Քաղաքական ու հանցավոր կծիկ է բացվում

Feb 15, 2018 Comments Off on Քաղաքական ու հանցավոր կծիկ է բացվում

Ալավերդցի Վահագն Աբգարյանի մասնակցությամբ քրեական գործը գնալով թեժանում է։ Մի քանի շաբաթ է քրեական այս հեղինակությանը ձերբակալել են, սակայն մի շարք պաշտոնյաների, իրավապահ մարմինների բարձրաստիճան պաշտոնյաների առնչության ու հանցակցության մասին է խոսվում, ավելին՝ մամուլում տեղեկություններ կան պաշտոնյաների ձերբակալությունների և կալանավորումների մասին:

Ինչպես գիտենք, նախօրեին ձերբակալվեց և կալանավորվեց Քննչական կոմիտեի Լոռու մարզային քննչական վարչության պետ, արդարադատության գնդապետ Թաթուլ Շուշանյանը։ Նույն գործի շրջանակներում արդեն 4 կալանավորված քննիչ կա։ Պարզվեց, որ քննչական կոմիտեի մի շարք պաշտոնատար անձինք Վահագն Աբգարյանի կամ նրա ղեկավարած հանցավոր համագործակցության անդամների դրդմամբ չարաշահել են իրենց պաշտոնեական լիազորությունները՝ նպաստելով ենթադրյալ հանցանք կատարած անձանց քրեական պատասխանատվությունից խուսափելուն:

Մամուլի տեղեկություններով ձերբակալությունների ալիքը հասնելու է Լոռու ոստիկանության պետին և գործը հսկող դատախազին, քանի որ մոտ երկու տարի առաջ Ալավերդու շուկայում կատարված սպանությունից, կրակոցներից հետո հարուցված քրեական գործով պատշաճ քննություն չի կատարվել: Պարզ ասած՝ մի քրեական հանցագործի կալանավորմամբ քանդվեց ողջ իրավապահ համակարգի հանցավոր անգործությունը: Քանի որ հենց նրանց՝ Քննչական, Ոստիկանության, Դատախազության եւ նույնիսկ ԱԱԾ-ի անգործության արդյունք է, որ մոտ չորս տարի է ձգվում է Լոռվա այս երկու կլանների միջեւ վենդետաների շարքը, որը սկիզբ դրվեց Ալավերդու քաղաքապետի նախորդ ընտրությունների ժամանակ եւ միմյանց թշնամացան մրցակից երկու թեւերին, որտեղ քրեական աշխարհի ներկայացուցիչների պակաս չի զգացվում: Վահագն Աբգարյանի կալանավորումը կոնկրետ Կամո Փիրուզյանի սպանության գործով է, սպանությունը տեղի ունեցավ անցած տարի ամռանը եւ բացահայտումների շարքը միայն սկսվեց այս տարի հունվարի վերջից։ Աբգարյանի հետ կալանավորվեցին եւս մի քանի հոգի։

Նախնական քննության տվյալներով՝ 2017 թվականի հունիսին կազմակերպվել եւ իրականացվել է Ալավերդի քաղաքի բնակիչ Կամո Փիրուզյանի սպանությունը՝ այդպիսով վրեժխնդիր լինելով Կ. Փիրուզյանի եղբոր՝ հետախուզման մեջ գտնվող Վարդան Փիրուզյանի կողմից Վ. Աբգարյանի մտերիմներ Էդ. Պողոսյանի եւ Վ. Ավագյանի սպանության համար։ Կ. Փիրուզյանի սպանության անմիջական կատարումը վերապահվել է նույն քաղաքի բնակիչ Վ. Դավթյանին, ով, ըստ նախնական քննության տվյալների, հետեւել է նրա տեղաշարժին եւ հունիսի 13-ին Ալավերդի քաղաքի Թումանյան 20 հասցեում գտնվող խանութի մոտ «Մակարով» տեսակի ատրճանակից կրակոցներ է արձակել Փիրուզյանի ուղղությամբ, ով ստացած վնասվածքներից տեղում մահացել է։ Վահագն Աբգարյանի կալանավորումը նպաստեց նաեւ միջգերատեսչական հակասությունների վերհանման, իսկզբանե դատախազությունը հայտարարել էր, որ նախաքննության մարմնի կողմից կատարվել է թերի քննություն: Ըստ դատախազության՝ մասնավորապես, չի կատարվել գործի հանգամանքների բազմակողմանի, լրիվ և օբյեկտիվ հետազոտություն:

Այդ իսկ պատճառով քրեական գործը գլխավոր դատախազության կողմից ուղարկվել է ՀՀ քննչական կոմիտեի ՀԿԳ քննության գլխավոր վարչություն՝ նախաքննությունը շարունակելու համար: Այսինքն ակնհայտ է Քննչական կոմիտեի շահագրգռվածությունը՝ իրականությունը քողարկելու: Բայց մյուս կողմից մի երկու քննիչի, անգամ մարզայինի քննչականի պետի ձերբակալությունը ոչինչ չեն կարող փոխել, կամ ակնկալել դրանից իրական արդարադատություն, իհարկե, միամիտ կլինի, քանզի ոչ քննիչները, եւ ոչ էլ նրանցից ավելի բարձր պաշտոնյաները չէին կարող գործել ինքնուրույն ու կոծկել հանցավոր այս խմբավորմանը: Ի վերջո, նրանք ավելի բարձրաստիճան հովանավորներ են ունեցել ՝ թե իրավական, թե քաղաքական դատում:

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: