Արմեն Սարգսյանը ոչ մի օր ՀՀ շարքային քաղաքացի չի եղել

Mar 03, 2018 Comments Off on Արմեն Սարգսյանը ոչ մի օր ՀՀ շարքային քաղաքացի չի եղել

Իշխող կուսակցությունների նախագահի թեկնածու Արմեն Սարգսյանի առաջին բեմելը տխուր ու չստացված ավարտ ունեցավ: Թեկնածուն, որեւէ հարցի ըստ էության պատասխանի փոխարեն, միալար գվվում էր ու շեղվում այլ ուղղությամբ: Սակայն ամենաամոթալին իր քաղաքացիության հետ կապված հարցերից խուսանավելն էր: Ինչպես հայտնի է մինչ Արմեն Սարգսյանը կընդուներ ՀՀԿ-ի առաջարկը ՀՀ 4-րդ նախագահի թեկնածության վերաբերյալ, մամուլը խորամուխ եղավ նրա կենսագրության էջերի մեջ՝ հայտնաբերելով, որ Սարգսյանն առաջադրվելու իրավունք չունի, քանի որ չի բավարարում նոր Սահմանադրության այն պահանջին, որ վերջին վեց տարում Հայաստանում մշտական բնակություն ու բացառապես ՀՀ քաղաքացիություն պետք է ունենա: Ուսումնասիրությունների արդյունքները ցույց տվեցին, որ Սարգսյանը տակավին 2014 թվականին որպես բրիտանացի է ներկայացրել իր մի շարք ղեկավարած կազմակերպությունների փաստաթղթերում:

«Ելք» խմբակցության ղեկավար Նիկոլ Փաշինյանը մինչ Արմեն Սարգսյանի ելույթը պահանջեց ներկայացնել Արմեն Սարգսյանի քաղաքացիության վերաբերյալ փաստաթղթեր: «Մենք գիտենք, որ Հայաստանի Հանրապետության նախագահի թեկնածուին որոշակի պահանջներ են առաջադրվում, մասնավորապես՝ քաղաքացիության՝ Հայաստանի Հանրապետության քաղաքացի լինելու, մշտական բնակության վայրի, մենք ոչ մի փաստաթուղթ չենք տեսնում, որ այդ պահանջներին համապատասխանում է: Բացի այդ, մամուլում տպվել են բազմաթիվ հրապարակումներ, որոնք վկայում են, որ պարոն Սարգսյանը մինչև 2014 թվականը եղել է Մեծ Բրիտանիայի քաղաքցի»,- հայտարարեց Նիկոլ Փաշինյանը:

Վահրամ Բաղդասարյանն ամբիոնից հորդորեց ԱԺ քարտուղարությանը պատգամավորներին տրամադրել բոլոր փաստաթղթերը՝ վստահեցնելով, նաեւ, որ Սարգսյանն առաջնորդվել է ըստ օրենքի եւ ամեն ինչ կատարյալ համապատասխանում է օրենքին: Սակայն քարտուղարությունն այդպես էլ որեւէ փաստաթուղթ չներկայացրեց:

Փաշինյանը պնդեց. «Մի քանի անգամ հետաքրքրվել եմ քարտուղարությունից, բայց մեզ միայն կենսագրություն է տրվել: Անհապաղ՝ հենց հիմա պետք է ծանոթանալ այդ փաստաթղթերին»: Բաղդասարյանն էլ իր հերթին պնդեց, որ օրենքով ինչ փաստաթուղթ պահանջվում է՝ առկա է եւ ներկայացված: «ԵԼՔ»-ի պատգամավորներից Արարատ Միրզոյանը հայտարարեց. «Մեծ Բրիտանիայի դեսպանատունը ներկայացրել է տեղեկանք, ըստ որի՝ ինչ-որ ՍՊԸ-ի երեք տնօրեններից մեկը լինելու համար պետք է ունենալ քաղաքացիություն, իսկ Արմեն Սարգսյանը 12-14թթ. եղել է այդ ՍՊԸ-ի տնօրենը՝ Նազարբաեւի աղջկա եւ Չիլինգարյանի հետ, այսինքն՝ եղել է նաեւ Մեծ Բրիտանիայի քաղաքացի»:

Պատգամավորների հարցերին պատասխանելու ժամանակ Սարգսյանին կրկին ուղղվեց քաղաքացիության մասին հարցը: «Երբ է դադարեցվել ձեր՝ Մեծ Բրիտանիայի քաղաքացիությունը»,-հետաքրքրվեց Արտակ Զեյնալյանը: Արմեն Սարգսյանը պատասխանեց. «Ճիշտ եք՝ կարեւոր է, թե ես երբ եմ դիմել՝ Մեծ Բրիտանիայի քաղաքացիությունից հրաժարվելու համար: Ես ՀՀ քաղաքացի լինելով՝ դիմել եմ Բրիտանիայում մշտական կեցության եւ քաղաքացիության համար 2000թ.-ին: Կարծում եմ՝ կրկնակի քաղաքացիության ինստիտուտը մեր ազգի հետ կապված իրական ցավալի երեւույթ է: Ես միայն ՀՀ քաղաքացի եմ 2011 դեկտեմբերի 2-ից: Իմ կողմից տրվել են բոլոր պահանջվելիք փաստաթղթերը»:

«Փաստաթղթով պետք է հիմնավորվի, որ դուք հրաժարվել եք Մեծ Բրիտանիայի քաղաքացիությունից: Ասացիք, որ ՀՀ քաղաքացի եք 2011թ.-ից, բայց ինչո՞ւ Մեծ Բրիտանիայից չեք վերցնում եւ հրապարակում այդ դիմումը, որ այս խոսակցությունները դադարեն: Այդ թուղթը բերեք՝ հրապարակենք-վերջացնենք, սա ձեզ անընդհատ հետապնդելու է»,- իր ելույթում քաղաքացիության չարաբաստիկ հարցին շարունակություն տվեց  Նիկոլ Փաշինյանը: Արմեն Սարգսյանը պատասխանեց. «Մի քանի անգամ անդրադարձա այդ հարցին: Այդ փաստաթուղթը նրա մասին չէ՝ ես Մեծ Բրիտանիայի քաղաքացի՞ եմ, թե՞ ոչ, այդ փաստաթուղթը իմ՝ Մեծ Բրիտանիայի քաղաքացիության սառեցման մասին է»: Նիկոլ Փաշինյանը վրդովվեց. «Սա ի՞նչ անլուրջ վերաբերմունք է ՀՀ հանրության հանդեպ»:

Արմեն Սարգսյանը, սակայն, նույն պատասխանը պնդեց:  Մի խոսքով քննարկման երկար ու ձիգ ժամերի ընթացքում Արմեն Սարգսյանը չկարողացավ իրեղեն ապացույց ներկայացնել այդ հարցի վերաբերյալ: Ամփոփիչ ելույթում Փաշինյանը հայտարարեց.« Այս գործընթացում չի կարող բանավոր հայտարարությունը հիմք լինել, քանի որ կան այլ փաստաթղթեր: Մի ամիս էլ սա է քննարկվում, ձեր լեգիտիմության հարցն է քննարկվում, բայց Դուք չեք ուզում մի պարզ գործողություն անել՝ Բրիտանիայից մի տեղեկանք չեք բերում, որ Արմեն Սարգսյանն այսինչ օրը դիմում է գրել և հրաժարվել քաղաքացիությունից: Սա չեք անում նույնիսկ այն պայմաններում, որ բրիտանական թագավորական ընտանիքում մտերիմներ ունեք: Այս պայմաններում, եթե չի արվում այդ գործողությունը, ուրեմն մեկ բացատրություն կա, որ նման փաստաթուղթ գոյություն չունի: Ես ուշադիր նայեցի Ձեր կենսագրությունը, և ՀՀ քաղաքացիություն ունենալ-չունենալը համընկնում է ՀՀ-ում պաշտոն ունենալ- չունենալու հետ: 1991 թվականին է ՀՀ-ն հիմնադրվել, դուք այն ժամանակ պաշտոն եք ունեցել և եղել եք ՀՀ քաղաքացի: 2002-ին Ձեզ ազատել են դեսպանի պաշտոնից, և Դուք հրաժարվել եք ՀՀ քաղաքացիությունից: 2010-ին, երբ կրկին դեսպան պետք է լինեիք, կրկին ընդունել եք ՀՀ քաղաքացիություն: Դուք ոչ մի օր ՀՀ շարքային քաղաքացի չեք եղել: Այստեղ հարց է առաջանում՝ ՀՀ քաղաքացիությունից հրաժարված և միայն պաշտոնի համար քաղաքացի դարձած անձը բարոյական իրավունք ունի՞ ՀՀ նախագահ ընտրվելու»:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: