Ական՝ հանուն Սերժ Սարգսյանի

Mar 03, 2018 Comments Off on Ական՝ հանուն Սերժ Սարգսյանի

Այսօր Ազգային ժողովում նախագահի թեկնածու Արմեն Սարգսյանը ներկայացավ պատգամավորներին եւ կոչված էր պատասխանելու նրանց հուզող հարցերին։ Սակայն Սարգսյանը բառի բուն իմաստով «ջրեց» բոլոր հարցերը՝ իր քաղաքացիության, Հայաստանում վեց տարվա մշտական բնակության սահմանադրական պահանջի, խուսանավեց քաղաքական բովանդակության եւ հատկապես Սերժ Սարգսյանի վերաբերյալ հարցադրումներից, որոնք հնչեցին բացառապես Ելք խմբակցության պատգամավորների կողմից։

Արմեն Սարգսյանի տրամադրությունը բարձրացրեցին ՀՀԿ-ականները, ամեն մեկը մի ձոն նվիրեց նախագահի իրենց թեկնածուին։ Առաջինն այդ գործին նետվեց ԱԺ փոխնախագահ Էդուարդ Շարմազանովը։«Պարո՛ն Սարգսյան, ես, զուտ պատահմամբ՝ երեկ նայել եմ Ցեղասպանության 100-րդ տարելիցի կապակցությամբ Ձեր ելույթը և այն մեսիջները, որ կային այնտեղ՝ կարմիր թելի նման այստեղ էին : Դա ցեղասպանությունից հետո վերածնվելու և ցեղասպանությունը հաղթելու գաղափարն էր»,-ասաց Շարմազանովը և հավելեց, որ Հանրապետականը չի կաշկանդելու այս թեկնածուին և Արմեն Սարգսյանի համար պատիվ է լինել ՀՀԿ-ի նախընտրած թեկնածու և դա ոչ թե թերություն, այլ առավելություն է։«Լսելով Ձեզ՝ ես այստեղ տեսա պետական գործչի և լավատես գործչի, որը հավատում է ՀՀ-ի, Արցախի Հանրապետության և սփյուռքի եռամիասնությանը, և որ 25 տարի հետո ունենալու ենք ավելի ուժեղ Հայաստան։ Դժվարություններ կան։ Այո՛։ Լինելո՛ւ են։ Այո՛։ Բայց դժվարությունները հնարավորություն են»,- շարունակեց ՇարմազանովըՀերթում հաջորդը Կորյուն Նահապետյանն էր․ «Գարնան առաջին օրը համահայկական նոր օրակարգ ձևավորելու նախաշեմին ենք, և այդ իմաստով վստահ եմ, որ Հանրապետության նոր նախագահի թեկնածության քննարկումը մեզ բերելու է մի նոր հանգրվանի։ Անկեղծորեն պիտի ասեմ, որ ոգհեշնչված եմ նախագահի ելույթով։ Ելույթն իսկապես պարունակում էր լայնախոհություն, բարեկրթություն, հասարակական օրգանիզմի շատ ճիշտ ախտորոշում»։Նահապետյանը նշեց, որ Արմեն Սարգսյանի ելույթը խարսխված էր արժանապատվության և առաքինության վրա, և ինքը տեսավ, որ այն այն մարդիկ, ովքեր ունեն անգամ փակ հաղորդակցության անոթներ, նման ելույթից չեն կարող մնալ անհաղորդ։

«Ես ողջունում եմ Ձեր եռանդը, նվիրվածությունը, Ձեր էությունը, Ձեր տեսակը։ Ես ուրախ և հպարտ կլինեմ ունենալու մեր երկրի համար Ձեզ նման նախագահ»։ Արմեն Աշոտյանը իր ելույթում հայտարարեց՝ ռիսկը մեծ է, որ իր ասածը կարող է զանազան մեկնաբանությունների ենթարկվել և դիտարկվել որպես հաճոյախոսություն: Նա որոշեց այլ ձևաչափով կառուցել խոսքը և Արմեն Սարգսյանի մասին պարզապես ասաց. «Ճիշտ թեկնածու, ճիշտ ժամանակին, ճիշտ տեղում»: Նրա խոսքով՝ իրենք խորհրդարանական հանրապետության ճանապարհին ակնկալում են Արմեն Սարգսյանի լուման. «Ես հետևել եմ ձեր արշավին, և այն շատ տպավորիչ էր»:

Ինչպես նշեց Արմեն Աշոտյանը՝ նախագահի «տարածքը» խիստ սահմանափակ է. «Բայց այդ նեղ տարածքում կարելի է և՛ խրճիթ կառուցել, և՛ կառուցել բարձրահարկ շենք: Ես հուսով եմ՝ Ձեր գործունեության շնորհիվ այդ տարածքը կդառնա Հայաստանի դեմոկրատական հերթական բաստիոնը, հերթական աշտարակը»: Արմեն Աշոտյանը կարևորեց նաև անհատի դերը: Նրա խոսքով՝ այլընտրանքային ընտրության դոմինանտը և պարտադիր պայմանը հետկոմունիստական հոգեբանության մնացորդ է. «Իսկ եթե կան այլընտրանքային գաղափարներ, ինչո՞ւ նրանք չեն հնչում»: Արմեն Աշոտյանը Արմեն Սարգսյանին համեմատելով Հռոմի կայսր Դիոկլետիանոսի հետ՝ ասաց. «Պարոն Սարգսյան, այդ «կաղամբը» մեր երկրում մենք դեռ միասին պետք է աճեցնենք»: ՀՀԿ խմբակցության պատգամավոր Սամվել Ֆարմանյանն էլ հայտարարեց. «Ապագա վարչապետի, Ձեր անունը միայն ոսկե տառերով կարող է գրվել պատմության էջերում, եթե աշխարհագրական այս միջավայրում կարողանաք ապահովել հայ ժողովրդի հարաճուն գերակայությունը մեր նեղ աշխարհագրական միջավայրում: Ինչպես ասում են՝ մենք էլ այդ ամենին անառարկելիորեն կայուն ու անխախտ հենարան, աջակից և մասնակից»: Նիկոլ Փաշինյանը եզրափակիչ ելույթում նկատեց«Ձեր քաղաքացիության շրջանները մեկը մեկին համընկնում են Հայաստանում պաշտոն ունենալ-չունենալու հետ: Դուք ձեր կյանքի ընթացքում ՀՀ շարքային քաղաքացի ոչ մի օր չեք եղել: ՀՀ քաղաքացիությունից հրաժարված եւ դա ընդամենը որպես պաշտոնի հնարավորություն ունեցած մարդն արդյոք ունիբարոյական իրավունք ՀՀ նախագահ ընտրվելու»,-ասաց Փաշինյանն ու հավելեց. «Ոչ լեգիտիմության ականը դրել են մարդու տակ, որ արդարացնի Սերժ Սարգսյանի բոլոր հույսերը, ինչպես ասում էր Սերժ Սարգսյանի հետ հանդիպման ժամանակ»:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: