ԼՂ-ում պատերազմը կբացառվի. Մանրամասներ՝ Պուտին -Թրամփ հանդիպմանն ընդունվելիք հայտարարությունից

Jul 11, 2018 Չի մեկնաբանվել

Ինչպես հայտնի է, ԱՄՆ նախագահ Թրամփն ու ՌԴ նախագահ Պուտինը հանդիպել են երկու անգամ անցած տարի, սակայն երկու անգամն էլ նրանց հանդիպումը անցել է տարբեր միջազգային գագաթնաժողովների շրջանակներում, և առանձին գագաթնաժողով երկու միջուկային գերտերությունների ղեկավարների մասնակցությամբ կազմակերպվում է առաջին անգամ գալիք երկուշաբթի՝ Ֆինլանդիայի մայրաքաղաք Հելսինկիում:

Մոսկվան Վաշինգտոնին է հանձնել Միացյալ Նահանգների և Ռուսաստանի նախագահների՝ հուլիսի 16-ին Հելսինկիում կայանալիք գագաթնաժողովին ընդունվելիք համատեղ հայտարարության տեքստի նախագիծը, հղում անելով ամերիկյան պետական կառույցներում իր աղբյուրին՝ այսօր գրել է «Կոմերսանտը»:

Երկու էջանոց փաստաթղթում, մասնավորապես գրված է, որ երկու երկրների ղեկավարները կարևորում են առաջին դեմքերի, դիվանագետների, զինվորականների և հատուկ ծառայությունների միջև երկխոսության, տնտեսական կապերի և հումանիտար ոլորտում շփումների կարևորությունը:

Այժմ ամենակարևորը, որը կարող է առնչվել մեր տարածաշրջանի կայունությանը, մասնավորապես ԼՂ խնդրին. փաստաթղթի նախագծում Միացյալ Նահանգների և Ռուսաստանի միջև համագործակցությունը նշված է որպես տարածաշրջանային և համաշխարհային անվտանգության և կայունության գործոններից մեկը:

«Կոմերսանտի» աղբյուրը պնդում է, թե Վաշինգտոնը պատրաստ է որպես հայտարարության հիմք ընդունել ռուսների առաջարկած տեքստը, միայն թե ուզում է ավելացնել նաև ամերիկյան ընտրություններին Ռուսաստանի միջամտության փորձի մասին Սպիտակ տան մտահոգության մասին կետ: «Բլումբերգ» գործակալությունն իր հերթին պնդում է, թե ԱՄՆ նախագահ Դոնալդ Թրամփն ու Ռուսաստանի նախագահ Վլադիմիր Պուտինը քննարկելու են Սիրիայից իրանական զորքերին հանելու հարցը և որ Մոսկվան արդեն բանակցություններ է անցկացնում այս հարցով Թեհրանի հետ: Կրեմլը, սակայն, այս տեղեկությունը հերքում է:

Ավելի վաղ թե՛ Սպիտակ տունը, թե՛ Կրեմլը հայտարարել էին որ ռուս-ամերիկյան գագաթնաժողովի օրակարգում ուկրաինական և սիրիական ճգնաժամներն են լինելու:

Ռուսաստանցի և ամերիկացի դիտորդների կարծիքով և՛ Մոսկվան, և՛ Վաշինգտոնը ցանկանում են շոշափելի առաջխաղացում արձանագրել քննարկվելիք հարցերից գոնե մեկի մասով, ինչը թույլ կտա Թրամփին հայտարարել, որ ռուս-ամերիկյան գագաթնաժողովը հաջող էր և երկու երկրների միջև հարաբերությունները բարելավելու իր քայլերն էլ արդարացված են:

Պուտին-Թրամփ հանդիպումը ինքնին, կարևոր է բոլոր առումներով: Պատերազմի բռնկման հավանականությունն այսօր ղարաբաղյան ճակատում ավելի ու ավելի է մեծանում, հետևաբար, եթե անգամ Պուտինն ու Թրամփը հրապարակայնորեն չարձանագրեն, որ թե քննարկել են ԼՂ հարցը,  նրանց համատեղ հայտարարությունում Միացյալ Նահանգների և Ռուսաստանի միջև համագործակցությունը՝ որպես տարածաշրջանային և համաշխարհային անվտանգության և կայունության գործոն արձանագրելը խիստ կարևոր է լինելու:

Ասելով կարևոր, իհարկե, պետք է նկատի ունենալ այն, որ Ալիևին, թերևս, հնարավոր կլինի զսպել ու հետ պահել արկածախնդրությունից, եթե Պուտինի ու Թրամփի մակարդակով շեշտվի տարածաշրջանային անվտանգության և կայունության գործոնը:

Մետաքսյա Շալունց

Գլխավոր Թողարկում, Վերլուծություն
Անդրադարձներ չկան to “ԼՂ-ում պատերազմը կբացառվի. Մանրամասներ՝ Պուտին -Թրամփ հանդիպմանն ընդունվելիք հայտարարությունից”

Մեկնաբանել