Մի կրակոցով երկու նապաստակ

Jun 18, 2018 Comments Off on Մի կրակոցով երկու նապաստակ

Էջմիածնում իրադարձությունները դրամատիկ զարգացում ստացան։ Քրեածին երկու կլանները մեկի դեպքում իշխանությունը վերցնելու, մյուսին՝ պահպանելու, հանգուցալուծվեցին երկուսի ձերբակալությամբ։

ԱԱԾ աշխատակիցները, հանցավորության դեմ պայքարին ուղղված իրենց գործառույթների իրականացման շրջանակներում Էջմիածին քաղաքում, երկու տարբեր քրեական գործերով, միաժամանակ իրականացրած խուզարկությունների արդյունքում հայտնաբերել են ապօրինի պահվող մեծ քանակությամբ զենք և ռազմամթերք: ԱԱԾ-ն հայտնեց Դոն Պիպո մականունով հայտնի Արթուր Ասատրյանի (նույն քրեական գործով ձերբակալվել են ևս 4 անձինք, ովքեր հանդիսանում են ՌԴ քաղաքացիներ) և Աժ պատգամավոր Մանվել Գրիգորյանի ձերբակալությունների մասին: Արթուր Ասատրյանը ձերբակալվել է ՀՀ քրեական օրենսգրքի 131-րդ հոդվածի 1-ին, 2-րդ, 3-րդ և 6-րդ կետերով («Մի խումբ անձանց կողմից նախնական համաձայնությամբ, առողջության համար վտանգավոր բռնություն գործադրելով, զենքի կամ որպես զենք օգտագործվող առարկաների գործադրմամբ, երեք անձի առևանգումը») և 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով:

ԱԺ պատգամավոր Մանվել Գրիգորյանը ձերբակալվել է ՀՀ քրեական օրենսգրքի 235-րդ հոդվածի 2-րդ մասով («Մի խումբ անձանց կողմից նախնական համաձայնությամբ հրազեն և ռազմամթերք ապօրինի կերպով ձեռք բերելը և պահելը») նախատեսված հանցագործություն կատարելու կասկածանքով: Հայաստանի Հանրապետության Սահմանադրության 96-րդ հոդվածով սահմանված կարգով, ԱԺ պատգամավորին ազատությունից զրկելու մասին անհապաղ տեղեկացվել է ՀՀ ԱԺ նախագահը: Սահմանադրության 96-րդ հոդվածը հիշեցնենք, որ սահմանում է պատգամավորի անձեռնմխելիությունը. «Պատգամավորի նկատմամբ քրեական հետապնդում կարող է հարուցվել միայն Ազգային ժողովի համաձայնությամբ: Պատգամավորն առանց Ազգային ժողովի համաձայնության չի կարող զրկվել ազատությունից, բացառությամբ՝ երբ նա բռնվել է հանցանք կատարելու պահին կամ անմիջապես դրանից հետո: Այս դեպքում ազատությունից զրկելը չի կարող տևել յոթանասուներկու ժամից ավելի: Պատգամավորին ազատությունից զրկելու մասին անհապաղ տեղեկացվում է Ազգային ժողովի նախագահը»։

ՀՀԿ-ն արդեն բարձրաձայնում է իր թիմակցի ձերբակալության մասին՝ քաղաքական հետապնդում որակելով կատարվածը՝ ասելով, որ պատգամավորին անձեռնմխելիությանը հակասում է ԱԱԾ գործողությունները, քանզի Մանվել Գրիգորյանին բռնել են ոչ թե հանցանք կատարելու պահին, կամ դրանից անմիջապես հետո, այլեւ տարիներ շարունակ պահվող զինամթերքի համար։

Ըստ ամենայնի, ԱԱԾ-ն դիմել է նման ծայրահեղ քայլի` հատկապես պատգամավորի դեպքում, միմիայն այն պատճառով, քանզի Մանվել Գրիգորյանը ԵԿՄ նախագահն է, իսկ այդ կառույցը կարելի է ասել պետություն է պետության ներսում, ահռելի ռեսուրսներով՝ մարդկային ու ռազմական։ Դեպքերի զարգացումներից պարզ կդառնա՝ Փաշինյանի նպատակն արդյոք գեներալին իսկապես ազատազրկելն է կատարած հանցանքների համար, թե այդ հզոր ռեսուրսը իր վերահսկողության տակ անցկացնելը։ Ամեն դեպքում անցած օրերին ակնհայտ դարձավ, որ Դոն Պիպոյի շաբաթներ ձգվող գործողությունները գեներալի որդու դեմ չէին խոչընդոտվում։ Վարպատը նախատեց նրան հունիսի տասնչորսից հետո տեղի ունեցած հանրահավաքից հետո, երբ այդ հավաքին օգտագործվեցին թավշյա հեղափոխության սիմվոլներն ու կարգախոսերը։ Ակնհայտ է, որ Փաշինյանը չէր ցանկանում գեներալի դեմ բացահայտ արշավը կապել իր հետ, բայց դեմ էլ չէր դա ուրիշի ձեռքով անել։ Ի վերջո, հաշվարկելով, որ արդյունքում ծուղակում կգցի երկուսին էլ։ Չմոռանանք, որ Պիպոն նախկին վարչապետ Կարեն Կարապետյանի եւ Սամվել Կարապետյանի թիմից է, խնամիական կապերով է անգամ կապված նրանց հետ, հիմա ստացվում է, որ մեկ զարկով երկու հզոր թիրախ հայտնվեց Փաշինյանի տիրույթում։

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: