Հին ընկերները դավաճանում են

Dec 13, 2017 Comments Off on Հին ընկերները դավաճանում են

Հայ հեղափոխական դաշնակցությունում վերջին ժամանակներս անհավատալի տրանսֆորմացիաներ են կատարվում։ Կար ժամանակ, երբ դաշնակցականները, ՀՀԿ-ականներից մեկ ոտք առաջ ընկնելով, հայտարարում էին Սերժ Սարգսյանի անշրջելիության, անփոխարինելիության մասին, սակայն այլոց հետ կոալիցիա կազմելու մասին մեղմիկ հովիկը փոթորիկ է բարձրացրել ՀՅԴ-ում։ Նրանց շարքերից հնչող վերջին հայտարարությունները գերազանցում են ցանկացած ընդդիմադիրի կողմից արվածին, ու եթե այսպես շարունակվի Հայաստանում վերջապես ռեալ ընդդիմություն կունենանք, որոնք առանց այլեւայլությունների կխոսեն իշխանության գործած մեղքերի մասին։

Դեռ չէին խամրել Արմեն Ռուստամյանի օրերս արած հայտարարության գույները, որ Սերժ Սարգսյանն ամենեւին էլ անփոխարինելի չէ, պարոն Ռուստամյանը նորն արեց։ «Ընտրությունները ե՞րբ չեն կեղծվել, հարգելիներս: Մենք հենց դա էլ ասում ենք՝ ընտրությունների կեղծիքները մի օր պետք է ավարտվեին»,- այսօր ԱԺ ճեպազրույցների ժամանակ հայտարարեց իշխանության մաս կազմող ՀՅԴ խմբակցության ղեկավարը եւ մանրակրկիտ ներկայացրել ընտրազեղծարարության մեխանիկան․ «Այս ընտրությունների տարբերությունը այն է, որ կեղծիքներ Ընտրական օրենսգրքի հետ կապված, որ տեղամասում լցոնումներ, այն երեւույթները, որոնք մենք ունեցել ենք, թվեր նկարեն, մի ընտրություն կայանա, մի այլ ընտրության արդյունքներ ներկայացվեն, այդպիսի բաներ հո բացառվել են: Միակ պրոբլեմը այս ընտրությունների ժամանակ, որ եղել է, որի դեմ պիտի պայքարենք, ընտրակաշառքն է, որը, այո՛, այնքան է եղել, որը աղավաղել է ընտրությունների ամբողջ գործընթացը: Բայց սա է մենակ հարցը, այլ հարց ընտրական համակարգն այսօր չունի: Հիմա ընտրակաշառքի հարցն է, որը պիտի կարողանանք լուծել եւ դրա դեմ էլ պայքարելու ենք անպայման: Հաջորդ ընտրությունները հաստատ լինելու են շատ ավելի բարձր մակարդակով»:

Նա ասում է, որ ընտրակաշառք բաժանողի ձեռքը պետք է կարողանան բռնել. «Ընտրակաշառքը նույն կոռուպցիայի նման բան է»: Ստացվում է, որ իշխանությունը, որի մաս է ՀՅԴ-ն, խոստովանում է իր ոչ լեգիտիմությունը։ Այո, դաշնակցականները կարող են ասել, թե իրենց ձայներն էլ են կեղծվել, իրենք ավելիին են արժանի, քան ստացել են, բայց եթե կեղծվել են ուրեմն ուրիշներն էլ ունեն իրավունք կասկածելու, որ հօգուտ ՀՅԴ-ի կեղծվել է նաեւ այդ կուսակցության ձայնը։ Սակայն Սերժ Սարգսյանի եւ վերջինիս իշխանության դեմ մեղադրանքները սրանով չեն ավարտվում։ Հարցին՝ Սերժ Սարգսյանի այն հայտարարությունը. «Նոր տարուց հետո՝ լինի մարզպետ, լինի նախարար կամ ինձ մոտ մարդ, չմիջնորդի որևէ համայնքապետի ներելու համար այդպիսի դեպքերում: Նորից եմ կրկնում` մենք պատրաստ ենք, եթե ինչ-որ դեպք է պատահել, որ մեզնից կախված չէ՝ դժբախտ պատահար և այլն, պատրաստ ենք ամեն ինչով օժանդակելու, բայց դիտավորյալ ձեռքերը կեղտոտելը մենք պատրաստ չենք այլևս հանդուրժել: Երևի առաջին անգամ եք ինձնից լսում այսպիսի խոսքեր, բայց իմ մոտեցումը միշտ այդպիսին է եղել» եւ պատասխանելով հարցին՝ հաղորդում չէ՞ այն մասին, որ Սարգսյանը նախարարի կամ մարզպետի միջնորդությամբ հանցագործություն կատարած գյուղապետին չի ազատել աշխատանքից՝ Ռուստամյանը հերքելով հաստատել է․ «Չէ, դրանից չի ենթադրվում միջնորդություն, որն ինքը լսել է, պարզապես ուզում է ասի, որ գործընթաց է տեղի ունենալու եւ որեւէ մեկը հին մեթոդներով նախկին հոգեբանությամբ չփորձի կանխել, ոնց որ Հայաստանում միշտ եղել է՝ միջնորդությամբ են անում, հովանավորչությամբ են անում, փորձում են կոծկել կատարվածները: Այսինքն, պարզ հայտարարվում է, որ այդպիսի դրսեւորումները այլեւս հնարավոր չի լինելու նոր Հայաստանում»:

Հարցին՝ պե՞տք է նոր Հայաստան գնալ Սերժ Սարգսյանի հետ, որն իր օրոք կատարված այսպիսի հանցագործություններ խոստովանեց՝ Արմեն Ռուստամյանը պատասխանեց. «Գիտեք, նաեւ փաստ է, չէ՞, որ նույն Սերժ Սարգսյանի օրոք են այս փոփոխությունները կատարվել: Սա օդից չեկավ»: Իրականում ՀՅԴ-ի ողջ մտահոգությունը նոր Հայաստանում սեփական ճակատագրի մտահոգությունն է, որն էլ հին ընկերներին գցել է նույնիսկ դավաճանության գիրկը։ Նրանք անխնա քննադատում են իշխանություններին՝ մոռանալով, որ հավասար պատասխանատվություն են կրում ժողովրդի առջեւ, եւ եթե գող է ՀՀԿ-ն, ապա նույնպիսին է նաեւ ՀՅԴ-ն, եթե ՀՀԿ-ն ընտրություններ է կեղծել, ապա ՀՅԴ-ն էլ լեգիտիմացրել է այդ ընտրությունները։ Պետք չէ կեղծ բարոյականություն խաղալ ու փորձել հաճույք ստանալով կույս մնալ։ Սերժ Սարգսյանն էլ կամ պետք է արագ հստակություն մտցնի, թե որտեղ է լինելու ՀՅԴ-ն 2018-ից հետո, կամ պատրաստ լինի այդ կուսակցության հերթական խայտառակ մեղադրանքներին։

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: