Նախկին ոստիկանապետի «մեղադրանքները» գործողի դեմ

Oct 25, 2017 Comments Off on Նախկին ոստիկանապետի «մեղադրանքները» գործողի դեմ

Սերժ Սարգսյանը ինչպես հայտնի է երեկ ներկա է գտնվել ոստիկանության կոլեգիայի ընդլայնված նիստին, որտեղ նա դժգոհել է ոստիկանության աշխատանքից՝ հիշատակելով և՛ վերջին շրջանի աղմկահարույց սպանությունները, և՛ բնակչության մոտ գտնվող ապօրինի զենքը և այդ հարեցրի հետ կապված հանրային բացասական արձագանքը, որը տեղ է գտել ԶԼՄ-ներում. «Չեմ կարող չմտահոգվել մեր քաղաքացիների անհանգստությամբ: Ինձ համար երկրում օրինականության և կարգուկանոնի լավագույն չափորոշիչը հանրության կարծիքն է: Այո՛, շատերն են ընդունում, որ այսօրվա ոստիկանները նախկինից ավելի պատրաստված են և ավելի դրական են ընկալվում: Սակայն կա նաև տարակուսանք, որ այդ նույն ոստիկաններն իրենց հնարավորությունները լիարժեք չեն իրացնում»,- հայտարարելէ Սերժ Սարգսյանը՝ հիշեցնելով, որ ոստիկանությունն ունի և անհրաժեշտ թե՛ մարդկային, թե՛ նյութատեխնիկական ռեսուրսներ:

Ըստ Սերժ Սարգսյանի՝ ոստիկանության աշխատանքի առյուծի բաժինը պետք է կազմեն իրավախախտումների կանխարգելմանն ուղղված միջոցառումները: Այս առումով, նախագահի գնահատմամբ՝ առկա վիճակը դեռ հեռու է ցանկալի մակարդակից:Սերժ Սարգսյանը բարձրացրել է ապօրինի զենքի հարցը, որի գործադրմանը հանրությունը վերջին երկու ամիսների ականատես եղավ՝ օրը ցերեկով Երևանի կենտրոնում և բանուկ ու մարդաշատ այլ վայրերում կատարված սպանությունների ժամանակ. «Ինչպե՞ս է պատահում, որ օրը ցերեկով, շատերի աչքի առջև հրազենի գործադրմամբ կատարվում են ծանր հանցագործություններ: Այս երևույթը մտահոգիչ է նաև այն առումով, որ նման դեպքերը չեն պակասում, այլ ավելանալով՝ ստանում են առավել հանդուգն դրսևորումներ:Ապօրինի պահվող հրազենը և զինամթերքը պետք է արագ հայտնաբերվեն և առգրավվեն: Սա ընդունեք որպես առաջիկա ամիսներին ձեր գլխավոր խնդիրներից մեկը և իմ հանձնարարությունը: Բայց ասածս բնավ չի նշանակում, որ պետք է համատարած շուրջկալներ և խուզարկություններ կազմակերպել, խանգարել քաղաքացիների հանգիստը, խախտել նրանց իրավունքները: Այսպիսի դեպքերի համար խստորեն պատժամիջոցներ են կիրառվելու»,- ասել է Սերժ Սարգսյանը։

Այսօր խորհրդարանում նախկին ոստիկանապետ, ԱԺ պատգամավոր Ալիկ Սարգսյանը, անդրադառնալով նախագահի այցին ու հնչեցրած մտահոգություններին ուշագրավ դատողություններ է հնչեցրել ոստիկանության լիազորությունների եւ գործունեության մասին։Նա մեկ նախագահին էր քծնում, մեկ ոստիկանության անգործությունն արդարացնում, վերջում էլ գտավ ջրից չոր դուրս գալու ելքը, մի լավ քլնգեց Վովա Գասպարյանի ղեկավարած համակարգի անգործությունը, հետո էլ արդարացրեց, թե ոստիկանությունը համապատասխան լիազորություններ չունի, սակայն Ալիկ Սերգեյիչը այդպես էլ համառորեն չմանրամասնեց, թե խոսքը որ լիազորությունների մասին է, ինչ չի կարող անել ոստիկանությունը, կամ ով է արգելելու․ «Նախագահի խոսքը շատ կանստրուկտիվ, ռեալ ու իրականությունը ներկայացնող խոսք էր: Եթե ամբողջությամբ գովեստի խոսքեր ասեր… կասե՞ք էս ամբողջ ժամանակահատվածում ոստկանությունը երբ է աբսալյուտ գովասանքի արժանացել: Այդպիսի բան ես երբևէ չեմ հիշում: Ընդանրապես ոստիկանության աշխատանքը շատ բարդ է և 100 տոկոսով իրագործել հնարավոր չէ: Բնականաբար, նախագահն էլ ճիշտ ներկայացրեց թերությունները, ի ցույց դրեց դրանք, ինչու չէ, նախազգուշացրեց, որպեսզի ոստիկանությունն իր հետագա գործունեության մեջ հաշվի առնի, գոնե մինիմալի հասցնի այս թերությունները»,- ասաց Ալիկ Սարգսյանը եւ հասնելով այն քննադատությանը, որ ոստիկանությունը չի հաջողվում արդյունավետ պայքար տանել զենք-զինամթերքի ապօրինի կիրառման դեմ, ասաց, որ ինքն էլ է այդ կարծիքին:

«Օրեր առաջ ես կարծես նույնպես այդ մասին մի բան ակնարկեցի: Զենք-զինամթերքի ավելանալն ունի օբյեկտիվ և սուբյեկտիվ պատճառներ: Այսօր ոստիկանության պայքարը նույն էս ուղղությամբ արդյունավետ չէ: Դրանք լատենտային հանցագործություններ են, հայտնաբերեցիր զենքը, կա էդ հանցագործությունը, չհայտնաբերեցիր, այդ մասին որևէ մեկը չի խոսում: Հիմա, եթե չեն հայտնաբերել և համարում են, որ դա չկա ու վերացել է, դա սխալ մոտեցում է: Հանցագործությունների թվաքանակի աճն ինքնին ցույց է տալիս, որ զենք-զինամթերք ժողովրդի ձեռքին կա: Դրանց դեմ ավելի արդյունավետ պայքար պետք է տարվի: Այս մեթոդներով և այս զգուշավորությամբ, ինչով որ այսօր ոստիկանությանը բերել դրել են այս վիճակին, որ չի կարելի ստուգել, հնարավոր չէ արդյունք ունենալ»,- նշեց նախկին ոստիկանապետը:

Ըստ նրա՝ ոստիկանությունն այսօր ուզած թե չուզած որդեգրել է զգուշավորությունը, որ ամեն տեղ չփորձեն զենք-զինամթերք փնտրել, քանի որ չգտնելու դեպքում այդ ոստիկաններն աշխատանքից կհեռացվեն, ծառայողական քննությունների որոգայթում կհայտնվեն եւ վերջապես կարժանանան հանրության քննադատություններին․ «Վերջին անգամ դուք ե՞րբ եք տեսել, որ գիշերային մի ժամի ոստիկանությունը ստուգայցեր կազմակերպի զենք-զինամթերքի հայտնաբերման ուղղությամբ: Կարգով թելադրված է, որ այս շրջանակներում կարելի է միջոցառումները կատարել: Հետո էլ քաղաքի կենտրոնում կրակոցներ են լինում, ասում են՝ բա մեքենայի բեռնախցիկում զենք է եղել: Լիազորություններ պետք է լինեն՝ այդ հանցագործության դեմ պայքարելու համար»,- նշեց Ալիկ Սարգսյանը՝ ըստ էության բաց տեքստով հայտարարելով, որ ոստիկանությունն , իսկապես, անգործության է մատնված։

Անի Սահակյան

Գլխավոր Թողարկում, Վերլուծություն
Մեկնաբանությունները փակ են: