«ՀՀ մասնագետները ոչնչով չեն զիջում համաշխարհային բրենդերում աշխատող մասնագետներին» (տեսանյութ)

Oct 13, 2017 Comments Off on «ՀՀ մասնագետները ոչնչով չեն զիջում համաշխարհային բրենդերում աշխատող մասնագետներին» (տեսանյութ)

Ամերիկայի ձայն

Տեղեկատվական տեխնոլոգիաներն այսօր սրընթաց զարգացում են ապրում աշխարհում: Հայաստանը ևս անմասն չէ այս գործընթացից, ուր ՏՏ-ները տնտեսական զարգացման գերակա ուղղություններից մեկն են: Հայաստանի վարչապետի խոսքերով, 2008-2016 թվականներին Հայաստանում այս ոլորտը գրանցել է ավելի քան 20 տոկոսանոց աճ, որը, ըստ վարչապետի, կարևոր նախապայման է այս ասպարեզում տարածաշրջանային կենտրոն դառնալու համար:

Հայաստանում տեղեկատվական տեխնոլոգիաների զարգացման առումով մեծ աշխատանքներ են տարվում, նշում է «Մայքրոսոֆթ»-ի Հայաստանյան գրասենյակի տնօրեն Լիանա Կորկոտյանը, ով ներկայացրեց համաշխարհային այս բրենդի ծավալած գործունեությունը Հայաստանում:

«Մեր հիմնական թիրախը կորպորատիվ սեգմենտն է ու գործարարները»,- ասում է Կորկոտյանը:

Նրա խոսքով, Հայաստանում ավելի ու ավելի նկատելի է դառնում տեղեկատվական տեխնոլոգիաների նկատմամբ գործարար միջավայրի վերաբերմունքի փոփոխությունը:

«Ուրախալի է, որ շատ բիզնեսներ սկսել են գիտակցել ՏՏ անհրաժեշտությունը և չեն դիտարկում այն որպես ուղակի մի ծախս»,-ասում է Կորկոտյանը:

Գրասենյակի տնօրենի խոսքերով, կարևոր մարտահրավերներից է անցումը դեպի թվայնացում, գործընթաց, որը առնչվում է ոչ միայն ՏՏ ոլորտին, այլ նաև բազմաթիվ այլ ասպարեզների հետ՝ դրականորեն ազդելով ոլորտի արդյունավետության վրա:

«Մայքրոսոֆթ»-ի հիմնական գործառույթներից մեկն էլ գործարարներին օգնելն է կիրառելու արդի տեխնոլոգիական գործիքներ, որոնք կբարձրացնեն դրանց արդյունավետությունն ու եկամուտը:

«Կարող է մի պահ թվալ, որ Հայաստանում թվային տրանսֆորմացիա տեղի չի ունենում, և այն զիջում է բազմաթիվ այլ զարգացած երկրներին, սակայն դա այդպես չէ»,- նշում է «Մայքրոսոֆթ»-ի գրասենյակի տնօրենը:

Իսկ այն հարցին, թե որքանով են տեղեկատվական տեխնոլոգիաները համաչափ զարգանում երկրում, Լիանա Կորկոտյանը նշում է, որ անշուշտ մայրաքաղաքից դուրս այս առումով առկա են խնդիրներ, սակայն իրավիճակը գնալով փոփոխվում է, և դրա վառ օրինակներն են

Հայաստանի մյուս երկու խոշոր քաղաքներում՝ Վանաձորում և Գյումրիում, այս ոլորտի զարգացման գրանցումը:

«Այսօր Գյումրին և Վանաձորը ոչնչով չեն զիջում Երևանին: ՏՏ կենտրոններ են բացվել ինչպես Գյումրիում, այնպես էլ՝ Վանաձորում»,- ասում է Կորկոտյանը:

Որպես խոշոր ընկերություն, «Մայքրոսոֆթ Հայաստան»-ն ակտիվորեն ներգրավված է մի շարք սոցիալական ոլորտներում, ներառյալ կրթության ոլորտում, ուր սերտորեն համագործակցում է կրթության նախարարության և դպրոցների տնօրենների հետ՝ մեծացնելով իրազեկությունն իր գործունեության և այս ոլորտին առնչվող հարցերի մասին:

Իրազեկության մեծացումը Հայաստանում ընկերության գերխնդիրներից մեկն է, ասում է «Մայքրոսոֆթ»-ի Հայաստանյան գրասենյակի տնօրենը: Այս առումով ընկերությունը հատկապես մեծ տեղ է տալիս արտոնագրված ծրագրերի օգտագործմանը, քանի որ, ըստ ընկերության գրասենյակի ղեկավարի, հաճախ մարդիկ չեն էլ գիտակցում, թե ինչ ռիսկեր է պարունակում ոչ արտոնագրված ծրագրի ներբեռնումը:

«Մարդիկ չեն գիտակցում, որ խախտում են օրենքը և ոչ արտոնագրված ծրագրով վտանգի տակ են դնում համակարգչում ունեցած իրենց տեղեկությունները»,- ընդգծում է Կորկոտյանը:

Միևնույն ժամանակ երիտասարդ սերնդի տեղեկատվական տեխնոլոգիաների յուրացման հարցում Լիանա Կորկոտյանը գտնում է, որ այս ոլորտում Հայաստանի մասնագետները ոչնչով չեն զիջում համաշխարհային բրենդերում աշխատող մասնագետներին:

Գլխավոր Թողարկում
Մեկնաբանությունները փակ են: