Նրանք խաղում են շախմատի տախտակի միեւնույն դաշտում

Mar 15, 2018 Comments Off on Նրանք խաղում են շախմատի տախտակի միեւնույն դաշտում

Ապրիլյան զարգացումներին ընդառաջ` ներիշխանական  տրամադրություններից որոշակի  տպավորություն է ձեւավորվել, որ կա ռեալ անհանգստություն Սերժ Սարգսյանի վարչապետության գործընթացը ձախողելու հարցում: Արդեն մի  քանի շաբաթ է ՝իշխանությունն ու ընդդիմությունը մարտիմեկյան իրադարձությունների վերաբերյալ փոխադարձ քննադատությունների առանցքում պահում են ՀՀ երկրորդ նախագահ Ռոբերտ Քոչարյանի անունը: Գրոհը երկրորդ նախագահի ուղղությամբ նոր թափ հավաքեց Մարտի 1-ի գործով խորհրդարանական լսումների ընթացքում, երբ  ոչ միայն հիշատակում էին Քոչարյանի անունը, այլ ուղղակի մեղադրանքներ հնչեցնում նրա հասցեին, տպավորություն թողնելով, որ իշխանությունների անհանգստությունը երկրորդ նախագահի ակտիվացման հետ է կապված:Այդ տեսակետն ավելի կարծրացավ, երբ նախօրեին նախկին նախագահին սպասարկող  2rd.am կայքը տպագրեց Քոչարյանի գրասենյակի ղեկավար Վիկտոր Սողոմոնյանի հետ հարցազրույցը: Մարտի 1-ի վերաբերյալ հարցադրմանը Սողոմոնյանը պատասխանել էր. «Անկեղծ ասած, Փաշինյանի գործողությունները ինձ բացարձակապես չեն հետաքրքրում: Բայց, օգտվելով առիթից, ասեմ, որ իր «շնորհիվ» ականատես դարձա մեր նորագույն պատմության ամենացինիկ տեսարանին. Մարտի 1-ի անկարգությունների գլխավոր սադրիչն ու կազմակերպիչը Ազգային ժողովում Մարտի 1-ի գործով լսումներ էր կազմակերպել ու նստած ԱԺ նախագահի աթոռին՝ վարում էր նիստը»: Նա շեշտել էր նաեւ, որ նախապես պլանավորված այցի պատճառով երկրորդ նախագահը չի մասնակցի  Արմեն Սարգսյանի երդմնակալությանը, ավելին թերեւս ոչ պատահականորեն չէր շրջանցվել նաեւ հայ-թուրքական արձանագրությունների մասին հարցը՝ մեկ անգամ եւս հիշեցնելով Քոչարյանի կոշտ դիրքորոշումն այդ արձանագրությունների վերաբերյալ եւ հեգնանք-ակնարկն առ այն, որ ի տարբերություն Քոչարյանի, օրվա իշխանությունները այդ ամենը հասկացան տասը տարի անց:

Մինչդեռ լեզվաբան, ԵՊՀ դասախոս Նարինե  Դիլբարյանի կարծիքով իշխանությունների գործողություններում ոչ թե անհանգստություն է նկատվում, այլ ճիշտ հակառակը՝ «իշխանություններին թերեւս թվում է, որ կարկանդակն արդեն բաժանված է եւ հայտնի են սեղանի հյուրերը». «Դրա վկայությունը նույն այս պարգեւատրումներն են, ընտրվում են հերոսներ, որոնք առաջացնում են հանրության շատ մեծ շրջանակների ցասումը:  Այս ամենից կարելի է եզրակացնել, որ կա՛մ Սերժ Սարգսյանի շրջապատը նրան դրդում է անել այսպես կոչված ոչ ժողովրդահաճո քայլեր, որովհետեւ շատ ինքնավստահ է, կա՛մ էլ ընդամենը տրվել են ժամանակի ընթացքին, քանզի վախեր ունեցող մարդը չէր պարգեւատրի իր  շրջապատին, այլ ընդհակառակը ինչ որ չափով կմեղմեր հասարակության զայրույթը»: Հիշեցնենք, որ Կանանց տոնի առթիվ Սերժ Սարգսյանի կողմից  պարգեւատրված մի խումբ կանանց շարքում էր նաեւ սերիալների հայտնի սցենարիստ Դիանա Գրիգորյանը. նա պարգեւատրվեց Մովսես Խորենացի շքանշանով եւ արժանացավ հանրության պարսավանքին։

Իսկ Քոչարյանի հայտնությունը Նարինե Դիլբարյանի կարծիքով ըստ ամենայնի   իրեն հասցեագրված մեղադրանքներին պատասխան տալու  հանգամանքով է պայմանավորված, որոնք հնչեցին Մարտի 1-ի թեմայով քննարկումների ժամանակ:Դիլբարյանը  չի բացառվում , որ տեւական լռությունից հետո հնարավոր է, այսպես կոչված, հետախուզական նպատակ հետապնդող հայտնություն լինի.<<Գնդակը նետեցին, որպեսզի տեսնեն, թե ով կվերցնի, բայց այն կարծես թե վերցնող չեղավ, գուցե վերադարձի ցանկություններ կան, իսկ իրական հիմքեր, անկեղծ ասած, ես չեմ տեսնում>>:  Դիլբարյանի գնահատմամբ մեծ հաշվով Սերժ Սարգսյան-Ռոբերտ Քոչարյան հակասություններ չկան, ավելին միայն Սերժ Սարգսյանը կարող է ապահովել Քոչարյանի վերադարձի իրական հիմքերը.<<Միայն Սերժ Սարգսյանը կարող է ապահովել Քոչարյանի անվտանգ նավարկության ընթացքը տնտեսական եւ սոցիալական նավահանգիստներում: Իրենք երկուսն էլ իրար համար համաերաշխիք են եւ՛ անցած ճանապարհի, եւ՛ նախընտրելի ռազմավարության, մեթոդների, գործունեության առումով: Հետեւաբար Սերժ Սարգսյանը Ռոբերտ Քոչարյանի համար նախընտրելի վարչապետ է, նախընտրելի ղեկավար, որպեսզի թե Մարտի 1-ը եւ թե այլ  բազմաթիվ հարցերի մասին վիճաբանություն չբարձրանա: Պետք չէ անհանգստություն ունենալ, որ Քոչարյանը կարող է խափանել Սերժ Սարգսյանի վարչապետության գործընթացը. նրանք խաղում են շախմատի տախտակի միեւնույն դաշտում>>:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: