Օսիպյանը Վովա Գասպարյանի հետքերո՞վ, թե շոուի վերածելու հայրենիք չունենք

May 22, 2018 Comments Off on Օսիպյանը Վովա Գասպարյանի հետքերո՞վ, թե շոուի վերածելու հայրենիք չունենք

Մի քանի օր է լրատվամիջոցները հայտնում են ոստիկանական ակտիվ գործողությունների մասին՝ կադրային փոփոխություններից սկսած, գողականներին կարգի հրավիրելու զուգորդվող գործընթացին միանում է նորը, անպատժելիներին կարգի հրավիրելու գործողություններ են դեռեւս ցուցադրվում: Վերջին քսանյակում Հայաստանում անպատժելիներն իրենց կայուն դիքերն են ունեցել, նրանց ներվել է ամեն ինչ՝ բառի ամենալայն իմաստով, ինչն էլ դարձել է շղթայական անպատժելիության հիմք:

Այդ ուրույն խավում առանցքային դեր է ունեցել նախկին ոստիկանապետի թիկնազորի պետ Արշակ Հակոբյանը՝ նույն ինքը՝ Վովայի Արշակը, որն, ըստ մամուլի տեղեկությունների, իր վրա էր վերցրել գողականների, քրեական տարրերի եւ այլ նման խնդիրներ ու ստվերային փոխոստիկանապետի լիազորություններ էր իրականացնում:

Նրա անպարտությունից բնականաբար օգտվում էին մերձավորները, ու հատկապես փեսան՝ Մասիսի քաղաքապետն ու իր եղբայրը՝ Դավիթ եւ Գոռ Համբարձումյանները, որոնք թավշյա հեղափոխության ընթացքում, կարծես թե, իրենց վրա պարտականություն էին վերցրել ճնշել ցուցարարներին, բռնություն գործադրել նրանց նկատմամբ:

Հիշենք դեպքերից մի քանիսը, որոնք տեղ են գտել մամուլում: Առաջինը Հերացի փողոցում էր, քայլարշավի առաջին իսկ օրերին, երբ քաղաքապետի եղբայրն իր հերոսակախմբի հետ իջավ մեքենայից ու հարձակվեց փողոցը փակած երիտասարդ աղջիկների ու տղաների վրա: Չնայած տեսագրություններում պարզ երեւում է բոլորի դեմքերը, սակայն իրավապահ մարմինները, կարծես թե, բավարար հիմքեր չէին գտնում եւ գործը կարճվեց: Սակայն օրերս Փաշինյանը հորդորեց կրկին զբաղվել այդ գործով՝ ասելով, որ այսուհետ չեն լինելու անպատժելի եւ արտոնյալ տարրեր: Ապրիլի 22-ին էլ Էրեբունիում, ըստ մամուլի, ցուցարարների վրա դիմակով հարձակվողները Վովայի Արշակի հրոսակախումբն էր, որոնց մեջ էին թե Արշակը, թե քաղաքապետ փեսան՝ Դավիթ Համբարձումյանը, թե նրա եղբայրը՝ Գոռ Համբարձումյանը, նրանց դեմեքերը ֆիքսել են լրատվամիջոցների տեսախցիկները: Նախօրեին ՀՀ ոստիկանությունը հայտարարություն էր տարածել, որտեղ նշել էր, որ մի շարք անձանց ինքնությունները պարզվել են, նրանք ներկայացվել են նախաքննական մարմնին: armtimes.com-ը ոստիկանությունից ճշտել էր՝ արդյոք Արշակ Հակոբյանը բերվածների թվում է՝ թե ոչ: Ոստիկանության տրամադրված տեղեկատվության հիման վրա Արշակ Հակոբյանը կանչվել է նախաքննական մարմին եւ հարցաքննվել: Արշակ Հակոբյանի եղբայրն էլ անցնում է Էրեբունիում անչափահասին մահակով ծեծելու դեպքով. նա այդ գործով կասկածյալ է: Սակայն այս խմբավորման ապրիլյան արշավանքները սրանով չեն ավարտվում: Ապրիլի 22-ին Արարատի մարզի Հովտաշատ գյուղում էլ խումբը՝ Գոռ Համբարձումյանի գլխավորությամբ հարձակվել էր ցուցարարների վրա, կրակել նրանց ուղղությամբ, արդյունքում մեկ մարդ հրազենային վիրավորում էր ստացել: Տեղի ունեցած դեպքով երեկ գիշերը խուզարկություն է կատարվել Մասիսի քաղաքապետ Դավիթ Համբարձումյանի հայրական տանը, որտեղ նաեւ նրա եղբայրը՝ Գոռ Համբարձումյանն է ապրում:

Այս դեպքով հարուցվել է քրեական գործ՝ ՀՀ քրեական օրենսգրքի 258 հոդվածի 4-րդ մասով (խուլիգանություն, որը կատարվել է զենքի գործադրմամբ): Մայիսի 17 որոշում է կայացվել՝ Մասիս քաղաքի բնակչին՝ Ս.Կարապետյանին, ՀՀ քրեական օրենսգրքի 235-րդ հոդվածի 1-ին մասով և ՀՀ քրեական օրենսգրքի 258-րդ հոդվածի 4-րդ մասով որպես մեղադրյալ ներգրավելու մասին, նրա նկատմամբ որպես խափանման միջոց է ընտրվել կալանավորումը, և հայտարարվել հետախուզում: Այսպիսով՝ ակնհայտ է, ոստիկանությունը ձեռքերը ծալած չի նստել, բայց անորոշ է՝ արդյոք այս անգամ էլ իրական մեղավորների փոխարեն ինչ-որ մարդիկ քավության նոխազ կդառնան, ինչպես եղել է սովորաբար: Եթե պարզվի, որ Վալերի Օսիպյանն էլ ոչ պակաս շոումեն է, քան Վովա Գասպարյանը եւ ոչ ավելին, ապա թավշյա հեղափոխության հաղթանակը նույն րոպեին եւ ամբողջությամբ ջուրը կընկնի, ու Հայաստանը կրկին ու մեծ թափով առնվազն մի քանի տասնյակ տարի հետ կընկնի:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: