մի խնդիր կա:

-100 օրում նման կտրուկ շարժումներ անելը Հայաստանի նման փոքր, մեկուսացման ու «դանդաղ պատերազմի մեջ գտնվող երկրին թույլատրվա՞ծ է:

-Հայաստանի նման երկրին թույլատրված չէր նաև անկախանալ, որովհետև դրության տերն այսօրվա ողորմելիների պես մարդիկ էին և ասում էին՝ Հայրիկյա՛ն, դու ծայրահեղական ես: Այդ լակոտներից ոչ մեկն ինձնից ներողություն չխնդրեց, չեկավ ասաց՝ «կներես, մենք իշի քուռակ էինք, դու բան էիր ասում, չէինք հասկանում, դու ճիշտ էիր՝ անկախ Հայաստան էիր ուզում »: Էդ բոլորի մեջ էլի Լևոն Տեր-Պետրոսյանն էր, որ մի օր ասաց՝ «այսքան հակադրվել եմ Հայրիկյանին, բայց իմ իդեալն ինքն է»: Մնացյալը մնացին անպարկեշտ և ուզում են անցյալի սխալները հիմա՝ նոր սերնդի վրա պրոյեկտել, մենք թույլ ազգ ենք, փոքր ենք, ողորմելի ենք … միջազգային ներկայիս հարաբերություններում կա միջազգային իրավունքի ենթակա Հայաստան և Հայաստանն իրեն պետք է պահի այդ իրավունքին համարժեք: Ինչ վերաբերում է Նիկոլ Փաշինյանի հայտարարություններին՝ ինձ հայտարարություններ պետք չեն, ես խոսում եմ ստրատեգիայի մասին:

-Բայց ի՞նչ ակնկալիք ունեիք, որ Նիկոլ Փաշինյանը պետք է 100 օրվա ընթացքում Հայաստանը դո՞ւրս բերեր ԵԱՏՄ-ից:

-Իմ ակնկալիքն այն էր, որ հավատարիմ մնար նրան, ինչ ասել էր: Հետո ասաց՝ իրավիճակ է փոխվել: Աշխարհում իրավիճակ չի փոխվել: Քեզ մոտ է փոխվել՝ դու ընդդիմադիր էիր, դարձար իշխանավոր: Ես ասում եմ, որ քաղաքական գործիչն իր ծրագրերի մասին խոսելիս դրանց պետք է հավատարիմ լինի և այդ հավատարմությունը պետք է երևա ամեն քայլում: Եվ ես չեմ ասում՝ արդեն պետք է դուրս հանած լիներ, քաղաքացիներին պետք է երկրի տերը դարձրած լիներ, ես ասում եմ՝ որևէ քայլ չի արել այդ ուղղությամբ: Մի դեպքում էլ ուղղությունը փոխվեց, դարձավ սարգսյանական: Է, հանրապետականները ճիշտ էին ասում, որ եթե մեր ուղեգծին հավատարիմ ես, ինչո՞ւ էիր մեր ուղեգծի դեմ պայքարում: Ես այն եմ ասում, որ այս 100 օրը պետք է ինչ-որ բան տար… գազն էժանացա՞վ Հայաստանում: Դուք գիտեք, որ մենք արդեն 400 դոլարից ավելի ենք վճարում:

Գլխավոր Թողարկում
Մեկնաբանությունները փակ են: